2 DIKRONIKA 1

₁Solomone, morwa wa Kgoši Dafida, o ile a tia mmušong wa Israele, gomme Morena Modimo wa gagwe a ba le yena mme a mo dira yo maatla kudu.

₂Kgoši Solomone a laela balaodi ba bahlabani ba ba dikete le ba ba makgolo, le baahlodi ba melato, le dihlogo ka moka tša malapa, le baetapele ka moka, ₃le setšhaba ka moka gore ba ye le yena lefelong la tirelo ntotomeng ye e kgobetšwego kua Gibeone. Ba ya moo ka gobane ke mo go bego go le Tente ya bodulo bja Morena ye Moshe, mohlanka wa Morena, a bego a e dirile kua lešokeng. ₄Polokelo ya Kgwerano yona e be e le kua Jerusalema, e beilwe ka tenteng ye Kgoši Dafida a bego a e hlomile ge a tšo tšea Polokelo kua Kiriate-Jearime. ₅Aletare ya mphiri ye e bego e dirilwe ke Betsaliele, morwa wa Uri, Uri morwa wa Hure, le yona e be e le kua Gibeone ka pele ga Tente ya bodulo bja Morena. Kgoši Solomone le setšhaba ka moka ba kgopela keletšo go Morena fao. ₆Solomone a dira dihlabelo tša go tšhungwa ka moka ka diruiwa tše sekete godimo ga aletare yeo ya mphiri moo Tenteng pele ga Morena.

₇Bošego bjoo Modimo a iponagatša go Solomone gomme a mmotšiša a re: “O nyaka gore ke go fe eng?”

₈Solomone a mo fetola a re: “Ka mehla o be o botegela tate Dafida kudu, gomme bjale o dirile gore ke mo hlatlame bogošing. ₉Hle, Morena Modimo, phethagatša se o se holofeditšego tate. O ntirile kgoši ya setšhaba se sentši bjalo ka lerole la lefase, ₁₀ka gona mphe bohlale le tsebo ye e nyakegago gore ke se buše. Go sego bjalo nka kgona bjang go buša setšhaba se sa gago se segolo?”

₁₁Modimo a fetola Solomone a re: “O kgethile gabotse. Bakeng sa go kgopela lehumo goba thoto goba tlhomphego goba lehu la manaba a gago goba le ge e le bophelo bjo botelele, o kgopetše bohlale le tsebo gore o tle o kgone go buša setšhaba sa ka, se ke go beilego kgoši ya sona. ₁₂Ka gona ke tla go fa bohlale le tsebo. Gomme godimo ga tšeo ke tla go fa lehumo le thoto le tlhomphego, tše go sego kgoši ye e kilego ya ba le tšona goba ye e tlago tsoga e bile le tšona.”

₁₃Solomone a tloga lefelong la tirelo ntotomeng ye e kgobetšwego kua Gibeone, mo go bego go le Tente ya bodulo bja Morena, gomme a gomela Jerusalema. A buša Baisraele a le fao. ₁₄A kgobokanya madira a dikoloi tša ntwa tše makgolo a lesome le a mane le banamedi ba dipere ba dikete tše lesome le tše pedi. A bea banamedi ba dipere Jerusalema le metseng ye e bego e na le dikoloi tša ntwa. ₁₅Mehleng ya pušo ya gagwe silibera le gauta e be e le tše ntši mo Jerusalema bjalo ka maswika, gomme mesedere e le ye mentši bjalo ka mego ya nagengtlase. ₁₆Dipere tša Solomone di be di rekwa Mutsri le Silisia ke bagwebi ba kgoši, mme di tlišwa Israele. ₁₇Dikoloi tša ntwa di be di rekwa Egepeta. Bagwebi bao le gona ba be ba rekišetša magoši a Bahete le a Basiria dipere le dikoloi tša ntwa, ba rekiša koloi ya ntwa dipapetlana tša silibera tše makgolo a a selelago, gomme pere e le dipapetlana tše lekgolo le masome a mahlano.