1 TIMOTHEOSE 4

₁Moya wo Mokgethwa o bolela thwii gore mehleng ya mafelelo batho ba bangwe ba tla kgeloga; ba tla theeletša meoya ya maaka ba latela le dithuto tša bademone. ₂Dithuto tše dibjalo di phatlalatšwa ke bafeane ba baradia ba ba hwilego matswalo mo nkego ba swailwe ka tshipi ya go fiša. ₃Batho ba mohuta woo ba iletša batho go nyala le go ja dijo tše dingwenyana, mokagona Modimo a di diretše gore di lewe ka tebogo ke bao e lego badumedi mme ba tsebago therešo. ₄Tšohle tše di hlodilwego ke Modimo di lokile; gomme mo go tšona ga go se se swanetšego go lahlwa, eupša tšohle di swanetše go amogelwa ka tebogo, ₅gobane di kgethwafatšwa ka lentšu la Modimo le ka thapelo.

₆Ge o ka laya badumedikawena bjalo o tla be o le mohlanka yo a direlago Kriste Jesu gabotse, o le yo a iphepago ka mantšu a tumelo le a thuto ye e lokilego ye o e botegetšego. ₇O kgaogane le dinonwane tša batho ba lefase. Wena o itlwaetše bophelo bja bodumedi. ₈Go ithobolla mmele go na le mohola mmeleng, eupša bodumedi bjona bo na le mohola dilong ka moka, ka gore bo re holofetša bophelo bja gonabjale le bja ka moso. ₉Yeo ke nnete ye e swanetšego go amogelwa ka botlalo. ₁₀Ke ka lebaka leo re katanago re kalokana, ka gobane re botile Modimo yo a phelago, yena e lego Mophološi wa batho bohle, gagolo bao ba dumelago.

₁₁O ba laye o be o ba rute ka dilo tše. ₁₂Go se be le yo a go nyatšago ka lebaka la ge o le yo mofsa, eupša o be mohlala go badumedi ka dipolelo tša gago, le ka boitshwaro, le ka lerato, le ka tumelo, le ka bohlweki. ₁₃O ikgafele go balela phuthego Mangwalo a Makgethwa, le go ba kgothatša, le go ba ruta, go fihlela ke etla. ₁₄O se hlokomologe mpho ye Modimo a go filego yona mola baprofeta ba bolela mabapi le wena, mola bagolo ba phuthego ba go bea diatla. ₁₅O itlwaetše dilo tše gomme o ikgafele tšona, gore tšwelopele ya gago e bonwe ke bohle. ₁₆O itote, o lote le thuto ya gago. O fele o phetha dilo tše, ka gobane ge o dira bjalo o tla be o iphološa, o phološa le ba ba go kwago.