1 DIKGOŠI 1

₁Bjale Kgoši Dafida o be a tšofetše kudu, gomme le ge bahlanka ba gagwe ba be ba mo pipa ka dikobo, o be a sa ruthele. ₂Ka gona bahlankedi ba gagwe ba re go yena: “Kgoši, mong wa rena, a re go nyakele mosetsana wa kgarebe yo a tlago go hlankela mme a go hlokomela. O tla robala o mo gokaretše, gomme a go ruthetša.” ₃Ba ile ba nyaka mosetsana yo mobotse mo Israele ka moka, ba mo hwetša kua Shuneme gomme ba mo tliša go kgoši. Leina la gagwe e be e le Abishaga. ₄E be e le yo mobotsebotse gomme yena a hlankela kgoši a mo hlokomela, eupša kgoši a se ke a mo robala.

_5-6Adonia, morwa wa Dafida le Hagite, o be a hlatlama Absalomo mme a na le sebopego se sebotsebotse. Dafida o be a se a ka a mo omanyetša selo. Adonia o be a ipona mo e lego gore o be a gopola gore e ka ba kgoši. O ile a inyakela dikoloi tša ntwa le dipere le bafelegetši ba banna ba masome a a fetšago seatla. ₇A bolela le Joaba, yo mmagwe e bego e le Tseruya, le moprista Abiatare, gomme bona ba dumela go mo thuša tabeng yeo. ₈Eupša moprista Tsadoko le Benaya, morwa wa Joyada, le moprofeta Nathane le Shimi le Rei le baleti ba Dafida ba ile ba se ke ba ema le Adonia.

₉Ka letšatši le lengwe Adonia a dira sehlabelo kua Letlapeng la go Šutha, kgauswi le mothopo wa Rogele, ka dihuswane, dikgomo, le mamane a a nonnego. A laletša barwa ba bangwe ba Dafida le bahlankedi ba kgoši bao ba bego ba etšwa Juda gore ba tle monyanyeng woo wa gagwe, ₁₀eupša a se ke a laletša Solomone, morwarragwe, goba moprofeta Nathane, goba Benaya, goba baleti ba kgoši.

₁₁Ke mo Nathane a ilego go Batseba, mmagoSolomone, gomme a mmotšiša a re: “Afa o kwele gore Adonia, morwa wa Hagite, o ipeile kgoši? Gomme Kgoši Dafida ga a tsebe selo ka taba yeo! ₁₂Ge o nyaka go phologa le go phološa Solomone, morwa wa gago, ke go eletša ₁₃gore o ye go Kgoši Dafida ka pelapela o mmotšiše o re: ‘Kgoši, mong wa ka, a ga se wa ka wa nkenela, nna, mohlanka wa gago, gore morwa wa ka, Solomone, o tla go latela ya ba kgoši, mme ke yena a tlago dula setulong sa gago sa bogoši? A bjale ke go reng Adonia e le kgoši?’ ” ₁₄Gomme Nathane a tšwela pele a re: “E tla re ge o sa bolela le kgoši, ka tsena mme ka tiišetša taba tšeo.”

₁₅Ka gona Batseba a ya go bona kgoši ka phapošing ya kgoši ya malao. Kgoši o be a tšofetše kudu, gomme Abishaga, mosetsana wa Shuneme, a mo hlokometše. ₁₆Batseba a khunama, a obama, a itahlela fase pele ga kgoši, gomme kgoši a mmotšiša a re: “A o nyaka eng?”

₁₇Batseba a mo fetola a re: “Mong wa ka, o nkenetše ka leina la Morena Modimo wa gago gore morwa wa ka, Solomone, ruri e tla ba yena a dulago setulong sa gago sa bogoši. ₁₈Fela Adonia e šetše e le kgoši, gomme ga o tsebe selo ka taba yeo. ₁₉Yena o dirile sehlabelo ka dikgomo tše ntši le dihuswane le mamane a a nonnego, gomme o laleditše barwa ba gago le moprista Abiatare le Joaba, molaodi wa madira a gago, gore ba ye monyanyeng woo, eupša ga se a laletša morwa wa gago, Solomone. ₂₀Kgoši, setšhaba ka moka sa Israele se lebeletše wena gore o se botše gore ke mang yo a tlago go latela bogošing. ₂₁Ge o ka se se botše, ge o ehwa mo, nna le morwago, Solomone, re tlilo swarwa bjalo ka basenyi.”

₂₂Batseba o be a sa bolela le kgoši ge Nathane a fihla mošate. ₂₃Kgoši a botšwa gore moprofeta o tlile, gomme Nathane a tsena mme a obama pele ga kgoši. ₂₄Ke moka a re: “Kgoši, mong wa ka, kgane ke wena o begilego gore Adonia ke yena a tlago go latela bogošing mme a dula setulong sa gago sa bogoši? ₂₅Lona lehono le o tšwile a yo dira sehlabelo ka dikgomo tše ntši le dihuswane le mamane a a nonnego. O laleditše barwa ba gago ka moka le Joaba, molaodi wa madira a gago, le moprista Abiatare, gomme gonabjale ba ja monyanya le yena mme ba goa ba re: ‘A Kgoši Adonia a re phelele!’ ₂₆Eupša nna, mohlanka wa gago, ga se a ntaletša, goba a laletša moprista Tsadoko, goba Benaya, goba Solomone. ₂₇Na taba ye e dumeletšwe ke wena, kgoši, gomme wa hloka le go botša le bona bahlankedi ba gago gore ke mang yo a tlago go latela bogošing?”

₂₈Kgoši Dafida a re: “Mpiletšeng Batseba.” Batseba a tsena a ema pele ga gagwe. ₂₉Ke moka a re go yena: “Ke go enela ka Morena yo a phelago, yo a mphološitšego mathateng a ka ka moka, ₃₀gore lehono ke tla phetha keno yela ke go enetšego yona ka leina la Morena Modimo wa Israele, gore morwa wa gago, Solomone, ke yena a tlago dula setulong sa ka sa bogoši.”

₃₁Batseba a khunama, a obama, a itahlela fase pele ga kgoši, mme a re: “A kgoši, mong wa ka, a re phelele go ya go ile!”

₃₂Ke moo Kgoši Dafida a laetšego gore Tsadoko le Nathane le Benaya ba bitšwe. Ge ba tsene, ₃₃a re go bona: “Sepelang le baleti ba ka, gomme le nametšeng morwa wa ka, Solomone, meila yela ya ka, mme le mo felegetšeng le theogeleng mothopong wa Gihone, ₃₄moo Tsadoko le Nathane ba mo tlotše gore e be kgoši ya Israele. Ka morago le letše phalafala mme le goe le re: ‘A Kgoši Solomone a re phelele!’ ₃₅Le rotogeng le mo šetše morago ge a etla go dula setulong sa ka sa bogoši. Ke yena e tlago ba kgoši legatong la ka, ka gobane ke kgethile yena gore e be mmuši wa Israele le Juda.”

₃₆Benaya a mo fetola a re: “Go tla dirwa bjalo, gomme Morena Modimo wa kgoši, mong wa ka, a tiišetše taba ye. ₃₇Bjalo ka ge Morena a bile le wena, kgoši, nke a be le Solomone, gomme a dire gore mmušo wa gagwe o tume le go feta wa gago.”

₃₈Ka gona Tsadoko le Nathane le Benaya le baleti ba kgoši ba nametša Solomone meila ya Kgoši Dafida, ba mo felegetša mothopong wa Gihone. ₃₉Tsadoko a tšea lenaka la makhura a mohlware le a bego a le tšere ka Tenteng ya bodulo bja Morena, gomme a tlotša Solomone. Ba letša phalafala, gomme batho ka moka ba goa ba re: “A Kgoši Solomone a re phelele!” ₄₀Ke mo setšhaba ka moka se boilego se mo šetše, ba goa ka lethabo mme ba letša dinakana, ba tsošitše mogobo wo o bego o dumiša lefase.

₄₁Ya re mola Adonia le baeng ba gagwe ba sa feleletša monyanya, ba kwa mogobo woo. Joaba ge a ekwa phalafala, a botšiša a re: “A lešata lela kua motseng ke la eng?” ₄₂Ge a sa bolela, Jonathane, morwa wa moprista Abiatare, a fihla. Adonia a re: “Tsena! Wena o motho wa go phafoga – o swanetše go ba o tliša taba tše botse.”

₄₃Jonathane a mo fetola a re: “Aowaowaa! Mong wa rena, Kgoši Dafida, o beile Solomone kgoši. ₄₄O romile Tsadoko le Nathane le Benaya le baleti ba kgoši go mo felegetša. Ba mo nameditše meila ya kgoši, ₄₅gomme Tsadoko le Nathane ba mo tloditše mothopong wa Gihone gore e be kgoši. Ka morago ba tsena motseng ba goa ka lethabo, gomme batho bjale ba tia mekgolokwane. Ke lona lešata leo le sa tšwago go le kwa. ₄₆Solomone bjale ke kgoši. ₄₇Go feta moo, bakgomana ba mošate ba ile ba tsena go tlo lebogiša Kgoši Dafida, gomme ba re: ‘A Modimo wa gago a dire Solomone gore a tume kudu le go feta wena, le mmušo wa gagwe o atlege kudu le go feta wa gago.’ Kgoši o ile a obama malaong a gagwe ₄₈mme a rapela a re: ‘A go tumišwe Morena Modimo wa Israele, yo lehono a beilego yo mongwe wa barwa ba ka setulong sa ka sa bogoši, gomme le nna a mphediša gore ke tle ke bone taba ye!’ ”

₄₉Ke moo baeng ba Adonia ba emeletšego ka letšhogo ba tloga, yo mongwe le yo mongwe a ikela lapeng la gagwe. ₅₀Adonia a boifa Solomone kudu, ka gona a ya Tenteng ya bodulo bja Morena, a swara dinakana tša aletare. ₅₁Kgoši Solomone a botšwa gore Adonia o a mmoifa, le gore o swere dinakana tša aletare, le gore o re: “Ke nyaka gore Kgoši Solomone a nkenele pele gore a ka se mpolaye.”

₅₂Solomone a fetola a re: “Ge a ka mpotegela, gona le ntsana ya moriri wa hlogo ya gagwe e ka se kgwathwe; eupša ge a ka se mpotegele, gona o tla hwa.” ₅₃Ke moo Kgoši Solomone a laetšego gore Adonia a theošwe aletareng. Adonia a ya go kgoši gomme a obama pele ga gagwe, mme kgoši a re go yena: “O ka ikela gae.”