1 DIKRONIKA 22

₁Ka gona Dafida a re: “Mo ke mo go tlago ba Tempele ya Morena Modimo. Ye ke aletare ye setšhaba sa Israele se tlago dira dihlabelo godimo ga yona.”

₂Kgoši Dafida a laela bafaladi ka moka bao ba bego ba dula nageng ya Israele gore ba kgobokane, gomme a ba fa mošomo. Ba bangwe ba bona ba betla maswika a go tlo aga Tempele. ₃A tliša tshipi ye ntši ya go tlo dira dikokotela le ditswalelo tša masoro le dikgwega, le mphiri wo montši wo o bego o ka se elwe. ₄Le gona go be go na le dikota tša mosedere tše motho a bego a ka se di bale, ka gobane batho ba Tirose le ba Sidone ba be ba di tlišetša Dafida ka bontši. ₅Dafida ka pelong a re: “Tempele ye morwa wa ka, Solomone, a tlago e agela Morena e swanetše go ba ye botsebotse mme e tume lefaseng ka moka. Eupša e sa le yo mofsa gomme ga a ne temogo, ka gona a e be nna ke mo nyakelago tša go e aga.” Ka fao Dafida a kgobokanya dikago tše ntši pele ga ge a ehwa.

₆A roma motseta gore a bitše Solomone, morwagwe, gomme a mo laela gore a agele Morena Modimo wa Israele tempele. ₇Dafida a re go yena: “Morwa wa ka, ke be ke nyakile go aga tempele gore ke hlomphe Morena Modimo wa ka. ₈Eupša Morena a mpotša gore ke bolaile batho ba bantši, le gore ke lwele dintwa tše kgolo. Ka gona, ka lebaka la madi a mantši a ke a tšholotšego a se ke a rata gore nna ke mo agele tempele. ₉A re go nna: ‘O tla ba le morwa yo e tlago ba motho wa khutšo, ka gobane ke tla dira gore a phele ka khutšo le manaba a gagwe ka moka a a mo potapotilego. Leina la gagwe e tla ba Solomone, ka gobane pušong ya gagwe ke tla dira gore Israele e be le khutšo le boiketlo. ₁₀Yena o tla nkagela tempele. E tla ba morwa wa ka, gomme nna ka ba tatagwe. Ba lešika la gagwe ba tla buša Israele go ya go ile.’ ”

₁₁Dafida a tšwela pele a re: “Bjale, ngwanaka, a Morena Modimo wa gago a be le wena gomme a phethe kholofetšo ya gagwe, mme a go atlegiše o mo agele tempele. ₁₂Hle, a Morena Modimo wa gago a go fe tlhaologanyo le bohlale gore o tle o buše Israele ka go phetha melao ya gagwe. ₁₃Ge o ka botegela go phetha melao le ditaelo tše Morena a di filego Baisraele ka Moshe, o tla atlega. O be le sebete, o tie, gomme o se ke wa boifa goba wa nolega moko. ₁₄Ge e le mabapi le Tempele gona, ke itapišitše ka kgobokanya gauta ya dikilokramo tše dimilione tše tharo le silibera ya dikilokramo tše dimilione tše masome a mararo gore di tle di šomišwe ge go agwa Tempele. Ntle le moo, go sa na le mphiri le tshipi ye ntši ye e ka se elwego. Le gona ke na le dikota le maswika, eupša o swanetše go di oketša. ₁₅O na le bašomi ba bantši: banna ba ba kago šoma kua meepong ya maswika, babetli ba maswika le ba dikota, le banna ba bantši ba ba kgonago dilo tša mehutahuta bao ba ka šomago ka ₁₆gauta, silibera, mphiri le tshipi. Bjale thoma modiro, gomme Morena a be le wena.”

₁₇Dafida a laela baetapele ka moka ba Israele gore ba thuše Solomone. ₁₈A re: “Morena Modimo wa lena o bile le lena gomme o dirile gore le be le khutšo ka gohle. O gafetše ditšhaba tše di bego di dula mo nageng ye diatleng tša ka, gomme bjale ditšhaba tšeo di fentšwe ke Morena le ke lena, setšhaba sa gagwe. ₁₉Bjale le ineeleng go Morena Modimo wa lena ka dipelo tša lena ka moka le ka moya wa lena ka moka. Thomang go aga ngwako wo mokgethwa wa Morena Modimo, gore le tle le tsenye Polokelo ya Kgwerano ya Morena gotee le dibjana tše dingwe tše kgethwa ka gare ga ngwako woo le tlago o agela go khunamela Morena ka go wona.”