1 DIKRONIKA 14

₁Kgoši Hiramo wa Tirose a roma batseta gore ba yo kwana le Dafida; a mo romela dikota tša mosedere le babetli gotee le babetli ba matlapa gore a ikagele ntlo, ₂ka gona Dafida a lemoga gore Morena o mo tiišeditše bogošing bja Israele, le gore o atlegiša mmušo wa gagwe ka lebaka la setšhaba sa Morena sa Israele.

₃Moo Jerusalema Dafida o ile a nyala basadi ba bangwe gape, gomme a ba le barwa le barwedi ba bangwe. ₄Gona moo a belegelwa bana ba ba latelago: Shamua, Shobabe, Nathane, Solomone, ₅Jibehara, Elishua, Elpelete, ₆Noga, Nefege, Jafia, ₇Elishama, Beeliada le Elifelete.

₈Ge Bafilista ba ekwa gore Dafida bjale o tloditšwe ya ba kgoši ya naga ka moka ya Israele, madira a bona ohle a tšwa go yo mo tsoma. Dafida a kwa taba yeo mme a tloga a yo gahlana le bona. ₉Bafilista ba fihla molaleng wa Barafa gomme ba ipeakanyetša ntwa moo. ₁₀Dafida a botšiša Modimo a re: “A ke hlasele Bafilista? A o tla ba gafela diatleng tša ka?”

Morena a mo fetola a re: “Ee, ba hlasele! Ke tla ba gafela diatleng tša gago!”

₁₁Bafilista ba ya Baale-Peratsime gomme Dafida a ba fenya moo. A re: “Modimo o gogotše manaba a ka ka seatla sa ka bjalo ka lefula.” Ka gona felo fao go bitšwa Baale-Peratsime. ₁₂Ge Bafilista ba tšhaba ba ile ba tlogela medimo ya bona ya diswantšho, gomme Dafida a laela gore e tšhungwe.

₁₃Bafilista ba boela molaleng mme ba ipeakanyetša ntwa gape. ₁₄Gapegape Dafida a botšiša Modimo, gomme yena a mo fetola a re: “O se ke wa ba hlasela o le mo, fela o ba potologe mme o itokišetše go ba hlasela o le kua mehlareng ya mekgokgopha. ₁₅Ge o ekwa mešito godimo ga mehlare, gona o hlasele, ka gobane ke tla be ke sepela pele ga gago go yo fenya madira a Bafilista.” ₁₆Dafida a dira se Modimo a mo laetšego sona, gomme a rakediša Bafilista go tloga Gibeone go ba go yo fihla Gesere. ₁₇Go tuma ga Dafida gwa tsebega nageng ye nngwe le ye nngwe, gomme Morena a dira gore ditšhaba tšohle di mmoife.