1 DIKRONIKA 10

₁Bafilista ba ile ba lwa le Baisraele thabeng ya Gilboa. Baisraele ba bantši ba bolawa moo, gomme ba ba šetšego ba tšhaba. ₂Eupša Bafilista ba rakediša Saulo le barwa ba gagwe, Jonathane, Abinadaba le Malkishua. ₃Moo go bego go le Saulo ntwa e be e le ye šoro, gomme ge boramesebe ba mmatamela mo ba kago mo thunya ka mesebe, a thothomela kudu. ₄A re go morwaladibetša wa gagwe: “Hwanyolla tšhoša ya gago o mphuleletše ka yona, gore Bafilista ba ba go se bolle ba se ke ba tla ba bapala ka nna.” Eupša morwaladibetša yoo a boifa kudu go ka dira taba yeo. Ka gona Saulo a tšea tšhoša ya gagwe ka boyena a itahlela godimo ga yona. ₅Ge morwaladibetša yoo a bona gore Saulo o hwile, le yena a itahlela godimo ga ya gagwe tšhoša mme a hwa. ₆Ka gona Saulo le barwa ba gagwe ka bararo ba hwa mmogo gomme ya ba mafelelofelelo a mmušo wa gagwe. ₇Ge Baisraele ba ba bego ba dula ka moeding wa Jesriele ba ekwa gore madira a tšhabile, le gore Saulo le barwa ba gagwe ba hwile, ba tlogela metse ya bona ba tšhaba. Bafilista ba tla ba dula go yona.

₈Ka letšatši le le latelago la ntwa Bafilista ba yo hula ditopo, gomme ba hwetša setopo sa Saulo le tša barwa ba gagwe di rapaletše thabeng ya Gilboa. ₉Ba mo apola diaparo tša gagwe tša ntwa, ba tšea hlogo ya gagwe le dibetša ba di romela ka batseta nageng ya Filistia ba di šikiša le naga, ba botša medimo ya bona ya diswantšho le batho ba gabobona gore Baisraele ba fentšwe. ₁₀Ba bea dibetša tša gagwe ka tempeleng ye nngwe ya bona, gomme ba kokotela hlogo ya gagwe ka tempeleng ya Dagone, modimo wa bona. ₁₁Ge batho ka moka ba Jabeshe kua Gileade ba ekwa se Bafilista ba se dirilego Saulo, ₁₂banna bohle ba bagale ba ya ba tšea setopo sa Saulo le tša barwa ba gagwe ba di tliša Jabeshe. Ba di boloka fao ka fase ga mohlare wa moeike, gomme ba ikona dijo matšatši a a šupago.

₁₃Lehu la Saulo le hlotšwe ke go se botegele Morena ga gagwe, a nyatša ditaelo tša gagwe, le gona a kile a nyaka keletšo go meoya ya bahu ₁₄bakeng sa gore a botšiše Morena. Ka gona Morena a mmolaya gomme mmušo a o fa Dafida, morwa wa Isai.