IsiLilo 2

₁Yeka ukwembesa kweNkosi indodakazi yaseSiyoni

amafu ngentukuthelo yayo.

Uphonsile ubuhle buka-Israyeli emhlabeni busuke ezulwini,

angasikhumbulanga isenabelo sezinyawo zayo

ngosuku lwentukuthelo yayo.

₂INkosi igwinyile onke amakhaya

kaJakobe ingahawukelanga.

Ngentukuthelo yayo, ibhidlizile izinqaba zendodakazi yakwaJuda,

yazidilizela emhlabathini,

yangcolisa umbuso nezikhulu zawo.

₃Yanquma ngokufutheka kolaka lwayo

zonke izimpondo zakwa-Israyeli,

yabuyisela emuva isandla sayo sokunene ebusweni bezitha,

yashisa uJakobe ngomlilo wamalangabi odla nxazonke.

₄Yansala umnsalo wayo njengesitha,

yema njengomelene nathi ngesokunene sayo,

yabulala konke okwakumnandi emehlweni ethu.

Etendeni lendodakazi yaseSiyoni yathulula ukufutheka kwayo njengomlilo.

₅INkosi isinjengesitha,

imgwinyile u-Israyeli;

yagwinya zonke izindlu zakhe zobukhosi,

yachitha izinqaba zakhe;

yandisile endodakazini yakwaJuda ukukhala nokulila.

₆Yachitha idokodo layo njengelensimu,

yaqeda indawo yayo yokuhlangana.

UJehova wenza ukuba kukhohlakale

imikhosi emisiweyo namasabatha eSiyoni,

wadelela ngokufutheka kolaka lwakhe inkosi nompristi.

₇INkosi yalilahla i-altare layo,

yanengwa yindlu yayo engcwele,

yanikela izingange zezindlu zayo zamakhosi esandleni sesitha.

Ziphakamise izwi endlini kaJehova njengasosukwini lomkhosi omisiweyo.

₈UJehova wayecebile ukuchitha ugange

lwendodakazi yaseSiyoni;

wawelula umucu wokulinganisa,

akabuyisanga isandla sakhe ekuchitheni;

wenza ukuba kukhale ugange nodonga,

kudangale kanyekanye.

₉Amasango alo ashona emhlabathini;

wachitha, wayaphula imigoqo yalo.

Inkosi nezikhulu zalo baphakathi kwezizwe,

lapho kungekho khona umthetho.

Nabaprofethi balo abatholi mbono kuJehova.

₁₀Amalunga endodakazi yaseSiyoni

ahlezi emhlabathini, athule;

athele uthuli emakhanda awo,

abhince indwangu yamasaka.

Izintombi zaseJerusalema zithobisela phansi amakhanda azo.

₁₁Amehlo ami ayaphela izinyembezi,

izibilini zami ziyaxhaphazela;

isibindi sami sithululelwe emhlabathini

ngenxa yokuchitheka kwendodakazi yabantu bami,

ngokuba izingane nabancelayo bayadangala ezigcawini zomuzi.

₁₂Bathi konina: “Aphi amabele newayini?”

lapho bedangala njengababulawayo ezigcawini zomuzi,

imiphefumulo yabo ithululelwe ezifubeni zawonina.

₁₃Ngingafakaza ngokuthini ngawe,

ngikufanise nani,

ndodakazi yaseSiyoni, na?

Ngingakulinganisa nani ukuba ngikududuze,

ntombi eyindodakazi yaseSiyoni na?

Ngokuba ukuchitheka kwakho kukhulu njengolwandle.

Ngubani ongakuphulukisa na?

₁₄Abaprofethi bakho bakubonele imibono eyize nobuwula;

abambulanga ukona kwakho ukuba babuyise ukuthunjwa kwakho.

Kepha bakubonele iziprofetho eziyize nezikhohlisayo.

₁₅Bonke abadlula ngendlela bakushayela ihlombe,

bancimfe, banikine amakhanda abo ngenxa yendodakazi yaseJerusalema ngokuthi:

“Yiwo lo muzi owawubizwa ngokuthi

ubuhle obupheleleyo nentokozo yomhlaba wonke na?”

₁₆Zonke izitha zikukhamisela umlomo wazo,

zincimfa, zigedla amazinyo, zithi:

“Siwugwinyile.

Impela yilo usuku esilulindele;

sesilufumene, silubonile.”

₁₇UJehova wenzile lokhu abekucebile;

uligcwalisile izwi lakhe,

ayeyale ngalo ezinsukwini zasendulo;

ubhidlizile engenasihawu,

wenza ukuba isitha sithokoze phezu kwakho,

waphakamisa uphondo lwabamelene nawe.

₁₈Izinhliziyo zabo zikhala eNkosini;

wena lugange lwendodakazi yaseSiyoni,

izinyembezi mazehle njengemifula imini nobusuku.

Mawungazivumeli ukuphumula,

inhlamvu yeso lakho ingayeki.

₁₉Vuka ukhale ebusuku ekuqaleni kwemilindo,

uthulule inhliziyo yakho njengamanzi phambi kobuso beNkosi;

phakamisa izandla zakho kuyo ngenxa yokuphila kwezingane

ezidangala ngendlala ezingosini zezitaladi zonke.

₂₀“Bheka, Jehova,

ubone ukuthi wenzile kanjalo kubani.

Abesifazane bayakudla yini izithelo zabo,

izingane eziphathiweyo kahle, na?

Abaprofethi nabapristi bayakubulawa endlini engcwele yeNkosi, na?

₂₁“Balele phansi ezitaladini,

abasha nabadala.

Izintombi zami nezinsizwa zami ziwile ngenkemba.

Wababulala ngosuku lwentukuthelo yakho,

wabulala ungahawukelanga.

₂₂“Wabiza njengasosukwini lomhlangano

izesabiso zami nxazonke;

akubangakho ngosuku lwentukuthelo

kaJehova owasindayo nowasalayo.

Labo engangibaphathile, ngabondla,

izitha zami zibaqedile.”