8¹Akwaba ubungumnakwethu,

nditsho owancanca kumama.

Bendiya kukuncamisa naphandle phaya,

ndize ndingagxekeki noko.

²Bendiya kukukhokela

ndikuse endlwini kamama,

yena wandifundisayo,

ndikuseze iwayini edidiyelwe ngezinongo

nencindi yeerharnati zam.

³Isandla sakho sasekhohlo besiya kuxhasa intloko yam,

esokunene sona sindiwole.

⁴Zintombi zaseJerusalem, ndiyanifungisa:

sanukuluxhokonxa ningaluphembeleli uthando;

luyekeni lude luzivukele ngokwalo.

Abatheleli

⁵Ngubani lo uvela ngasentlango,

uqhogene nesithandwa sakhe?

Umtshakazi

Ndakuvusa phantsi kom-apile,

apho wakhawulwa khona ngunozala wakho,

apho waba nenimba khona owakuzalayo.

⁶Mayibe ndim kuphela osentliziywemi yakho oku komsesane wokutywina;

ewe, mandibe ngumsesane wokutywina engalweni yakho.

Lent' uthando lunamandla nqwa nokufa;

ikhwele lalo aliqheliseli oku kwengcwaba.

Ludangazela ngathi lidangatye,

luvuthe ngathi ngumlilokazi.

⁷Alungecinywa nangamanzi;

alukhukuliseki naziimpuphuma.

Xa unokulithenga ngobutyebi bonke bendlu yakho

ungasuka ube sisigculelo.

Abatheleli

⁸Thina sinodade wethu;

akakantshuli namabele.

Kambe, singamenzela ntoni mhla acelwayo?

⁹Ukuba ke ebeludonga

ngesimakha abe yinqaba yesiliva.

Nokuba ngaba ebelisango

ngesimkhusela ngemivalo yomsedare.

Umtshakazi

¹⁰Ewe, mna ndiludonga;

la mabele ziinqaba.

Yiloo nto emehlweni akhe

ndingulowo umphathela ukwaneliseka.

¹¹USolomon unesidiliya eBhali-hamon;

uqeshise ngaso kubalimi.

Ngeziqhamo zaso bayarhuma:

liwaka leengqekembe zesiliva.

¹²Esam isidiliya sesam ke!

Iwaka lesiliva lelakho, Solomon.

Amakhulu amabini ngawabaqeshi.

Umyeni

¹³Wena ohlala emiyezweni,

osoloko engqongwe zizihlobo,

mandilive ilizwi lakho.

Umtshakazi

¹⁴Xhabasha, sithandwa sam!

Yiba ngathi ulinxala,

ube ngathi ulitakane lebhadi

kwezo ntaba zeziqholo.