UThixo umgwebi woluntu

94¹*Ndikhoyo, Thixo ongumgwebi,

wena Thixo ophindezelayo, zibonakalise.

²Lamla, wena mgwebi woluntu;

babuyekeze kwangezitya zabo abantw' abazingcayo!

³Koda kube nini na, Ndikhoyo,

koda kube nini kakade esivuyelela amatshijolo?

⁴Koda kube nini eqhayisa;

koda kube nini ezidla ngokungcola kwawo?

⁵Ayababulala abantu bakho, Ndikhoyo;

ayawucinezela umzi wakho amatshijolo.

⁶abandezele abahlolokazi neenkedama,

abulale nabantu basemzini.

⁷Ade athi: “Akaboni nto uNdikhoyo;

akaqondi konke uThixo kaYakobi.”

⁸Lumkani, bantundini bazizidenge!

Noda niqiqe nini, zityhifilindini?

⁹Nithini? Nithi uThixo owadala iindlebe akeva?

Nithi lo wenza amehlo enu akaboni?

¹⁰Lo ulawula zonk' iintlanga nithi akanakuzohlwaya?

Lo ufundise abantu nithi akazi nto?

¹¹Ulogocagoca iingcinga zabantu,

uyazi ukuba zibubuvuvu nje bodwa.1 Kor 3:20

¹²Unoyolo lowo uyalwa nguwe, Ndikhoyo;

nditsho ofundiswa nguwe umyalelo wakho.

¹³Umnika inzolo ngemihla yobubi,

lo gama amatshijolo ombelwa umhadi.

¹⁴Kaloku akayi kubafulathela abantu bakhe uNdikhoyo;

akasoze ayilahle indlu yakhe.

¹⁵Kobakho ubulungisa ezinkundleni,

abulandele onke amalungisa.

¹⁶Azi, ngubani owondilwela kumatshijolo?

Yoba ngubani na ongakum?

¹⁷Ukuba bendingancedwanga nguNdikhoyo,

ngesele ndikwantsonga-nyawana.

¹⁸Xa ndandisendisithi ndiyoyisakala,

wandixhasa ngezibele zakho wena, Ndikhoyo.

¹⁹Xa ndandinxubile, ndixhalabile,

wandithuthuzela, wandonwabisa wena.

²⁰Akunabudlelana nabalawuli abakhohlakeleyo,

bona bayenza umthetho intswela-bulungisa.

²¹Bayalihlanganyela ilungisa bona,

bamgwebele ukufa umnt' engenatyala.

²²Kodwa ngumkhuseli wam yena uThixo;

yinqaba endizimela ngayo.

²³UNdikhoyo wobohlwaya ngenxa yenkohlakalo yabo,

batshabalalele kobo bugwenxa babo;

wobabhangisa kuphele tu uThixo.

Ingoma yokubonga

95¹Yizani sombelele *uNdikhoyo,

simculele sigcobile umkhuseli nomsindisi wethu!

²Masiye kuye sinombulelo,

simombelele iingoma zokubonga.

³Kaloku uNdikhoyo nguThixo onamandla,

ngukumkani omkhulu *kwizithixo zonke.

⁴Lisesandleni sakhe ihlabathi liphela;

iinzulu neencopho zilawulwa nguye.

⁵Ulawula ulwandle kuba walwenza;

nomhlaba wawudala ngezandla zakhe.

⁶Yizani siqubude simnqule,

siguqe phambi koNdikhoyo umdali wethu,

⁷kuba yena nguThixo wethu.

Thina singumhlambi awalusayo,

iigusha ezondliwa nguye.

Namhla liveni ilizwi lakhe elithi:

⁸“Musan' ukuba neenkani,Hebh 3:15; 4:7 njengookhokho benu eMeribha,

njengemihla yaseMasa entlango,

⁹apho bandilingayo,Mfud 17:1-7; Ntlango 20:2-13

naxa babezibona izinto endandibenzela zona.

¹⁰Iminyaka emashumi mane bandikruqula,

ndada ndathi: ‘Hay' ukungeva kwabo;

abayithobeli imiyalelo yam.’

¹¹Ngoko ke ndafunga ngomsindo, ndathi:

‘Abasoze bangene ekuphumleni kwam.’ ”Ntlango 14:20-23; Hlaz 1:34-36; 12:9-10; Hebh 3:7-11; 4:3,5

IKumkani yeekumkani

(1 Gan 16:23-33)

96¹Mombeleleni ingoma entsha *uNdikhoyo!

Mombelel' uNdikhoyo, hlabathi lonke!

²Mombelelen' uNdikhoyo, nibonge igama lakhe;

zivakaliseni mihla le iindaba zakhe zosindiso.

³Zibaliseleni ngesihomo nesithozela sakhe iintlanga;

zixeleleni ngemimangaliso ayenzileyo zonke izizwe.

⁴Kaloku yingangalala uNdikhoyo, ufanelwe yimbeko enkulu;

ufanelwe kukoyikwa ngaphezu *kwezithixo zonke,

⁵kuba yimifanekiso nje izithixo zeentlanga,

kodwa yena uNdikhoyo wadal' oomazulu.

⁶Yena unobungangamsha nesithozela;

kukho isihomo nendili apho akhoyo.

⁷Mbongeni uNdikhoyo, nina bemi bomhlaba;

mbongeni kuba unewonga namagunya.

⁸Mnikeni imbeko efanele igama lakhe;

sondezani amadini, ningene endlwini yakhe.

⁹Mnquleni uNdikhoyo, yena unesihomo nesithozela;

malingcangcazele lonk' ihlabathi phambi kwakhe.

¹⁰Zixeleleni iintlanga ukuba uNdikhoyo nguKumkani;

nguye olizinzisayo ihlabathi, aliyi kugungqa;

nguye oya kubagweba ngobulungisa bonke abantu.

¹¹Gcobani, mazulu, lichwayite ihlabathi;

gquma, wena lwandle, nako konke okwakho;

¹²makayeyezele amadlelo nezinto ezikuwo;

mayombele imithi emahlathini;

¹³kuba uyeza uNdikhoyo;

uza kuligweba ihlabathi,

alilawule ngobulungisa,

azigwebe ngokomthetho izizwe.