Tshivenda 1998 (VEN98)
5
Muṱhannga:

51Inwi khaladzi anga, muselwa wanga,

ndo dzhena tsimuni yanga,

ndi khou kuvhanganya zwilungalungane na zwinukheleli,

ndi khou ḽa mutoli na tshigili,

ndi khou nwa waini na mukhaha.

Inwi dzikhonani, iḽani ni nwe

ni vhuye ni kambiwe nga lufuno.

Musidzana: Mihumbulo ya vhulaloni

2Ndo vha ndo eḓela,

hone mbilu yanga yó vuwa,

nda lora mufunwa wanga a tshi khou khokhonya vothi,

a ri, “Mmvuleleni khaladzi anga,

mufunwa wanga, ḽiivha ḽanga,

mufunwa wanga a si na tshiṱahe.

Ṱhoho yanga yo ṋukala nga ṅwando,

mavhudzi anga o ṋukadzwa nga khuli.”

3Nda lora ndi tshi fhindula nda ri,

“Ndo no ḓi bvula,

ndi nga dovha nda ambarelani?

Ndo no ṱamba milenzhe,

ndi nga dovha hani nda i shata tshika?”

4Mufunwa wanga a susumedza tshanḓa tshawe nga kubuli kwa vothi,

nda pfa mbilu yanga i tshi tou sinḓa nge a vha tsini.

5Nda mbo ḓi takuwa uri ndi vulele mufunwa wanga,

zwanḓa zwanga zwa ḓala zwinukheleli,

minwe yanga ya rotha zwiḓolo ndi tshi fara mukhothi wa vothi.

6Nda vulela mufunwa wanga,

nda wana o no rembuluwa, ó ṱuwa.

Mbilu yanga yo vha yo tou mbwandaa ndi tshi pfa a tshi amba.

Nda mu ṱoḓa nda si mu wane,

nda mu vhidzelela a si aravhe.

7

5:7
Luimbo. 3:3
Nda ṱangana na vhalindi vha muḓi vha tshi khou tandula,

vha mphula mbonzhe,

vhalindi vha mitsheṱo ya muḓi vha nnzhiela tshali.

8Inwi vhasadzi vha Jerusalema,

mpfulufhedziseni

uri arali na ṱangana na mufunwa wanga,

ni ḓo mu vhudza uri ndi khou fa nga lufuno.

Vhasadzi:

9Ri vhudzeni, inwi no nakaho u fhira vhasadzi vhoṱhe:

mufunwa waṋu u fhira vhaṅwe nga mini?

Tshi no ita uri mufunwa waṋu a si fane na vhaṅwe ndi tshini hezwi ni tshi ri ri ane?

Musidzana:

10Mufunwa wanga u a tamisa, u na nungo;

o raloho ndi muthihi kha vha zwigidi zwa fumi.

11Ṱhoho yawe i takadza unga musuku u songo vangwaho,

mavhudzi awe o swifhala sa funguvhu;

12maṱo awe a penya unga a maivha

e mulamboni u elaho;

a nga maivha o ṱambaho nga mukhaha,

a ima tsini ha tshisima;

13ṱhaha dzawe dzo naka unga tsimu yo ḓalaho miri ya mishonga

na zwilungalungane;

milomo yawe i nga phendephende;

i rotha zwiḓolo zwi no nukhelela;

14zwanḓa zwawe zwi nga zwo fhomiwa nga musuku

wo vanganaho na nungu dza mutengo muhulu;

muvhili wawe wo khwaṱha unga luṋanga lwa nḓou

lwo ṱamiwaho nga vhulungu ha denga;

15milenzhe yawe i nga phuphu dza mmabulu.

Dzó ingwa kha muteo wa musuku;

u na vhugala vhu no nga ha thavha ya Libanoni;

o ima unga mikedara;

16mulomo wawe a u ḓifhi zwone a tshi khisa;

u na zwoṱhe zwi takadzaho!

Inwi vhasadzi vha Jerusalema,

mufunwa wanga o tou ralo,

khonani yanga yo tou ralo!

6
Vhasadzi:

61Inwi no nakaho u fhira vhasadzi vhoṱhe, mufunwa waṋu o yafhi?

Ri vhudzeni uri o fara ifhio, ri ḓo ni ṱoḓisa.

Musidzana:

2Mufunwa o tsela tsimuni yawe,

o ya zwidimani zwa zwilungalungane;

u khou fulisa sambi ḽawe tsimuni,

u ita a tshi ka na phendephende.

3

6:3
Luimbo. 2:16
Mufunwa wanga ndi wanga fhedzi,

na nṋe ndi wawe fhedzi,

wa onoyo a no fulisa sambi ḽawe phendephendeni.

Solomoni a tshi ambisa musidzana:

4

6:4
Luimbo. 6:10
Mufunwa wanga,

no naka u fana na muḓi wa Thiritsa,

ni takadza unga Jerusalema,

ni na vhugala vhu no nga ha vhahali vho hwala tshiphuga.

5

6:5-7
Luimbo. 4:1-3
Ni songo nndavhelesa nga u ralo,

maṱo aṋu a a nnḓaḓisa;

mavhudzi aṋu a nga sambi ḽa mbudzi

dzi tshi tsa thavha ya Giliadi.

6Maṋo aṋu o tshena unga sambi ḽa phwidzi

dzi tshi kha ḓi bva u ṱamba;

dzoṱhe dzi dzwala mafhaṱa,

a hu na i no tshedza.

7Ṱhaha dzaṋu dzo tswuka unga thungulu

hezwi no khurumela.

Muṱhannga:

8Vhamusanda vha na vhafumakadzi vha mahumi maṱanu na ḽithihi,

na vhasadzi vha mahumi maṱanu na mararu,

na vhasidzana vha si na mbalo,

9hone nṋe ndi funa muthihi fhedzi;

o naka unga ḽiivha,

ha na tsho ṱahelaho;

ndi ene musidzana e eṱhe wa mme awe,

ndi ene a funeswaho nga mme awe;

vhasidzana vhoṱhe vha a mu sedza vha mu khoḓa,

vhafumakadzi na vhasadzi vha a mu renda.

Vhasadzi vha tshi vhona muṱhannga:

10

6:10
Luimbo. 6:4
Ndi nnyi uyu ane u tshi mu sedza a nga ḓuvha ḽi tshi bva,

o naka sa ṅwedzi,

u penya sa ḓuvha ḽi kombodzaho,

u na vhugala vhu no nga ha vhahali vho hwala tshiphuga?

Musidzana:

11

6:11
Luimbo. 7:13
Ndo vha ndo tsela tsimuni ya miri ya thebvu

u yo vhona miri i fhufhumisaho ngei govhani,

na minḓirivhe i tshi kulukusha,

na miri i titimaho i tshi ṱuma lurere.

12Ndo ri ndi sa athu ḓivha tshithu nda tshenuwa ndo hwalwa

nga gariki ya musanda!

Vhasadzi:

13Vhuyani, vhuyani,

inwi musidzana wa Shulamu!

Vhuyani, vhuyani,

ri ni ṱalele!

Musidzana:

Ndi mini ni tshi ṱalela musidzana wa Mushulamu,

a tshi nga u khou tshina vhukati ha vhaṱaleli?

7
Solomoni:

71Ṋayo dzaṋu dzo naka hani

dzó ambara navhula, inwi mukololo!

Zwirumbi zwaṋu zwo vhumbwa unga vhulungu,

wone mushumo wa mutsila makone!

2Mukombo waṋu u nga ndilo ya tshikulungu

i no dzula i na waini yo vangwaho;

tshiḽelo tshaṋu tshi nga thulwi ya goroi

yo tangwaho nga phendephende;

3maḓamu aṋu a nga tholo mbili,

a nga tshephe dza mafhaṱa;

4

7:4
Luimbo. 4:5
mutsinga waṋu u nga thawara ya ṋanga dza nḓou;

maṱo aṋu a penya

unga maisha a muḓi wa Hesheboni

tsini ha khoro ya muḓi hoyo muhulu;

ningo yaṋu yo naka unga muṱumba wa Libanoni

yo lavhelesanaho na Damasko;

5ṱhoho yaṋu yo ni nakisa unga thavha ya Kharamele;

mavhudzi aṋu a nembelelaho a nga muridili,

u naka hao ho fasha khosi!

6Iwe lufuno, wo naka hani!

U takadza u fhira zwoṱhe zwi tamisaho.

7Mufunwa wanga,

no ima unga mutshevho;

maḓamu a nga khula dzawo.

8Ndi ri ndi ḓo gonya mutshevho nda fula mitshelo yawo!

Ngavhe maḓamu aṋu a tshi nga tshiṱokola tsha munḓirivhe,

mufemo waṋu u nukhelelaho u ḓifha

wa nga maapula,

9mulomo waṋu wa nga waini i ḓifhaho ndi tshi ni khisa.

Musidzana:

Aiwa, waini nga i ele i tshi ya ha mufunwa wanga!

I elele kha milomo yawe na kha maṋo awe!

10Nṋe ndi wa mufunwa wanga,

na ene u ṱulutshela nṋe fhedzi!

11Iḓani mufunwa wanga,

nga ri bve ri ye masimuni,

ḽi tshe ri miḓini!

12Ri ḓo fhindutshela masimuni a minḓirivhe,

ra vhona arali yo no ṱuma lurere,

arali yo no kulukusha,

arali miri yo no fhufhumisa;

ndi hone hune nda ḓo ni ṋea tshifhiwa tsha lufuno lwanga.

13

7:13
Luimbo. 6:11
Marumbuḓane a nukhelela u ḓifha,

mitshelo i si nongo vha hone i muṋangoni washu.

Mufunwa wanga,

ndo ni vhulungela yone –

miswa na ya kale.