Phusukanya maswina ashu!
Tshirendo tsha Dafita tshe a sikela malogwane musi Saulo o ruma vhathu u mu lalela hayani hawe vha mu vhulahe. Tshi pfi tshi imbiwe nga kuimbele kwa luimbo lu ro ri, “U si lozwe!”
Maswina a lalelaho
1Mudzimu wanga,
nndamulele kha maswina anga,
ntsireledze kha vhane vha mmvutshela!
2Nndamulele kha vhaitazwivhi,
ntshidze kha vha no fhaladza malofha!
3Khevha Muṋe washu, vho nndalela,
vha ṱoḓa u mmbulaha,
vhahali vha vho nnzhena nga pfumo ndi si na tshe nda tshinya,
ndi si na tshe nda khakha.
4Vha nthathedza,
vha ṱoḓou nnzhongondedza
ndi si na vhuvhi.
Muṋe washu, takuwa!
Ima na nṋe u sedze zwine nda itwa.
5Muṋe washu,
Mudzimu Ramaanḓaoṱhe,
Mudzimu wa Israele,
vuwa u kaidze tshakha dzoṱhe!
U songo vhuya wa khathutshela
zwifheṱi zwanga hezwi!
6Vha vhuya nga madekwana vha tshi vhuvhula unga mmbwa,
vha mona-mona na muḓi.
7Vha phukhula bulo,
vho khuba mapanga nga milomo,
vha ri, “Ri ḓo pfiwa nga nnyi?”
U kunda nga fulufhelo
8Hone Iwe Muṋe washu u a vha sea,
tshakha dzoṱhe u tamba ngadzo.
9Nṋe ndo fulufhela Iwe,
maanḓa anga ndi Iwe;
iwe Mudzimu u vhushavhelo hanga.
10Mudzimu u a fulufhedzea, u khou ḓa,
u ḓo mpfarisa nda kunda maswina anga.
11Muṋe wa zwoṱhe,
u songo mbo ḓi vha vhulaha,
vhathu vhanga vha sa ḓo mbo ḓi hangwa,
vha balanganye nga maanḓa au u vha wisele fhasi,
Iwe tshiṱangu tshashu.
12Kha vha fashwe nga u ḓihudza havho;
vha bula zwivhi,
vha tshinya nga maipfi avho,
vha a nteketela vha dovha vha nnzwifhelela.
13Vha lozwe nga mbiti dzau,
vha fhedze vha si tsha vha hone,
zwi ḓivhee uri Mudzimu u hone a no vhusa Jakopo,
na ḽifhasi u swika he ḽa guma.
14Vha vhuya nga madekwana vha tshi udza unga mmbwa.
15Vha mona-mona vha tshi ṱoḓa zwiḽiwa,
vha ri u sa fura, vha huvha.
Thendo
16Hone nṋe ndi ḓo renda maanḓa au,
ḽi tshi tsha ndi ḓo fhululedza vhuthu hau;
wo ḓi vha vhushavhelo hanga,
wa ntsireledza musi wa khombo.
17Maanḓa anga ndi Iwe,
ndi ḓo u renda nga nyimbo.
Iwe Mudzimu u vhushavhelo hanga,
Mudzimu wanga,
lufuno lwau a lu dzinginyei.
