DZIPHISALEMA 51

₁Mudzimu, nkhathutshele,

hufha lufuno lwau lu sa dzinginyei.

Tshilidzi tshau hufha tshi tshihulu,

ṱanzwa vhutshinyi hanga;

₂ṱanzwa vhuvhi hanga vhu fhele tshoṱhe,

ndi bve tshika dza zwoṱhe zwe nda khakha.

₃Zwe nda tshinya ndi a zwi ḓivha,

na zwe nda khakha a thi koni u zwi hangwa.

₄Ndo u khakhela,

ndo khakhela Iwe u woṱhe,

ndo ita zwi u nengisaho.

Ndi zwine u tshi nkhaṱhula wa si khakhe,

u tshi nndaṱa zwa vha zwo tea.

₅Nṋe ndo bebwa ndi muvhi;

mme anga a tshi nṱanganedza muvhilini

ndo vha ndi tshi ḓi vha mukhakhi.

₆Iwe u tama mbilu ya muthu i tshi vha na ngoho,

mpfunze vhuṱali,

mbilu yanga i kame ngaho.

₇Nkhandulule nga muhisopo ndi kune,

nṱanzwe ndi tshene u fhira mahaḓa.

₈Kha ndi pfe ndo takala ndi pembele,

marambo e wa a vunḓekanya nga a tshine.

₉U songo tsha sedza zwe nda tshinya,

thutha vhuvhi hanga hoṱhe.

₁₀Yawee, Mudzimu,

ntsikele mbilu yo ṱambaho!

Ngomu hanga u longe muya muswa u fulufhedzeaho.

₁₁U songo nthudzela kule na Iwe,

u songo nnzhiela Muya Mukhethwa wau.

₁₂Kha ndi dovhe ndi takale nga u ḓivha uri wo ntshidza,

u ntike nga muya u takalelaho u ita zwine wa funa.

₁₃Ndi hone ndi tshi ḓo funza vhatshinyi nḓila dzau,

vhakhakhi vha konou humela ha Iwe.

₁₄Mudzimu, mmbofholole kha mulandu wa u shulula malofha,

Iwe Mudzimu Mutshidzi wanga.

Ndi hone lulimi lwanga lu tshi ḓo fhululedza zwe wa ntshidza.

₁₅Muṋe wa zwoṱhe,

vula mulomo wanga

ndi kone u u renda.

₁₆Hufha u sa takadzwi nga zwiṱhavhelo;

nda u ṋekedza nduvho yo fhiswaho ndi nga si u takadze.

₁₇Tshiṱhavhelo tshi takadzaho Mudzimu

ndi u ṱungufhala nga mulandu wa vhutshinyi hau;

Iwe Mudzimu a u nyadzi mbilu yo pwashekanaho,

i ḓiṱukufhadzaho.

₁₈Tonda Tsioni u u itele vhuthu,

dovha u vuse mitsheṱo ya Jerusalema;

₁₉ndi hone u tshi ḓo takadzwa nga zwiṱhavhelo zwo teaho:

nga nduvho dzo fhiswaho,

ha ḓo konou ṋekedzwa mbohwana aḽiṱarini yau.