DZIPHISALEMA 48

₁Muṋe washu ndi muhulwane,

thendo khulu nga i ye khae musanda wa Mudzimu washu,

thavhani yawe khethwa.

₂Yo ri u naka, ya ri u lapfa,

ya ḓisa dakalo shangoni ḽoṱhe.

Thavha ya Tsioni ngeiḽaa devhula,

wone musanda wa Khosi khulu.

₃Mudzimu u dzula pfamoni dzawo,

u ḓihwa e dzhavhelo ḽawo.

₄Vhonani mahosi o kuvhangana,

vho ḓa u ri dia.

₅Vho ri u u vhona zwa vha somela,

vha dzhenwa nga nyofho vha shavha vha tshi tou fhufhura nḓevhe.

₆Henefho vha thoma u tetemela nga nyofho,

vha kulea nungo unga musadzi a tshi ṱoḓou vhofholowa,

₇zwa nga zwiḽa u tshi pwashekanya

zwikepe zwa Tharashishi

nga maḓumbu a vhubvaḓuvha.

₈Zwe ra zwi pfa

ndi zwenezwo zwe ra zwi vhona nga ashu maṱo

musanda wa Muṋe washu Ramaanḓaoṱhe,

musanda wa Mudzimu washu:

u ḓo u tika lini na lini.

₉Mudzimu,

ro humbula lufuno lwau lu sa tseki

rí ngomu thembeleni yau.

₁₀Mudzimu, dzina ḽau ndi ḽihulu,

na thendo i yaho ha Iwe ndi khulu,

i swika na mugumoni wa shango.

Tshanḓa tshau tsha maanḓa tshi ita zwivhuya fhedzi.

₁₁Thavha ya Tsioni nga i takale,

vhananyana vha Juda nga vha pembele;

wo ri lamulela nga khaṱhulo yau.

₁₂Tshimbilani Tsioni, monani nawo,

vhalani thawara dzawo,

₁₃sedzani mitsheṱo yo u tangaho,

tandulani madzhavhelo awo,

ni ḓo konou vhudza vhana vhaṋu,

na ri,

₁₄“Hoyu ndi Ene Mudzimu,

Mudzimu washu wa lini na lini;

u ḓo ri endedza ra vhuya ra fa.”