DZIPHISALEMA 45

₁Mbiluni yanga hu ela maipfi a u naka,

luimbo lwanga ndi lu sikela khosi,

lulimi lwanga ndi muthenga wa muṅwali makone.

₂Wo naka u fhira vhathu vhoṱhe,

u tshi zwa hu pfala maḓifha fhedzi;

ndi zwe Mudzimu a u shudufhadza lini na lini.

₃Muhali, kungela pfumo!

Wo ambara vhugala na lupenyo.

₄Namela u kunde nga vhugala hau,

lwela ngoho u tsireledze vhaheḓana;

nungo dzau dzi ḓo shuma zwi ofhisaho.

₅Misevhe yau yo ṱuṱulwa,

kha i pfule mbilu dza maswina au,

u vhuse dzitshakha.

₆Khuluṋoni yau ndi ya Mudzimu,

i ḓo ima lini na lini.

Luḓo lwau lwa vhuhosi wo lu fara nga u fulufhedzea.

₇U funa khaṱhulo mbuya wa vhenga vhuvhi,

ndi zwe Mudzimu,

a re Mudzimu wau,

a u tela zwone,

wa takala u fhira thanga dzau dzoṱhe.

₈Vhupila hau hoṱhe vhu nukhelela zwiḓolo

zwa mere na bindamutshe na khinamoni;

u takadzwa nga nyimbo dzi pfalaho pfamoni

dzo ṱamiwaho nga ṋanga dza nḓou;

₉vhaṱanuni vhau ndi vhana vha mahosi,

thungo ya tshauḽa tshau ho ima ene mufumakadzi

ó ambara dza musuku wa Ofiri.

₁₀Edzou pfa iwe muselwa,

thetshelesa ndi u vhudze!

Hangwa vha hau na nnḓu ya khotsi au.

₁₁Thovhele u takadzwa nga lunako lwau;

ndi muṋe wau, mu luvhe!

₁₂Vhathu vha Tiro vha ḓo u ḓisela nduvho,

ha ḓa vhone vhapfumi vha lushaka vha u unga uri u vha fune.

₁₃Muselwa u pfamoni yawe,

ndi mukololo, o naka hani!

Tshifuko tshawe tsho ṱamiwa nga musuku.

₁₄U iswa ha thovhele o ambara maṱeleṱele.

U tevhelwa nga pheletshedzi dzawe dza dzikhomba,

vha ḓiswa ha iwe.

₁₅Vha endedzwa nga dakalo na maseo

vha tshi dzhena pfamoni ya thovhele.

₁₆Thovhele nga a vhe na vhana vhane vha ḓo vhumbwa vhuhosi

unga vhomakhulukuku wau;

u ḓo vha vhea vha vhusa shango ḽoṱhe.

₁₇Ndi u renda nga nyimbo uri mirafho yoṱhe i si u hangwe,

tshakha dzi u rende lini na lini.