Tshivenda 1998 (VEN98)
43

U endedzwa nga tshedza tsha Mudzimu na ngoho yawe

431Mudzimu, ntsengele u ime na nṋe

musi ndi tshi lwa na mashandukwa,

ndi ponyoke vhalevhi vha vhufhura!

2Mudzimu,

vhushavhelo hanga ndi Iwe;

u nndaṱelani?

Ndi mini ndi tshi enda ndo ṱungufhala

ndi tshi kandeledzwa nga maswina anga?

3

43:3
Ps. 76:2
Kha ndi endedzwe nga tshedza tshau na ngoho yau,

zwi ntswikise thavhani yau khethwa hune wa dzula.

4Ndi hone ndi tshi ḓo ya aḽiṱarini ya Mudzimu,

nda swika ha Mudzimu,

Ene dakalo ḽanga,

Ene Mufhululedzwa.

Ndi ḓo u renda nga haripa,

Iwe Mudzimu,

Mudzimu wanga.

5Wo ṱungufhalelani, iwe muya wanga?

Ndi mini u sa ruli?

Lindela Mudzimu,

ndi ḓo dovha nda mu renda,

Ene Mudzimu wanga a ntshidzaho!

44

Thabelo ya lushaka ya u humbela u lamulelwa

Luimbo lwa vhana vha Kora lwe vha sikela malogwane.

Maḓuvha aḽa a vhugala

441

44:1-2
Josh. 24:11-12
Vhokhotsi ashu vho ri vhudza;

ro zwi pfa nga dzashu nḓevhe

zwe Iwe Mudzimu wa ita vha tshi kha ḓi tshila,

misi iḽa ya kale:

2Wo thatha dzitshakha nga tshau tshanḓa,

vhudzuloni hadzo ha dzula vhone.

Dzitshakha wo dzi kula nungo ha vha u vhofholola vhone.

3A vho ngo wana shango nga ḽavho pfumo,

a vho ngo kunda nga tshavho tshanḓa;

ndi nga maanḓa au na tshanḓa tshau,

ndi nga lupenyo lwa tshifhaṱuwo tshau,

nge wa vha takalela.

4Iwe u Khosi yanga,

u Mudzimu wanga;

ita uri Jakopo a kunde.

5Ri dida maswina ashu nga Iwe,

vha ri levhelaho ri vha kandekanya nga dzina ḽau.

6

44:6
Ps. 20:7
A si vhura hanga vhune nda vhu fulufhela,

na pfumo ḽanga ḽi nga si ntshidze;

7ndi Iwe wo ri tshidzaho zwanḓani zwa maswina ashu,

wa shonisa vhane vha ri vhenga.

8Ri ḓo dzula ri tshi zuwa Mudzimu,

ra mu livhuha lini na lini.

Misi ino ya khombo

9Huno zwino wo ri laṱa, wa ri shonisa.

Ri tshi bva pfumo a u tsha ri fhelekedza.

10Wo ita uri ri shavhe swina

ri vhuye ri tshi fhufhura nḓevhe;

maswina a thuba zwe zwa vha zwi zwashu.

11

44:11
Esek. 5:12
Wo tenda vha tshi ri ṱhavha unga nngu,

wa ri balanganya na mashango.

12Wo rengisa vhathu vhau nga mutengo u si gathi,

wa vha ita zwithu zwi si na mutengo.

13

44:13-14
Ps. 79:4
Vhahura vhashu vha ri holedza,

vha ri sea vha tshi vhona zwe wa ri ita.

14Wo ri nyadzisa nga dzitshakha ra vho tou vha ṱano.

15Ḓuvha ḽoṱhe ndi ṱwa ndi tshi kolelwa,

tshifhaṱuwo tshanga tsho tibwa nga ṱhoni

16nga u pfa u goḓwa na maṱamba a maswina

na vha no ṱoḓa u lifhedza.

“Wo ri laṱelani?”

17Zwoṱhe hezwo zwo ri wela naho ri songo u hangwa

kana ra shandukela mulanga wau.

18Mbilu dzashu a dzo ngo u furalela,

na milenzhe yashu a yo ngo pambuwa nḓilani yau.

19

44:19
Ps. 74:3
Zwililo 5:18
Wo ri sia ri tshi takanyea vhukati ha dziphunguhwe,

wa ri tiba nga swiswi ḽihulu ḽa tou bodo.

20Arali ro vha ro hangwa dzina ḽa Mudzimu washu,

ra luvha muṅwe mudzimu,

21Mudzimu o vha a si nga zwi ḓivhi naa?

Hufha a tshi ḓivha zwiphiri zwi re mbiluni.

22

44:22
Rom. 8:36
Ri tshi ṱwela u vhulawa ri vhulahelwa Iwe,

ri tshi vhalwa sa nngu dzi no khou ya u ṱhavhiwa.

23

44:23
Ps. 121:4
Muṋe wa zwoṱhe,

ndi mini u tshi kuvhama?

Wá vuwaa!

Vuwa! U songo ri laṱa tshoṱhe!

24Ndi mini u tshi tsinya iṱo?

Khezwi u sa londi u tambudzwa hashu

na u kandeledzwa hashu?

25Ro wela fhasi ra tou tsumbudzwa buseni,

thumbu dza tou phashaa mavuni!

26Takuwa u ḓe u ri phalale!

Ri tshidze!

Hufha lufuno lwau lu sa dzinginyei.

45

Mbingano ya khosi

Luimbo lwa vhana vha Kora lwa u imbela lufuno, lwe vha sikela malogwane; lu pfi lu imbiwe nga kuimbele kwa luimbo lune lwa ri “Phendephende”.

Vhugala ha khosi

451Mbiluni yanga hu ela maipfi a u naka,

luimbo lwanga ndi lu sikela khosi,

lulimi lwanga ndi muthenga wa muṅwali makone.

2Wo naka u fhira vhathu vhoṱhe,

u tshi zwa hu pfala maḓifha fhedzi;

ndi zwe Mudzimu a u shudufhadza lini na lini.

3Muhali, kungela pfumo!

Wo ambara vhugala na lupenyo.

4

45:4
Ps. 72:1-2
Namela u kunde nga vhugala hau,

lwela ngoho u tsireledze vhaheḓana;

nungo dzau dzi ḓo shuma zwi ofhisaho.

5Misevhe yau yo ṱuṱulwa,

kha i pfule mbilu dza maswina au,

u vhuse dzitshakha.

6

45:6-7
Ps. 2:6
Heb. 1:8-9
Khuluṋoni yau ndi ya Mudzimu,

i ḓo ima lini na lini.

Luḓo lwau lwa vhuhosi wo lu fara nga u fulufhedzea.

7U funa khaṱhulo mbuya wa vhenga vhuvhi,

ndi zwe Mudzimu,

a re Mudzimu wau,

a u tela zwone,

wa takala u fhira thanga dzau dzoṱhe.

8Vhupila hau hoṱhe vhu nukhelela zwiḓolo

zwa mere na bindamutshe na khinamoni;

u takadzwa nga nyimbo dzi pfalaho pfamoni

dzo ṱamiwaho nga ṋanga dza nḓou;

9vhaṱanuni vhau ndi vhana vha mahosi,

thungo ya tshauḽa tshau ho ima ene mufumakadzi

ó ambara dza musuku wa Ofiri.

Zwo fanelaho muselwa

10Edzou pfa iwe muselwa,

thetshelesa ndi u vhudze!

Hangwa vha hau na nnḓu ya khotsi au.

11Thovhele u takadzwa nga lunako lwau;

ndi muṋe wau, mu luvhe!

12Vhathu vha Tiro vha ḓo u ḓisela nduvho,

ha ḓa vhone vhapfumi vha lushaka vha u unga uri u vha fune.

13Muselwa u pfamoni yawe,

ndi mukololo, o naka hani!

Tshifuko tshawe tsho ṱamiwa nga musuku.

14U iswa ha thovhele o ambara maṱeleṱele.

U tevhelwa nga pheletshedzi dzawe dza dzikhomba,

vha ḓiswa ha iwe.

15Vha endedzwa nga dakalo na maseo

vha tshi dzhena pfamoni ya thovhele.

Khosi i tshi fulufhedziswa vhana

16Thovhele nga a vhe na vhana vhane vha ḓo vhumbwa vhuhosi

unga vhomakhulukuku wau;

u ḓo vha vhea vha vhusa shango ḽoṱhe.

17Ndi u renda nga nyimbo uri mirafho yoṱhe i si u hangwe,

tshakha dzi u rende lini na lini.