DZIPHISALEMA 35

₁Muṋe washu,

imedzana na vha nthomaho,

ilwa na vha lwaho na nṋe.

₂Fara tshiṱangu na philelo,

u ḓe u nndamulele.

₃Ṱomola pfumo ḽau na tsanga u thivhele vha ntovholaho.

Amba na nṋe u ri, “Ndi mutshidzi wau.”

₄Vhane vha ṱoḓa u ḽa ṱhoho yanga

kha vha shone vha tou niwa nga ṱhoni.

Vhalaleli vhanga vha humise vha tshi tou fhufhura nḓevhe.

_5-6Nga vha nge mungu

u hwalwaho nga ḓumbu

vha tshi vhilimedzwa nga Muruṅwa wa Muṋe washu,

nḓila yavho nga i tou nzwii, i redze.

₇Vho nthea nga mambule ndí songo vha levhela,

vha ita na u mmveela khunḓa ndi si na tshe nda tshinya.

₈Nga vha tshenuwe vho lozwiwa,

mambule a fashe murei,

khunḓa i fashe muvei.

₉A vha nṋe, ndi pembelela Muṋe washu,

ndi a takala, o ntshidza.

₁₀Ndi amba nga mbilu yanga yoṱhe,

ndi ri:

Muṋe washu, ndi nnyi ane a nga Iwe?

U lamulela muheḓana kha wa maanḓa,

mutshinyali wa mu lamulela

zwanḓani zwa muṱanguli.

₁₁Ndi zwifhelelwa nga vhalevhi;

ndi sengiswa zwine ndi si zwi ḓivhe;

₁₂vha lifhedza zwivhuya nga zwivhi;

a thi tshee na ṱhama.

₁₃Hone vhone vha tshi lwala o vha lilisaho ndi nṋe,

nda ḓiṅala nda ḓidzima zwiḽiwa,

nda rabela ndo kotama,

₁₄zwa nga ndi rabelela khonani kana murathu,

nda ṱungufhala nda tshimbila ndo kotama,

ndó hasha milora ṱhohoni,

nda nga muthu a lilelaho mme awe.

₁₅Zwino nṋe ndó wela-vho khomboni vha nkuvhanganela vha ntsea.

Ndi vho nzhonzhowedzwa nga mifhafhara i sa ḓivhalei,

vha ntsasaladza vha dovha.

₁₆Vha mmbaisa nga u nkholedza vha dovha,

vha tshi tou ntshenganyela na maṋo.

₁₇Muṋe wa zwoṱhe,

u ḓo sokou ṱanzwa maṱo

wa lavhelesa u swika lini?

Nndamulele kha vha nndevhelaho,

u mponyokise mulomoni wa i ḽaho.

₁₈Ndi hone ndi tshi ḓo u livhuha

ho kuvhangana tshivhidzo tshoṱhe,

nda u khoḓa magogo a tshi zwi pfa.

₁₉Maswina anga a sokou mmbenga;

u songo a litsha a tshi ḓiphiṋa nga nṋe;

u songo tenda vha tshi sinyedzana nga u vhona khombo yanga.

₂₀A vha ṱoḓi mulalo,

tshavho ndi u luka maano a u pomoka vhadziamulalo.

₂₁Vha nkholedza vha ri,

“Ahaa, ahaa,

ro zwi vhona nga ashu maṱo!”

₂₂Iwe Muṋe washu,

u songo tsha fhumula wó zwi vhona!

Muṋe wa zwoṱhe, u songo nndaṱedza!

₂₃Takuwa u nndamulele Mudzimu wanga!

Muṋe wa zwoṱhe, ima na nṋe!

₂₄Mudzimu Muṋe wanga,

hufha u muhaṱuli muvhuya,

u songo vhuya wa tenda vha tshi ntshonedza,

₂₅vha tshi ri, “Koṱo, koṱo, ro kona!”

kana vha ri,

“A ro ngo zwizwiedza-ha!”

₂₆Ngavhe vhane vha takalela u tambula hanga

vha tshi shona vha nyadziwa.

Vhenevho vha u ḓihudza vha amare ṱhoni vha nyadzee.

₂₇Avho vhane vha ntsengela

nga vha takale vha fhululedze

vha ri, “Muṋe washu ndi muhulwane!

Ene u takalela zwi tshi nakela mulanda wawe!”

₂₈Ndi hone ndi tshi ḓo ḓivhadza vhuvhuya hau,

nda u renda ḓuvha ḽoṱhe.