DZIPHISALEMA 22

₁Mudzimu wanga, Mudzimu wanga,

wo nndaṱelani?

Na u gomela hanga khe u sa ntshidzi?

₂Yawee Mudzimu wanga,

masiari ndi vhidzelela u si nnyaravhe,

vhusiku nda lila wa si nnyawedze.

₃Hufha Iwe u mukhethwa,

khuluṋoni yau i thendo dza Israele.

₄Vhokhotsi ashu vho vha vha tshi ḓitika nga Iwe,

vho fulufhela Iwe, Iwe wa vha tshidza;

₅vho u ṱavhela mukosi,

Iwe wa vha phalala;

a vho ngo sokou u fulufhela vha fhedza vha shona.

₆A vha nṋe, a thi tshee muthu,

ndi tou vha mbungu;

ndi goḓwa nga vhathu,

vhoṱhe vha a nnyadza.

₇Vhoṱhe vhane vha mmbona vha a nkolela,

vha sokou nkongomedza vha dzungudza dziṱhoho;

₈vha ri, “Mafhungo awe o a kumedza Yahavee,

zwino nga' mu tshidze-ha,

nga' mu lamukise-ha vhunga a tshi mu funa!”

₉Ndi Iwe we wa nṋula thumbuni ya mme anga,

wa nthudza mbilu nga maḓamu avho.

₁₀Ndi tshi bebwa ndo ḓi tou kumedzwa Iwe,

tshee nda bebwa Mudzimu wanga o ḓi vha Iwe.

₁₁U songo nṱutshela,

khakhathi i tou vha muṋangoni;

a hu na muṅwe ane a nga mpfarisa.

₁₂Ndo tingwa nga mboho nnzhi,

maboho a Bashani o ntangela ngomu.

₁₃Ndo ita na u semelwa maṋo,

unga ndau i vhombaho i tshi khou ponda.

₁₄Ndo tou tevhulelwa kule sa maḓi,

na zwiendanungo zwanga zwo lunguluwa;

mbilu yanga yo ṋoka sa phula,

yo tou pwaṱa ngomu khanani yanga.

₁₅Maanḓa anga o fhela,

ndo no tou vha gamba,

lulimi lwanga lwo nambatela marenuni,

Iwe u ntsumbudza buseni nda nga mufu.

₁₆Mmbwa na dzone dzo ntinga,

ndo thathedzwa nga tshigwada tsha vhavhi,

vho rumbula zwanḓa zwanga na ṋayo dzanga,

₁₇na mbabvu dzanga dzi nnḓa;

vha tou zwondolola vhe koṱo,

₁₈vha kovhekana zwiambaro zwanga,

lupila lwanga lwone vha lu itela mamvaṱe.

₁₉Zwino-ha Iwe Muṋe washu,

u songo ima ngeo kule,

ṱavhanya u mpfarisa Iwe maanḓa anga!

₂₀Nndamukise ndi si rungwe nga pfumo;

nda vhulawa nga dzimmbwa ndi nga dovha nda tshila naa?

₂₁Nndamukise mulomoni wa i ḽaho,

vhunga wo ntshidza ndí ṋangani dza ṋari!

₂₂Vha hashu ndi ḓo vha anetshela zwe wa nnyitela;

ndi ḓo u renda tshivhidzo tsho kuvhangana.

₂₃Rendani Muṋe washu inwi ni mu ofhaho,

mu huliseni inwi vhana vha Jakopo,

tetemelani Ene noṱhe vhana vha Israele;

₂₄ho ngo nyadza muheḓana,

vhushai hawe ho ngo vhu nengwa,

ho ngo mu furalela,

o mu pfa a tshi mu lilela.

₂₅Ndi tshi u renda tshivhidzoni tshihulu ndi vha ndo tou ṋewa nga Iwe;

zwe nda u anela ndi ḓo zwi ita vha u ofhaho vha tshi zwi vhona.

₂₆Vhaheḓana vha ḓo ḽa

vha fura zwiṱhavhelo;

Muṋe washu u ḓo rendwa nga vha mu ṱoḓaho;

ngavhe ni tshi ḓi khwaṱha lini na lini.

₂₇Ḽifhasi nga he ḽa guma ḽi ḓo mu elelwa,

ḽi ḓo rembulutshela ha Muṋe washu;

tshakha dzoṱhe dza shango dzi ḓo mu gwadamela.

₂₈Muvhuso ndi wa Muṋe washu;

muvhusi wa dzithakha ndi Ene.

₂₉Madendele a ḽifhasi

a ḓo ḓa-vho munyanyani wawe

a mu gwadamela,

na vhoṱhe vha re tsini na u fa,

vha sa koni u ḓitshidza,

vha ḓo gwadama phanḓa hawe.

₃₀U ḓo shumelwa na nga zwiḓuhulu;

Muṋe wa vhoṱhe u ḓo anetshelwa mirafho i ḓaho.

₃₁Vhuvhuya hawe vha ḓo vhu ḓivhadza na vha sa athu bebwa.

Vha ḓo ri zwo itwa nga Ene.