NUMERI 7

₁Musi we Mushe a fhedza u akha dennde ya u ṱangana na Muṋe washu, o i ḓodza, a i kumedza Mudzimu na thundu dzayo dzoṱhe, khathihi na aḽiṱari na thundu dzayo dzoṱhe. ₂Ndi hone vhahulwane vha mitupo vhe vha vha vhe vharangaphanḓa vha matsinde a Vhaisraele, vhenevhaḽa vhanna vhe vha vha vha tshi khou vhala vhathu, ₃vha tshi ḓisa nduvho dzavho ha Muṋe washu: goloi ṱhanu na nthihi na phulu dza 12, goloi nthihi i tshi bva kha vharangaphanḓa vhavhili, phulu nthihi i tshi bva kha murangaphanḓa muṅwe na muṅwe. Musi vho no zwi swikisa, ₄Muṋe washu a amba na Mushe a ri, ₅“Ṱanganedza zwifhiwa hezwo, zwi ḓo shumela dennde ya u ṱangana na Nṋe, zwi ṋee Vhalivi zwi tshi ya nga mushumo une vha ḓo u shuma.” ₆Ndi hone Mushe a tshi ṋea Vhalivi dzigoloi na dziphulu. ₇Vha Gerisoni a vha ṋea goloi mbili na phulu nṋa, ₈vha Mirari a vha ṋea goloi nṋa na phulu ṱhanu na tharu, zwi tshi ya nga mishumo yavho, dzoṱhe dza langiwa nga Ithamara ṅwana wa Aroni. ₉Hone vha Kehathi, Mushe ho ngo vha ṋea dzigoloi na dziphulu, ngauri zwithu zwikhethwa zwe vha vha vha tshi zwi londola vho vha vha tshi zwi hwala mahaḓani avho.

₁₀Musi we aḽiṱari ya ḓodziwa, vharangaphanḓa vha ḓisa na nduvho dza u i kumedza Mudzimu. Musi vho no ḓilugisela u swikisa zwifhiwa zwavho aḽiṱarini, ₁₁Muṋe washu a vhudza Mushe a ri, “Vha vhudze uri ḓuvha ḽiṅwe na ḽiṅwe u swika hu tshi fhela maḓuvha a 12, muṅwe wa vharangaphanḓa u fanela u swikisa zwifhiwa zwawe a tshi itela u kumedzwa ha aḽiṱari.”

_12-83Vho swikisa nduvho dzavho vha tshi tevhekana nga u ralo:

Nduvho dze muṅwe na muṅwe a ḓisa dzo vha dzi tshi fana: mudzio muthihi wa siliva we wa vha u tshi lemela khilogiramu dza 1,5 na sambelo ḽithihi ḽa siliva ḽe ḽa vha ḽi tshi lemela giramu dza 800, zwi tshi ya nga muelo wo tendelwaho, yoṱhe vhuvhili hayo yó ḓala vhukhopfu ho vangiwaho mapfura zwa vha nduvho ya thoro; ludongo luthihi lwa musuku lune lwa lemela giramu dza 110, lwó ḓala nga zwioro; mbohwana nthihi na thutha nthihi na ngwana ya ṅwaha muthihi, zwa tshiṱhavhelo tshi fhiswaho; mbudzi nthihi ya nduvho ya tshipfumelo; na mboho mbili na thutha ṱhanu na mbudzi ṱhanu na ngwana ṱhanu dza ṅwaha muthihi zwa nduvho ya u konana na Mudzimu.

_84-88Nduvho dzoṱhe dzo ḓiswaho nga vharangaphanḓa vha 12 dza u kumedza aḽiṱari ndi hedzi:

₈₉Musi Mushe a tshi dzhena denndeni ya u ṱangana na Mudzimu u amba na Muṋe washu, a pfa Muṋe washu a tshi khou amba nae e nṱha ha tshitibo tshi re nṱha ha mbulungelo ya mulanga, vhukati ha vhakherube vhavhili. Muṋe washu a amba nae nga u ralo.