NUMERI 5

₁Muṋe washu a amba na Mushe a ri, ₂“Laya Vhaisraele uri afho mishashani vha thathe vhoṱhe vha re na vhulwadze ha lukanda vhu kumadzaho kana vha bvuḓaho vhulwa muvhilini na vhoṱhe vhe vha kumala nga u kwama tshitumbu. ₃Vhathu havho vhoṱhe vho kumalaho, munna kana musadzi, nga vha bviselwe nnḓa, uri vha si kumadze mishasha hune nda dzula hone na vhathu vhanga.” ₄Vhaisraele vha thetshelesa, vha thatha avho vhathu afho mishashani nga he Muṋe washu a vhudza Mushe.

₅Muṋe washu a vhudza Mushe ₆uri a laye Vhaisraele ndayo hedzi:

Arali munna kana musadzi a khakhela muṅwe nga tshifhio na tshifhio, ha vha u shandukela Muṋe washu, onoyo muthu u na mulandu, ₇o fanela u bula vhutshinyi hawe, a lifhe mulandu wawe woṱhe, a inge nga tshipiḓa tshithihi kha zwiṱanu, a lifhele we a mu khakhela. ₈Huno arali uyo muthu o fa, a si na shaka ḽa tsini ḽine ḽa nga lifhelwa uyo mulandu, mulifho nga u ṋewe Muṋe washu u vhe wa tshifhe. Mulifho uyo u ingwa kha thutha i ṱhavhelwaho u pfumelela uyo muthu a re na mulandu. ₉Na zwiṅwe zwoṱhe zwine Vhaisraele vha bvisa vha zwi ṋekedza Yahavee ndi zwa onoyo tshifhe ane a zwi ṱanganedza. ₁₀Tshifhe muṅwe na muṅwe u dzhia nduvho dzine dza swikiswa khae dza vha dzawe.

₁₁Muṋe washu a laya Mushe _12-14uri a laye Vhaisraele ndayo hedzi a ri,

“Zwi nga itea uri munna a humbulele musadzi wawe uri ha fulufhedzei, o ḓishata tshika nga u dzheniswa nḓuni nga muṅwe munna. Huno munna wawe a nga kha ḓi vha a si na ngoho, ngauri musadzi wawe a nga kha ḓi vha o zwi ita tshiphirini, hu si na ṱhanzi, á songo farwa a tshi khou zwi ita. Nahone zwi nga kha ḓi itea uri munna a vhe na vivho a sokou humbulela musadzi wawe vhuvhi, naho a songo ḓishata tshika. ₁₅Munna uyo nga a ise musadzi wawe ha tshifhe. A ise na nduvho i ṱoḓeaho ya khilogiramu nthihi ya bali, hone a songo i shela mapfura kana a ṋuṋedza zwioro khayo, ngauri nduvho iyo ya thoro ndi ya lulindo lwa munna, i itelwa uri ngoho i vhonale.

₁₆“Tshifhe u ḓo ḓisa musadzi uyo a mu imisa phanḓa ha Muṋe washu, ₁₇tshifhe a konou shela maḓi makhethwa sambeloni ḽa vumba, a dzhia mavu a re henefho denndeni ya u ṱangana na Muṋe washu, a a longa maḓini. ₁₈Tshifhe a ṱharamudze mavhudzi a uyo musadzi, a vhee nduvho ya vhukhopfu zwanḓani zwawe, a konou fara sambelo ḽiḽa ḽi re na maḓi a no ḓisa zwi vhavhaho na mafhanza. ₁₉Ndi hone tshifhe a tshi ḓo ita uri musadzi uyo a tende muano une wa buliwa nga tshifhe u no ri, ‘Arali u songo ita vhupombwe, ú songo pambuwa nḓilani, ú songo ḓishata tshika u tshi kha ḓi vha na munna wau, ngavhe maḓi haya a no ḓisa zwi vhavhaho na mafhanza a sa u huvhadzi. ₂₀Hone arali wo ita vhupombwe u tshi kha ḓi vha na munna wau, wa ḓishata tshika nga u dzheniswa nḓuni nga munna a si wau, ₂₁ngavhe Muṋe washu a tshi ita uri vhathu vha hau vha teketelane nga dzina ḽau. Ngavhe a tshi ita uri mbumbelo yau i hwetekane, thumbu yau i kukumuwe. ₂₂Ngavhe maḓi haya a u teketela a tshi dzhena thumbuni yau a i kukumusa, mbumbelo yau ya hwetekana.’ Musadzi u ḓo fhindula a ri, ‘Amen, nga zwi ralo.’

₂₃“Ndi hone tshifhe a tshi ḓo ṅwala mafhanza ayo kha gwati a zwi kuvhela sambeloni ḽi re na maḓi a no ḓisa zwi vhavhaho. ₂₄Hu ḓo ri tshifhe a sa athu nwisa uyo musadzi ayo maḓi ane a nga ita uri a pfe vhuṱungu nga maanḓa, ₂₅tshifhe u ḓo dzhia nduvho ya vhukhopfu ha vivho zwanḓani zwa uyo musadzi, a i imisa a i kumedza Muṋe washu, a i ḓisa aḽiṱarini. ₂₆Tshifhe a konou ṱusa iyo nduvho ya thoro i si gathi ya vha nduvho ya tshihumbudzo, a i fhisa kha aḽiṱari, a fhedza nga u nwisa uyo musadzi ayo maḓi. ₂₇Arali o ita vhupombwe, maḓi a ḓo ita uri a pfe vhuṱungu nga maanḓa, thumbu yawe i ḓo kukumuwa, mbumbelo yawe ya hwetekana. Vhathu vha hawe vha ḓo teketelana nga dzina ḽawe. ₂₈Hone arali a si na mulandu a nga si huvhale, nahone u ḓo ḓi beba vhana.

_29-30“Hoyu ndi wone mulayo wa milandu ya munna wa vivho, a tshi humbulela musadzi wawe vhupombwe. Musadzi u ḓo imiswa phanḓa ha Muṋe washu, tshifhe a tevhedza maitele eneo. ₃₁Munna wawe u ḓo vha a si na mulandu, hone musadzi ene, arali e na mulandu, u ḓo tambula.”