NUMERI 34

₁Muṋe washu a ṋea Mushe ₂ndayo hedzi dza Vhaisraele a ri, “Musi ni tshi dzhena Kanana, shango ḽine nda khou ni ṋea ḽone, masakha a shango ḽaṋu a ḓo vha haya: ₃Masakha a thungo ya tshipembe a ḓo thoma phangani ya Tsini a tshimbila na masakha a Edomo. A ḓo thoma vhubvaḓuvha hune Lwanzhe lwa Muṋo lwa guma hone thungo ya tshipembe. ₄Zwino a konou livha tshipembe a tshi ya Pharani ya Phame a fhirela phanḓa a swika Tsini a vhuya a swika tshipembe Kadeshe Barania. Zwenezwo a livha vhukovheladevhula u ya Hatsara Adara a fhirela Atsimoni, ₅u bva henefho a ḓo livha govhani na masakhani a Egipita a fhelela Lwanzheni lwa Phandamashango.

₆“Masakha a vhukovhela a ḓo vha Lwanzhe lwa Phandamashango.

₇“Masakha a devhula a ḓo tou tswi u bva Lwanzheni lwa Phandamashango u ya thavhani ya Horo, ₈u bva henefho a livha Pharani ya Hamathi. A ḓo fhirela phanḓa a tshi ya Tsedada, ₉a fhirela Zifironi, a guma Hatsara Enani.

₁₀“Masakha a vhubvaḓuvha a ḓo tou tswi a tshi bva Hatsara Enani a tshi ya Shefamu. ₁₁U bva henefho a ḓo konou livha tshipembe a tshi ya Harabele, vhubvaḓuvha ha Aini, a fhirela mivhunduni khunzikhunzini ya vhubvaḓuvha ya dzivha ḽa Khinirethe, ₁₂a konou fhirela tshipembe a tshi tsa na mulambo wa Jorodani a tshi ya Lwanzheni lwa Muṋo.

“Haya a ḓo vha one masakha a shango ḽaṋu thungo dzoṱhe.”

₁₃Ndi hone Mushe a tshi vhudza Vhaisraele a ri, “Heḽo ndi ḽone shango ḽine na ḓo wana nga u ita madeṅwa, shango ḽe Muṋe washu a ḽi ṋea matsinde maṱanu na maṋa na hafu. ₁₄Tsinde ḽa Rubeni na ḽa Gadi na hafu ya tsinde ḽa Manase vha vhubvaḓuvha vho no ḓi kovhelwa shango ḽavho, zwi tshi ya nga miṱa yavho, ₁₅vhubvaḓuvha ha Jorodani, u livhana na Jerikho.”

₁₆Muṋe washu a amba na Mushe a ri, ₁₇“Tshifhe Eliasara na Joshua ṅwana wa Nunu vha ḓo kovhekanya vhathu shango. ₁₈U dzhie na murangaphanḓa muthihi kha tsinde ḽiṅwe na ḽiṅwe a farise vha tshi kovha shango.” _19-28Vhanna vho nangwaho nga Muṋe washu ngevha:

₂₉Havho ndi vhone vhanna vhe Muṋe washu a vha hwesa mushumo wa u kovhela Vhaisraele mikovhe yavho shangoni ḽa Kanana.