NUMERI 3

₁Vhana vha Aroni na Mushe musi we Muṋe washu a amba na Mushe thavhani ya Sinai ndi havha: ₂Aroni o vha e na vhana vhaṋa vha vhatuka: Tanzhe ndi Nadaba, ha tevhela Abihu na Eliasara na Ithamara. ₃Vho ḓodzwa mapfura, vha vhumbwa vhotshifhe, ₄hone Nadaba na Abihu vho ḓo fa musi vha tshi khou ṋekedza Muṋe washu mulilo u si mukhethwa musi vhe phangani ya Sinai. Vho fa vha si na vhana, zwenezwo Eliasara na Ithamara vha shuma vhe vhotshifhe Aroni a tshi kha ḓi tshila.

₅Muṋe washu o vhudza Mushe a ri, ₆“Ḓisa vha tsinde ḽa Livi u vha vhee vha farisane na tshifhe Aroni. ₇Vha ḓo shuma mishumo ya dennde ya u ṱangana na Nṋe vho imela Aroni na vhathu vhoṱhe. ₈Vha ḓo londola thundu yoṱhe ya dennde ya u ṱangana na Nṋe, vha shumela vhaṅwe Vhaisraele. ₉Vhalivi u vha kumedze Aroni na vhana vhawe, ndi vhone Vhaisraele vhane vha fanela u kumedzwa ene tshoṱhe. ₁₀Iwe u vhee Aroni na vhana vhawe uri vha shume mushumo wa vhutshifhe, hone arali muṅwe a vhuya a linga u ḓidzhenisa kha mushumo wonoyo, u ḓo vhulawa.”

₁₁Muṋe washu a vhudza Mushe a ri, ₁₂“Nṋe muṋe ndo nanga Vhalivi kha Vhaisraele vhudzuloni ha matanzhe oṱhe a vhatuka vhane vha bebwa nga musadzi muṅwe na muṅwe wa Muisraele. Vhalivi ndi vhanga, ₁₃ngauri matanzhe oṱhe ndi anga. Zwiḽa ndi tshi vhulaha matanzhe oṱhe Egipita, ndo ḓikhethela tanzhe ḽiṅwe na ḽiṅwe ḽa Israele, ḽa muthu na ḽa tshifuwo. Oṱhe ndi anga. Ndi Nṋe Yahavee.”

₁₄Muṋe washu o laya Mushe e phangani ya Sinai a ri, ₁₅“Vhala Vhalivi zwi tshi ya nga mitupo yavho na miṱa yavho, vhala munna muṅwe na muṅwe na mutukana u thoma kha wa ṅwedzi muthihi.” ₁₆Mushe a mbo vha vhala unga o laiwa nga Muṋe washu. ₁₇Madzina a vhana vha Livi vha vhatuka ndi Gerisoni na Kehathi na Mirari. ₁₈Madzina a vhana vha Gerisoni ndi Libini na Shimei. ₁₉Madzina a vhana vha Kehathi ndi Amuramu na Izhara na Hebroni na Uziele. ₂₀Madzina a vhana vha Mirari ndi Mahali na Mushi. Ndi vhone vhomakhulukuku wa mitupo yavho.

₂₁Mutupo wa Gerisoni wo vha wo vhumbiwa nga muṱa wa Libini na wa Shimei. ₂₂Tshivhalo tshoṱhe tsha vhatuka vho vhaliho u thoma kha wa ṅwedzi muthihi tsho vha 7 500. ₂₃Vha mutupo hoyo vho vha vho fanela u ṱoka mishasha yavho murahu ha dennde ya u ṱangana na Muṋe washu, thungo ya vhukovhela. ₂₄Muhulwane wa uyo mutupo o vha e Eliasafu ṅwana wa Laele. ₂₅Vho vha vha tshi londola dennde ya u ṱangana na Muṋe washu na lupila lwayo lwa ngomu na lwa nnḓa na luvhemba lune lwa nembeledzwa muṋangoni, ₂₆na vhupila ha muṱa une wa mona na dennde ya u ṱangana na Muṋe washu na aḽiṱari na luvhemba lune lwa nembeledzwa muṋangoni wa muṱa na thambo dzazwo. Vho vha vha tshi shuma zwoṱhe zwa thundu iyo.

₂₇Mutupo wa Kehathi wo vha u tshi vhumbiwa nga muṱa wa Amuramu na wa Izhara na wa Hebroni na wa Uziele. ₂₈Vhoṱhe vhanna na vhatuka vhe vha vhaliwa u thoma kha wa ṅwedzi muthihi vho vha 8 600. ₂₉Vha mutupo hoyo vho vha vha tshi fanela u ṱoka mishasha yavho sia ḽa tshipembe ḽa dennde ya u ṱangana na Muṋe washu. ₃₀Muhulwane wa uyo mutupo o vha e Elitsafani ṅwana wa Uziele. ₃₁Vho vha vha tshi londola mbulungelo ya mulanga na ṱafula na tshivheambone na dziaḽiṱari na midzio ine vhotshifhe vha i shumisa Hukhethwa, na luvhemba lune lwa nembeledzwa muṋangoni wa Hukhethwakhethwa. Vho vha vha tshi shuma mishumo yoṱhe ya thundu idzo.

₃₂Murangaphanḓa wa vhahulwane vha Vhalivi o vha e Eliasara ṅwana wa tshifhe Aroni. O vha a tshi langa vhane vha shuma fhethu hukhethwa.

₃₃Mutupo wa Mirari wo vha wo vhumbiwa nga muṱa wa Mahali na wa Mushi. ₃₄Vhanna vhoṱhe na vhatukana vha no fhira ṅwedzi muthihi vhe vha vhaliwa vho vha vhe 6 200. ₃₅Vha mutupo hoyo vho vha vha tshi fanela u ṱoka mishasha yavho sia ḽa devhula ḽa dennde ya u ṱangana na Muṋe washu. Muhulwane wa uyo mutupo o vha e Tsuriele ṅwana wa Abihaili. ₃₆Vho vha vha tshi londola thikho dza dennde ya u ṱangana na Muṋe washu na mbalelo dza mabaphathi na phuphu na zwiraho, vha shuma na u zwi kwea. Vho vha vha tshi shuma zwoṱhe zwine zwa kwamana na thundu dzenedzo. ₃₇Vho vha vha tshi londola na dzithanda na zwiraho na khokho na dzithambo dza muṱa wa nnḓa.

₃₈Mushe na Aroni na vhana vhawe vho vha vha tshi fanela u ṱoka mishasha yavho phanḓa ha dennde ya u ṱangana na Muṋe washu sia ḽa vhubvaḓuvha. Vhone vho vha vhe vha u londola Hukhethwa vha tshi itela Vhaisraele. Muṅwe-vho ane a vhuya a linga u sendela tsini na Hukhethwa o vha a tshi vhulawa. ₃₉Vhanna vhoṱhe vha Vhalivi na vhatukana vha no fhira ṅwedzi muthihi vhe vha vhaliwa nga Mushe zwi tshi ya nga mitupo nga he Muṋe washu a mu laya, vho vha vhe 22 000.

₄₀Muṋe washu a amba na Mushe a ri, “Vhala matanzhe oṱhe a Vhaisraele a vhanna na vhatukana u thoma kha wa ṅwedzi muthihi, u ṅwale mutevhe wa madzina avho. ₄₁Nṋe nṱoḓele Vhalivi vha vhe vhanga vhudzuloni ha matanzhe oṱhe a Vhaisraele, na zwifuwo zwa Vhalivi vhudzuloni ha matanzhe oṱhe a zwifuwo zwa Vhaisraele. Ndi Nṋe Yahavee.” ₄₂Mushe a tenda, a vhala matanzhe oṱhe a vhanna na vhatukana, ₄₃vha ṅwedzi muthihi na u fhira, vhoṱhe vho vha 22 273.

₄₄Muṋe washu a amba na Mushe a ri, ₄₅“Nṱoḓele Vhalivi vha vhe vhanga vhudzuloni ha matanzhe oṱhe a Vhaisraele, na zwifuwo zwa Vhalivi vhudzuloni ha zwifuwo zwavho. Vhalivi ndi vhanga. Ndi Nṋe Yahavee. ₄₆Zwino ngauri matanzhe a Vhaisraele a vhatuka a fhira Vhalivi nga u anda nga vhathu vha 273, u fanela u rengulula havho vhana vha vhatuka vha re vhanzhi. ₄₇Muṅwe na muṅwe u mu rengulule nga mangwende maṱanu a siliva, u tshi tevhedza tshikalo tsha hukhethwa, ₄₈tshelede iyo u i fhe Aroni na vhana vhawe.” ₄₉Mushe a thetshelesa, a dzhia ₅₀mangwende a 1 365 a siliva, ₅₁a a ṋea Aroni na vhana vhawe nga he Muṋe washu a mu laya.