NUMERI 29

₁Nga ḓuvha ḽa u ranga ḽa ṅwedzi wa vhuṱanu na vhuvhili ni kuvhangane ni luvhe, hu songo shumiwa mushumo na muthihi nga heḽo ḓuvha. Nga ḓuvha ḽeneḽo hu lidzwe dziphalaphala. ₂Ṋekedzani Muṋe washu nduvho i fhiswaho, nduvho i nukhelelaho i no mu takadza: mbohwana nthihi na thutha nthihi na thuthana ṱhanu na mbili dza ṅwaha muthihi, dzoṱhe dzi vhe dzi si na luvhadzi. ₃Ni ṋekedze nduvho ya thoro yo tewaho ya vhukhopfu ho vangiwaho mapfura a muolivi: mboho i ṋekedzwe na vhukhopfu ha khilogiramu tharu, thutha i ṋekedzwe na vhukhopfu ha khilogiramu mbili, ₄thuthana iṅwe na iṅwe i ṋekedzwe na vhukhopfu ha khilogiramu nthihi. ₅Ni ṋekedze na mbokoṱo nthihi i vhe nduvho ya tshipfumelo. ₆Hezwo ni zwi ṋekedze zwi tshi ingiwa kha nduvho i fhiswaho ya misi yoṱhe yo teaho ya ḓuvha ḽa u ranga ḽa ṅwedzi na nduvho yaḽo ya thoro, na nduvho yo fhiswaho ya misi yoṱhe na nduvho yayo ya thoro na nduvho ya waini. Nduvho hedzo dza zwiḽiwa ndi nduvho dzi nukhelelaho dzi takadzaho Yahavee.

₇Nga ḓuvha ḽa fumi ḽa ṅwedzi wa vhuṱanu na vhuvhili ni kuvhangane ni luvhe, ni songo ḽa zwiḽiwa, ni songo shuma mushumo na muthihi, ni ḓidzivhise zwoṱhe. ₈Ni ṋekedze Yahavee nduvho i fhiswaho, nduvho i nukhelelaho i no mu takadza: mbohwana nthihi na thutha nthihi na thuthana ṱhanu na mbili dza ṅwaha muthihi, dzoṱhe dzi vhe dzi si na luvhadzi. ₉Ni ṋekedze nduvho ya thoro yo teaho ya vhukhopfu ho vangiwaho mapfura a muolivi: mboho i ṋekedzwe na vhukhopfu ha khilogiramu tharu, thutha i ṋekedzwe na vhukhopfu ha khilogiramu mbili, ₁₀thuthana iṅwe na iṅwe i ṋekedzwe na vhukhopfu ha khilogiramu nthihi. ₁₁Ni ṋekedze na mbokoṱo nthihi i vhe nduvho ya tshipfumelo, i tshi ingiwa kha mbudzi ine ya ṋekedzwa hu tshi tevhedzwa maitele a u pfumelela vhathu, na nduvho i fhiswaho ya misi yoṱhe i na nduvho yayo ya thoro na nduvho ya waini.

₁₂Nga ḓuvha ḽa 15 ḽa ṅwedzi wa vhuṱanu na vhuvhili ni kuvhangane ni luvhe. Ni ite vhuṱambo honoho ni tshi hulisa Muṋe washu hu vhuye hu fhele maḓuvha maṱanu na mavhili. Ni songo shuma mushumo na muthihi. ₁₃Nga ḓuvha ḽa u ranga ni ṋekedze Yahavee nduvho ya zwiḽiwa, nduvho i nukhelelaho i no takadza: mbohwana dza 13 na thutha mbili na thuthana dza 14 dza ṅwaha muthihi, dzoṱhe dzi vhe dzi si na luvhadzi. ₁₄Ni ṋekedze nduvho ya thoro yo tewaho ya vhukhopfu ho vangiwaho mapfura a muolivi: mboho iṅwe na iṅwe i ṋekedzwe na vhukhopfu ha khilogiramu tharu, thutha iṅwe na iṅwe i ṋekedzwe na vhukhopfu ha khilogiramu mbili, ₁₅thuthana iṅwe na iṅwe i ṋekedzwe na vhukhopfu ha khilogiramu nthihi. ₁₆Ni ṋekedze na mbokoṱo nthihi i vhe nduvho ya tshipfumelo. Hezwo ni zwi ṋekedze zwi tshi ingiwa kha nduvho i fhiswaho ya misi yoṱhe i na nduvho yayo ya thoro na nduvho ya waini.

₁₇Nga ḓuvha ḽa vhuvhili ni ṋekedze mbohwana dza 12 na thutha mbili na thuthana dza 14 dza ṅwaha muthihi, dzoṱhe dzi vhe dzi si na luvhadzi. ₁₈Ni dzi ṋekedze na dziṅwe nduvho dzoṱhe dze na ṋekedza nga ḓuvha ḽa u ranga. ₁₉Ni ṋekedze na mbokoṱo nthihi i vhe nduvho ya tshipfumelo, i tshi ingiwa kha nduvho i fhiswaho ya misi yoṱhe i na nduvho yayo ya thoro na nduvho ya waini.

₂₀Nga ḓuvha ḽa vhuraru ni ṋekedze mbohwana dza 11 na thutha mbili na thuthana dza 14 dza ṅwaha muthihi, dzoṱhe dzi vhe dzi si na luvhadzi. _21-22Ni dzi ṋekedze na dziṅwe nduvho dzoṱhe dze na ṋekedza nga ḓuvha ḽa u ranga.

₂₃Nga ḓuvha ḽa vhuṋa ni ṋekedze mbohwana dza fumi na thutha mbili na thuthana dza 14 dza ṅwaha muthihi, dzoṱhe dzi vhe dzi si na luvhadzi. _24-25Ni dzi ṋekedze na nduvho dziṅwe dzoṱhe dze na ṋekedza nga ḓuvha ḽa vhuvhili.

₂₆Nga ḓuvha ḽa vhuṱanu ni ṋekedze mbohwana ṱhanu na nṋa na thutha mbili na thuthana dza 14 dza ṅwaha muthihi, dzoṱhe dzi vhe dzi si na luvhadzi. _27-28Ni dzi ṋekedze na nduvho dziṅwe dzoṱhe dze na ṋekedza nga ḓuvha ḽa vhuvhili.

₂₉Nga ḓuvha ḽa vhuṱanu na vhuthihi ni ṋekedze mbohwana ṱhanu na tharu na thutha mbili na thuthana dza 14 dza ṅwaha muthihi, dzoṱhe dzi vhe dzi si na luvhadzi. _30-31Ni dzi ṋekedze na dziṅwe nduvho dzoṱhe dze na ṋekedza nga ḓuvha ḽa vhuvhili.

₃₂Nga ḓuvha ḽa vhuṱanu na vhuvhili ni ṋekedze mbohwana ṱhanu na mbili na thutha mbili na thuthana dza 14 dza ṅwaha muthihi, dzoṱhe dzi vhe dzi si na luvhadzi. _33-34Ni dzi ṋekedze na dziṅwe nduvho dzoṱhe dze na ṋekedza nga ḓuvha ḽa vhuvhili.

₃₅Nga ḓuvha ḽa vhuṱanu na vhuraru ni kuvhangane ni luvhe, ni songo shuma mushumo na muthihi. ₃₆Ni ṋekedze Muṋe washu nduvho i fhiswaho i vhe nduvho ya zwiḽiwa, nduvho i nukhelelaho i no mu takadza: mbohwana nthihi na thutha nthihi na thuthana ṱhanu na mbili dza ṅwaha muthihi, dzoṱhe dzi vhe dzi si na luvhadzi. _37-38Ni dzi ṋekedze na dziṅwe nduvho dzoṱhe dze na ṋekedza nga ḓuvha ḽa vhuvhili.

₃₉Hedzo ndi dzone ndayo dzine dza amba nga nduvho dzi fhiswaho na nduvho dza thoro na nduvho dza waini na nduvho dza u konana na Mudzimu dzine na fanela u dzi ṋekedza Yahavee nga vhuṱambo ho vhewaho, hu sa vhaliwi dzine na dzi ṋekedza ni tshi khunyeledza muano kana dzine na dzi ṋekedza nga u tou funa.

₄₀Mushe a vhudza Vhaisraele zwoṱhe zwe Muṋe washu a mu laya.