Zwo iteaho Kadeshe
1Nga ṅwedzi wa u thoma vhathu vhoṱhe vha Israele vha swika phangani ya Tsini, vha ṱoka mishasha yavho Kadeshe. Miriamu o fela henefho a swiṱwa hone.
2Fhethu he vha ṱoka hone mishasha ho vha hu si na maḓi, zwenezwo vhathu vha kuvhanganela Mushe na Aroni 3vha semana navho vha ri, “Ngavhe ro lovha na vhaḽa vha hashu zwiḽa vha tshi lovha phanḓa ha Muṋe washu. 4Ndi mini vho ḓisa tshivhidzo tsha Muṋe washu fhano sogani? Vho itela uri ri fele fhano na zwifuwo zwashu? 5Ndi mini vho ri pfulusa Egipita vha ri ḓisa fhethu fhano hune ra tambula hu sa meli tshithu? A hu na mavhele na mahuyu na nḓirivhe na magranada. Na maḓi a u nwa a hu na!” 6Mushe na Aroni vha ṱutshela vhathu vha ya vha ima muṋangoni wa dennde ya u ṱangana na Muṋe washu. Vha wa nga zwifhaṱuwo, vha vhona lupenyo lwa Muṋe washu lu kombodzaho.
7Muṋe washu a amba na Mushe a ri, 8-9“Dzhia lubaḓa lwa Aroni lu re phanḓa ha mbulungelo ya mulanga, iwe na mukomana wau Aroni ni konou kuvhanganya tshivhidzo tshoṱhe. Henefho phanḓa havho u ambe na tombo heḽiḽa ḽine wa ḽi vhona, maḓi a ḓo gubunyea a tshi bva khaḽo. Ngauralo u ḓo bvisela vhathu maḓi kha tombo, vha nwa khathihi na zwifuwo zwavho.” Mushe a ya a dzhia ulwo lubaḓa sa zwe Muṋe washu a mu laya.
10Mushe na Aroni vha kuvhanganya vhathu vhoṱhe phanḓa ha tombo, Mushe a ri, “Inwi mashandukwa, thetshelesani! Ri ni bvisele maḓi kha tombo iḽi?” 11Ndi hone Mushe a tshi angaladza luḽa lubaḓa, a rwa ḽiḽa tombo luvhili ngalwo, maḓi a gubunyea vhathu vha nwa na zwifuwo zwa nwa.
12Hone Muṋe washu a kaidza Mushe na Aroni, a ri, “Zwino nge na si mpfulufhele tshoṱhe, na si sumbedze Vhaisraele vhukhethwa hanga, vhathu havha ni nga si vha swikise shangoni ḽe nda fulufhedzisa uri ndi ḓo vha ṋea ḽone.”
13Hezwo zwo itea Miriba he vhathu vha gungulela Muṋe washu, henefho he a vha sumbedza uri Ene ndi mukhethwa.
Khosi ya Edomo i tshi hana Vhaisraele vha tshi fhira
14Mushe a ruma vhaḓinḓa vha tshi bva Kadeshe vha ya ha khosi ya Edomo, vha swika vha ri, “Ndi riṋe mashaka avho, vha matsinde a Israele. Vhone vha a ḓivha u tambula hashu, 15zwe vhomakhulukuku washu vha ya Egipita, ra dzula hone miṅwaha minzhi. Vhaegipita vho tambudza vhomakhulukuku washu na riṋe, 16riṋe ra lilela Muṋe washu, Ene a pfa tshililo tshashu, a ruma muruṅwa, a ri pfulusa Egipita, zwino ro swika Kadeshe, masakhani aṋu. 17Nga vha ri tendele ri fhire nga shango ḽavho. Riṋe na kholomo dzashu ri nga si pambuwe gondoni kana ra dzhena masimuni kana masimuni a minḓirivhe, a ri nga nwi maḓi a bidzi dzavho. Ri ḓo tou longondo nga gondo ra vhuya ra bva shangoni ḽavho.” 18Huno Vhaedomo vha fhindula vha ri, “A ri tendi ni tshi fhira nga vhukati ha shango ḽashu! Arali na linga, ri ḓo ni bvela pfumo.” 19Vhaisraele vha ri, “Ri ḓo tshimbila gondoni fhedzi, arali riṋe kana zwifuwo zwashu ra nwa maḓi aṋu ri ḓo lifha, ri khou tou humbela nḓila zwashu, a hu na zwiṅwe.” 20Vhaedomo vha dovha vha ri, “Ri a hana!” Ndi hone vha tshi bva na mmbi ya maanḓa uri vha lwe na Vhaisraele. 21Vhaisraele vha huma vha fara iṅwe nḓila nge Vhaedomo vha hana Vhaisraele vha tshi fhira nga shangoni ḽavho.
Lufu lwa Aroni
22Vhathu vhoṱhe vha Israele vha takuwa Kadeshe vha swika thavhani ya Horo, 23masakhani a Edomo. Henefho Muṋe washu a amba na Mushe na Aroni a ri, 24“Aroni a nga si dzhene shangoni ḽe nda fulufhedzisa uri ndi ḓo ḽi ṋea Vhaisraele, u ḓo fa, nge noṱhe vhuvhili haṋu na nyadza ndayo yanga musi ni Miriba. 25Dzhia Aroni na ṅwana wawe Eliasara ni gonye thavha ya Horo, 26henefho u bvule Aroni zwiambaro zwa vhutshifhe, u zwi ambadze ṅwana wawe Eliasara. Aroni u ḓo iswa ha vha hawe, u ḓo fela henefho.” 27Mushe a ita zwe Muṋe washu a mu laya. Vha gonya thavha ya Horo vhathu vhoṱhe vha tshi zwi vhona, 28Mushe a bvula Aroni zwiambaro zwa vhutshifhe, a zwi ambadza ṅwana wawe Eliasara. Aroni a fela henefho muṱumbani wa thavha. Mushe na Eliasara vha huma vha tsela fhasi. 29Vhathu vhoṱhe vha zwi pfa uri Aroni o tshinyala, vhoṱhe vha mu lila vha fhedza maḓuvha a 30.
