Tshivenda 1998 (VEN98)
2

Hu tshi dzudzanywa vhathu nga matsinde avho mishashani

21Muṋe washu a laya Mushe na Aroni a ri, 2“Vhaisraele vha ṱoke mishasha yavho u mona na dennde ya u ṱangana na Nṋe kulenyana nayo, munna muṅwe na muṅwe a ṱoke mushasha fhasi ha tshiphuga tsha khethekanyo yawe na fulaga ya tsinde ḽawe.

3-9“Thungo ya vhubvaḓuvha hu ḓo vha na vha khethekanyo ya Juda, vha ḓo ṱoka mishasha kha zwigwada zwavho vhe na vharangaphanḓa vhavho. Vhenevho ndi havha:

Tsinde Murangaphanḓa Tshivhalo tsha vhanna
Juda Nahashoni ṅwana wa Aminadaba 74 600
Isakhara Nathaniele ṅwana wa Tsuara 54 400
Zebuloni Eliaba ṅwana wa Heloni 57 400
Vhoṱhe vho ṱangana: 186 400

“Vhaisraele vha tshi dovha u fara lwendo, vha ḓo rangwa phanḓa nga vhenevho.

10-16“Thungo ya tshipembe hu ḓo vha na khethekanyo ya Rubeni, vha ḓo ṱoka mishasha kha zwigwada zwavho, vhe na vharangaphanḓa vhavho.

“Vhenevho ndi havha:

Tsinde Murangaphanḓa Tshivhalo tsha vhanna
Rubeni Elitsuru ṅwana wa Shedeuru 46 500
Simioni Shelumiele ṅwana wa Tsurishadai 59 300
Gadi Eliasafa ṅwana wa Deuele 45 650
Vhoṱhe vho ṱangana: 151 450

“Havho vha ḓo tshimbila vhe vhuimoni ha vhuvhili.

17“Zwino vhukati ha khethekanyo idzo mbili na dziṅwe mbili dzi re murahu hu ḓo tshimbila Vhalivi vho hwala dennde ya u ṱangana na Nṋe. Kha khethekanyo iṅwe na iṅwe vhathu vha ḓo tshimbila vho tevhekana nga kuṱokele kwavho kwa mishasha, vhaṅwe na vhaṅwe vhe kha khethekanyo yavho.

18-24“Thungo ya vhukovhela hu ḓo vha na vha khethekanyo ya Efraimi, vha ḓo ṱoka mishasha kha zwigwada zwavho, vhe na vharangaphanḓa vhavho.

“Vhenevho ndi havha:

Tsinde Murangaphanḓa Tshivhalo tsha vhanna
Efraimi Elishama ṅwana wa Amihudu 40 500
Manase Gamaliele ṅwana wa Phedatsuru 32 200
Benyamini Abidani ṅwana wa Gidoni 35 400
Vhoṱhe vho ṱangana: 108 100

“Vha khethekanyo ya Efraimi vha ḓo tshimbila vhuimoni ha vhuraru.

25-31“Thungo ya devhula hu ḓo vha na vha khethekanyo ya Dani, vha ḓo ṱoka mishasha kha zwigwada zwavho, vhe na vharangaphanḓa vhavho.

“Vhenevho ndi havha:

Tsinde Murangaphanḓa Tshivhalo tsha vhanna
Dani Ahiesere ṅwana wa Amishadai 62 700
Ashere Phagiele ṅwana wa Okhorani 41 500
Nafuthali Ahira ṅwana wa Enani 53 400
Vhoṱhe vho ṱangana: 157 600

“Vha khethekanyo ya Dani vha ḓo tshimbila murahu.”

32Tshivhalo tshoṱhe tsha Vhaisraele vho ṅwaliwaho kha khethekanyo idzo, zwi tshi ya nga tshigwada nga tshigwada, tsho vha 603 550. 33Vhalivi vho vha vha songo ṅwaliwa na vhaṅwe Vhaisraele, nga he Muṋe washu a laya Mushe.

34Vhaisraele vho ita zwoṱhe zwe Muṋe washu a laya Mushe. Vha ḓi ṱoka mishasha, muṅwe na muṅwe e kha khethekanyo yawe, vha tshimbila, muṅwe na muṅwe e na vha tsinde ḽawe.