NUMERI 14

₁Vhusiku honoho vhoṱhe vha lala vha tshi ṱavha mukosi vha tshi lila. ₂Vhaisraele vha gungulela Mushe na Aroni vha ri, “Ngavhe ro fela zwashu Egipita kana hanefhano phangani! ₃Ndi mini Muṋe washu a tshi khou ri isa shangoni ḽiḽa uri ri yo ḽiwa nga pfumo? Vhasadzi vhashu na vhana vhashu vha ḓo thubiwa. A si khwiṋe ri tshi humela Egipita?” ₄Vha amba nga tshavho vha ri, “Nga ri nange murangaphanḓa ri humele Egipita!”

₅Ndi hone Mushe na Aroni vha tshi wa nga zwifhaṱuwo phanḓa ha Vhaisraele vhoṱhe vho kuvhanganaho henefho. ₆Joshua ṅwana wa Nunu na Khalebe ṅwana wa Jefune, vhaṅwe vha dziṱholi dze dza vha dzo ya u ṱola shango, vha kherukanya zwiambaro zwavho, ₇vha vhudza Vhaisraele vhoṱhe vho kuvhanganaho vha ri, “Shango ḽe ra ḽi buḓekanya ra ḽi tandula ndi ḽavhuḓivhuḓi. ₈Arali Muṋe washu a tshi ri takalela, u ḓo ri endedza ra dzhena shangoni ḽeneḽo, shango ḽi no ela mukhaha na ṋotshi. ₉Tshaṋu ni songo shandukela Muṋe washu nahone ni songo ofha vhathu vhane vha dzula khaḽo. Ri ḓo vha mila. Muṋe washu u na riṋe, yavho midzimu i nga si vha tsireledze; ni songo vha ofha.” ₁₀Huno vhathu vhoṱhe vha vho ri vha vha kanḓa nga matombo, hone kathihi fhedzi Vhaisraele vhoṱhe vha vhona lupenyo lwa Muṋe washu lu kombodzaho lu tshi vhonetshela denndeni ya u ṱangana na Mudzimu.

₁₁Muṋe washu a amba na Mushe a ri, “Vhathu avha vha ḓo nnyadza u swika lini? Ndo vha itela maḓembe manzhi. Vha ḓo hana u mpfulufhela u swika lini? ₁₂Ndi ḓo vha ḓisela dwadze nda vha lozwa, hone iwe ndi ḓo u ita khotsi a lushaka luhulu lwa maanḓa a no fhira avho!”

₁₃Huno Mushe a vhudza Muṋe washu a ri, “Wo pfulusa vhathu avha shangoni ḽa Egipita nga maanḓa au. Musi Vhaegipita vha tshi pfa zwe wa ita vhathu vhau, ₁₄vha ḓo zwi vhudza vhathu vhane vha dzula shangoni heḽi. Vhathu havha vho no ḓi zwi pfa uri Iwe Muṋe washu u na riṋe, ri tou u vhona nga maṱo, gole ḽau ḽi alama nṱha hashu, u tshimbila phanḓa hashu u kha phuphu ya gole masiari, vhusiku u kha phuphu ya mulilo. ₁₅Zwino arali wa vhulaha vhathu vhau vhoṱhe, tshakha dze dza pfa bvumo ḽau dzi ḓo ri, ₁₆‘Yahavee o kundwa u swikisa avha vhathu shangoni ḽe a vha fulufhedzisa, ndi zwe a sokou vha lozwa phangani!’ ₁₇Zwino-ha Muṋe wa zwoṱhe, ri sumbedze maanḓa au nandi, u ite zwe wa ri fulufhedzisa musi u tshi ri, ₁₈‘Nṋe Yahavee a thi sokou fhela mbilu, ndi sumbedza vhathu lufuno lwanga luhulu na u fulufhedzea hanga, ndi hangwela vhathu vhutshinyi na vhushandukwa. Naho zwo ralo a thi nga litshi u lifhedza vhana na vhaḓuhulu u swika kha murafho wa vhuraru na wa vhuṋa ndi tshi lifhedza vhutshinyi ha vhabebi vhavho.’ ₁₉Zwino Muṋe washu, ngauri u na lufuno luhulu lu sa shanduki, a u dovhi wa hangwela vhathu avha vhutshinyi havho, unga wo ḓi vha hangwela tshee vha pfuluwa Egipita u swika ṋamusi?”

₂₀Muṋe washu a fhindula a ri, “Ndi zwone, ndi ḓo vha hangwela unga wo nkhumbela. ₂₁Hone ndi ana nga vhutshilo hanga, Nṋe ane vhugala hanga ha ḓadza ḽifhasi ḽoṱhe, ₂₂ndi ri a hu na na muthihi wa vhathu avha ane a ḓo tshila a swika shangoni ḽeneḽiḽa. Vho vhona lupenyo lwanga lu kombodzaho na maḓembe e nda ita Egipita na fhano phangani, hone vha ḓi nṱunga vha dovha, vha hana u nthetshelesa vha dovha. ₂₃Vha nga si vhuye vha vhona shango ḽe nda fulufhedzisa vhomakhulukuku wavho. Na muthihi we a nnyadza a nga si ḽi vhone. ₂₄Hone mulanda wanga Khalebe o vha na muya u sa fani na wavho, u nthetshelesa nga mbilu yoṱhe, ene ndi ḓo mu swikisa shangoni ḽe a tandula, ḽi ḓo vha ḽa vhaḓuhulu vhawe, ₂₅magovhani ane zwino ha dzula Vhaamaleke na Vhakanana. Matshelo ni hume ni dzhene sogani no livha sia ḽa Lwanzhe lwa Dziṱhanga.”

₂₆Muṋe washu a amba na Mushe na Aroni a ri, ₂₇“Avha vhathu vhavhi vha ḓo nngungulela u swika lini? Ndo zwi pfa Vhaisraele havha vha tshi gungula! ₂₈Zwino vha vhudze u ri, ‘Vhukumakuma ndi ana nga vhutshilo hanga, ndi ḓo ni ita zwenezwo zwe na humbela. Ho amba Nṋe Yahavee. ₂₉Ni ḓo fa zwitumbu zwaṋu zwa balangana na soga heḽi nge na nngungulela, muṅwe na muṅwe waṋu u thoma kha wa miṅwaha ya 20, we a vhalwa kha tshivhalo tsha vhathu, ha nga dzheni shangoni heḽo. ₃₀Ndo ni fulufhedzisa uri ni ḓo dzula khaḽo, hone ndi vho ana ndi ri, a hu na na muthihi waṋu a no ḓo dzula khaḽo arali e si Khalebe ṅwana wa Jefune fhedzi, na Joshua ṅwana wa Nunu. ₃₁Ni tshi gungula no ri vhana vhaṋu vha ḓo thubiwa, hone Nṋe ndi ḓo vha swikisa shangoni ḽe inwi na ḽi landula, ḽi ḓo vha haya havho. ₃₂Inwi ni ḓo fela henefhano phangani hei. ₃₃Vhana vhaṋu vha ḓo tendeleka phangani hei vha fhedza miṅwaha ya 40, vha tshi tambudzelwa vhushandukwa haṋu, na vhuya na fa noṱhe na fhela phano phangani. ₃₄Ni ḓo tambudzelwa vhuvhi haṋu na fhedza miṅwaha ya 40, ṅwaha muthihi u ḓo imela ḽiṅwe na ḽiṅwe ḽa maḓuvha e na a fhedza ni tshi khou tandula shango iḽo. Ndi hone ni tshi ḓo zwi ḓivha uri ndi tshi lwa na inwi zwo tou ita hani! ₃₅Ndi a ana uri hezwo ndi ḓo zwi ita inwi vhathu vhavhi vhane vha kuvhangana uri vha lwe na Nṋe. Ni ḓo fa noṱhe hafhano phangani na vhuya na fhela. Ho amba Nṋe Yahavee.’ ”

₃₆Vhanna vhe Mushe a vha o vha ruma uri vha yo tandula shango, vho vhuya vho shanda mafhungo, zwa ita uri vhathu vha gungulele Muṋe washu. ₃₇Ndi zwe Muṋe washu a vha ḓisela dwadze vha fa. ₃₈Kha dziḽa ṱholi dza 12 vhe vha si fe ndi Joshua ṅwana wa Nunu na Khalebe ṅwana wa Jefune fhedzi.

₃₉Musi Mushe a tshi vhudza Vhaisraele zwe Muṋe washu a amba, vha lila lu ṱungufhadzaho. ₄₀Ḽi tshi tsha nga matshelo vha takuwa uri vha gonye mivhunduni, vha tshi ri, “Zwino ro ḓiimisela u ya fhethu he Muṋe washu a ri vhudza. Ri a tenda uri ro tshinya.”

₄₁Hone Mushe a ri, “Zwino ndi mini ni tshi dovha u nyadza ndaela ya Muṋe washu? Zwi nga si ni nakele! ₄₂Ni songo ya; Muṋe washu ha na inwi, maswina aṋu a ḓo ni kunda. ₄₃Musi ni tshi imedzana na Vhaamaleke na Vhakanana, ni ḓo ḽiwa nga pfumo. No shandukela Muṋe washu, a nga si ime na inwi.”

₄₄Naho zwo ralo vha ḓi futelela u gonya zwivhangani, hu uri mbulungelo ya mulanga a yo ngo bva mishashani, na Mushe ho ngo bva. ₄₅Ndi hone Vhaamaleke na Vhakanana vhe vha vha vha tshi dzula henefho vha tshi vha thoma, vha vha kunda, vha vha pandamedza u swika Horoma.