NUMERI 10

₁Muṋe washu a amba na Mushe a ri, ₂“Ita phalaphala mbili dza siliva yo fuliwaho dzine wa ḓo vhidza vhathu ngadzo uri vha kuvhangane, na musi hu tshi ṱokololwa mishasha. ₃Arali phalaphala dzoṱhe vhuvhili hadzo dzi tshi lidzwa ha lapfiswa mubvumo, vhathu vhoṱhe vha kuvhangane muṋangoni wa dennde ya u ṱangana na Nṋe. ₄Hone arali hu tshi lidzwa phalaphala nthihi, zwenezwo hu kuvhangana vharangaphanḓa vha mitupo fhedzi. ₅Arali hu tshi lidzwa lwa u thoma, hu ḓo bva vha matsinde a thungo ya vhubvaḓuvha, ₆hu tshi lidzwa lwa vhuvhili, hu ḓo bva vha matsinde a thungo ya tshipembe. Ndi uri hu tshi lidzwa phalaphala vhathu vha ṱokolole mishasha, ₇hone arali hu tshi vhidzwa vhathu uri vha kuvhangane, hu lidzwa ha lapfiswa mibvumo. ₈Idzo phalaphala dzi lidzwe nga vhotshifhe vhana vha Aroni. Wonoyo ndi mulayo une na fanela u u vhulunga lini na lini.

₉“Musi ni nndwani shangoni ḽa haṋu, ni tshi lwa na swina ḽe ḽa ni thoma, lidzani phalaphala dzenedzo. Nṋe Yahavee Mudzimu waṋu ndi ḓo ni elelwa nda ni lamulela kha maswina aṋu. ₁₀Na misi ya madakalo – nga vhuṱambo ha Ṅwedzi Muswa na vhuṅwe-vho vhuṱambo haṋu no fanela u lidza idzo phalaphala musi ni tshi ṋekedza nduvho dzaṋu dzi fhiswaho na dza u konana na Nṋe. Nṋe Mudzimu waṋu ndi ḓo ni humbula ngazwo. Ndi Nṋe Yahavee Mudzimu waṋu.”

₁₁Nga ḓuvha ḽa 20 ḽa ṅwedzi wa vhuvhili nga ṅwaha wa vhuvhili tshee vhathu vha pfuluwa Egipita, gole ḽo alamaho nṱha ha dennde ya mbulungelo ya mulanga ḽa takuwa, ₁₂Vhaisraele vha thoma lwendo lwavho vha tshi bva phangani ya Sinai. Gole ḽa ḓa ḽa ima sogani ḽa Pharani.

₁₃Vha thoma u tshimbila nge Muṋe washu a vha laya nga Mushe. ₁₄Misi yoṱhe vha tshi tshimbila, vho vha vha tshi ḓi tevhekana nga nḓila yeneyo. Vhe vha ḓi ranga phanḓa ndi khethekanyo i rangwaho phanḓa nga Juda, vha tshi langwa nga Nahashoni ṅwana wa Aminadaba. ₁₅Tsinde ḽa Isakhara ḽo vha ḽi tshi langwa nga Nathaniele ṅwana wa Tsuara. ₁₆Tsinde ḽa Zebuloni ḽo vha ḽi tshi langwa nga Eliaba ṅwana wa Heloni.

₁₇Ndi hone hu tshi akhululwa dennde, ha takuwa vha mutupo wa Gerisoni na wa Mirari, vha i hwala. ₁₈Ha tevhela vha khethekanyo ya vho rangwaho phanḓa nga tsinde ḽa Rubeni, vha takuwa, tshigwada nga tshigwada, vha tshi langwa nga Elitsuru ṅwana wa Shedeuru. ₁₉Tsinde ḽa Simioni ḽo vha ḽi tshi langwa nga Shelumiele ṅwana wa Tsurishadai, ₂₀ḽa Gadi ḽi tshi langwa nga Eliasafa ṅwana wa Deuele.

₂₁Zwino ha takuwa Vhalivi vha mutupo wa Kehathi vhó hwala zwithu zwikhethwa. Musi vha tshi swika mishashani ine vha khou ya khayo, vha wana dennde yo dovha u akhiwa.

₂₂Ha tevhela vha khethekanyo ya vho rangwaho phanḓa nga tsinde ḽa Efraimi, vha takuwa, tshigwada nga tshigwada, vha tshi langwa nga Elishama ṅwana wa Amihudu. ₂₃Tsinde ḽa Manase ḽo vha ḽi tshi langwa nga Gamaliele ṅwana wa Phedatsuru, ₂₄ḽa Benyamini ḽi tshi langwa nga Abidani ṅwana wa Gidoni.

₂₅Ha fhedzisela vha khethekanyo yo rangwaho phanḓa nga tsinde ḽa Dani, vhone vho vha vhe vhalindi vha murahu vha khethekanyo dzoṱhe, vha takuwa, tshigwada nga tshigwada, vha tshi langwa nga Ahiesere ṅwana wa Amishadai. ₂₆Tsinde ḽa Ashere ḽo vha ḽi tshi langwa nga Phagiele ṅwana wa Okhorani, ₂₇ḽa Nafuthali ḽi tshi langwa nga Ahira ṅwana wa Enani. ₂₈Vhathu vho vha vha tshi tshimbila vho tevhekana nga u ralo, tshigwada nga tshigwada, musi Vhaisraele vha tshi ṱokolola mishasha vha tshi fara lwendo.

₂₉Mushe a humbela mulamu wawe Hobaba ṅwana wa Reuele wa Mumidiani a ri, “Ri ḓo ṱuwa ri tshi takuwa ra livha fhethu he Muṋe washu a ri u ḓo ri ṋea hone. O fulufhedzisa uri Vhaisraele zwi ḓo vha nakela, zwenezwo nga ri ṱuwe roṱhe, ri ḓo ni tonda-vho.”

₃₀Hobaba a fhindula a ri, “Aiwa, nṋe ndi humela ha hashu.”

₃₁Mushe a ri, “Aiwa nandi, ni songo ri ṱutshela. Ni a ḓivha hune ra nga ṱoka hone mishasha fhano sogani, ndi inwi ane na nga ri endedza. ₃₂Arali na ṱuwa na riṋe, mashudu oṱhe ane Muṋe washu a ri ṋea a ḓo vha aṋu-vho.”

₃₃Musi vhathu vha tshi ṱuwa Sinai, thavhani khethwa, vha fhedza maḓuvha mararu vha tshi khou tshimbila. Mbulungelo ya mulanga ya Muṋe washu yo ḓi vha ranga phanḓa uri i vha wanele hune vha nga ṱoka mishasha. ₃₄Vha ḓi tshimbila nga u ralo vha tshi takuwa nga matsheloni, gole ḽa Muṋe washu ḽi tshi ḓi vhonala nṱha havho masiari.

₃₅Musi mbulungelo ya mulanga i tshi takuwa, Mushe o vha a tshi ri,