NEHEMIA 1

₁Haya ndi mafhungo a Nehemia ṅwana wa Hakhalia.

Nga ṅwedzi wa Khisilevi nga ṅwaha wa 20 Arithakhesese a tshi vhusa Pheresia, nṋe Nehemia ndo vha ndi musanda Shushani. ₂Murathu wanga Hanani a swika a tshi bva Juda e na tshigwada tsha vhanna, nda vha vhudzisa nga Jerusalema na mutakalo wa Majuda vha hashu vhe vha vhuya vha tshi bva vhuthubwani Babele. ₃Vhone vha fhindula uri vho vhuyaho vhuthubwani vha khomboni khulu, na uri vhatsinda vho dzulaho tsini navho vha a vha nyadza. Vha dovha vha mmbudza uri mitsheṱo ya Jerusalema i tshee yo thuthwa, na khoro dzawo dzo fhiswa nga mulilo.

₄Nṋe nda ri u pfa izwo zwithu nda dzula fhasi nda lila. Nda fhedza maḓuvha ndo ṱungufhala ndi sa ḽi tshithu. Nda rabela phanḓa ha Mudzimu wa ṱaḓulu nda ri, ₅“Yawee Muṋe washu Mudzimu wa ḽiṱaḓulu, Mudzimu muhulu a ofhisaho! Iwe u a fulufhedzea, arali wa vhofha mulanga na vhane vha u funa vha ita zwine wa vha laya, a u vhofhololi. ₆Thetshelesa nandi, nndavhelese nandi, u pfe thabelo yanga ndi tshi rabelela vhathu vha Israele vhalanda vhau vhusiku na masiari. Ndi bula vhutshinyi he riṋe Vhaisraele ra u khakhela ngaho. Nṋe na nnḓu ya khotsi anga ro tshinya. ₇Ro tshinya, ra si tsha ita zwe wa ri laya. A ro ngo tevhedza ndayo dzau na milayo ye wa ṋea Mushe muḓinḓa wau. ₈Elelwa ndayo dze wa ṋea Mushe muḓinḓa wau u tshi ri, ‘Arali inwi vhathu vha Israele ni tshi ntshandukela, ndi ḓo ni balanganya na dziṅwe tshakha. ₉Hone arali na vhuelela kha Nṋe, na ita zwine nda ni laya na zwi tevhedza, ndi ḓo ni vhuedzedza fhethu he nda hu nanga uri dzina ḽanga ḽi dzule hone, naho no balangana u swika mugumoni wa ḽifhasi.’

₁₀“Muṋe washu, hufha vhathu avha vhe vhalanda vhau, hufha vhe vhathu vhau vhukuma. Wo vha lamulela nga maanḓa au mahulu na nga tshanḓa tshau vhukuma. ₁₁Zwino Muṋe wa zwoṱhe, thetshelesa thabelo yanga na thabelo dza vhaḓinḓa vhau vhoṱhe vhane vha takalela u u hulisa. Ita uri zwi nnakele ṋamusi, u ite uri khosi hei i ntakalele.”

Ndi uri misi iyo ndo vha ndi ndumi i ṋekedzaho khosi tshinwelo tsha waini.