LIVITIKO 9

₁Musi ho khunyeledzwa mushumo wa u vhumba vhotshifhe, hó fhela maḓuvha aḽa maṱanu na mavhili, nga matshelo Mushe a vhidza Aroni na vhana vhawe na vharangaphanḓa vha Israele. ₂Mushe a vhudza Aroni a ri, “Kha vha dzhie mbohwana na thutha dzi si na luvhadzi vha dzi ṋekedze Muṋe washu, mboho i vhe nduvho ya tshipfumelo, thutha i vhe nduvho i fhiswaho. ₃Vho no ralo vha vhudze vhathu vha Israele vha bvise mbokoṱo ya nduvho ya tshipfumelo na ṋamana ya ṅwaha muthihi na ngwana ya ṅwaha muthihi dzi si na badzi dza nduvho i fhiswaho, ₄na mbohwana na thutha dza nduvho ya u konana na Mudzimu. Nga vha dzi ṋekedze Muṋe washu dzi na nduvho ya thoro yo vangiwaho mapfura. Vho fanela u ita nga u ralo, ngauri Muṋe washu u ḓo ḓisumbedza vhone ṋamusi.”

₅Zwoṱhe zwe Mushe a vha vhudza vha zwi ḓisa phanḓa ha dennde ya u ṱangana na Mudzimu, tshivhidzo tshoṱhe tsha kuvhangana henefho uri tshi luvhe Muṋe washu. ₆Mushe a ri, “Muṋe washu o ni laya uri ni ite zwoṱhe hezwi, uri ni vhone vhugala hawe.” ₇Ndi hone a tshi vhudza Aroni a ri, “Nga vha ye aḽiṱarini vha ṋekedze nduvho ya tshipfumelo na nduvho i fhiswaho uri vha hangwelwe vhutshinyi havho vhone vhaṋe na ha vhathu. Nga vha ṋekedza nduvho heyo uri vhathu vha hangwelwe vhutshinyi havho, nga he Muṋe washu a laya.”

₈Aroni a ya aḽiṱarini a ṱhavha mbohwana ya tshipfumelo tsha u ḓipfumelela. ₉Vhana vhawe vha mu ḓisela malofha, a longa munwe wawe ngomu malofhani, a ḓodza ṋanga dzi re khuḓani dza aḽiṱari, o salaho a a shululela tsindeni ḽa aḽiṱari. ₁₀Kha aḽiṱari a fhisa mapfura na tswio na phudwane ya tshivhindi nga he Muṋe washu a laya Mushe. ₁₁Hone ṋama na mukumba a zwi fhisela nnḓa ha mishasha. ₁₂Aroni a ṱhavha tshifuwo tshe tsha vha tshi tsha nduvho ya u fhiswa ya ene muṋe. Vhana vhawe vha mu ḓisela malofha, ene a handulula masia oṱhe maṋa a aḽiṱari ngao. ₁₃Vha mu ṋekedza ṱhoho na miṅwe miraḓo ya itsho tshifuwo, a zwi fhisa kha aḽiṱari. ₁₄Ndi hone a tshi ṱanzwa miraḓo ya nga ngomu na khwanḓa dza murahu a zwi fhisa kha aḽiṱari nṱha ha nduvho yoṱhe i fhiswaho.

₁₅A ri o no ralo, a ṋekedza nduvho ya vhathu. A dzhia mbudzi ine ya vha nduvho ya tshipfumelo tsha vhathu a i ṱhavha, a i ṋekedza, sa zwe a ita a tshi ṋekedza nduvho ya tshipfumelo tsha u ḓipfumelela. ₁₆A ḓisa na tshifuwo tsha nduvho i fhiswaho, a i ṋekedza a tshi tevhedza ndayo. ₁₇A ṋekedza nduvho ya thoro, a ṱusa vhukhopfu nga tshanḓa a i fhisa kha aḽiṱari, ya engedza nduvho ya nga matsheloni i fhiswaho. ₁₈A ṱhavha mboho na thutha dza vha nduvho ya vhathu ya u konana na Mudzimu. Vhana vhawe vha mu ḓisela malofha, ene a handulula masia oṱhe maṋa a aḽiṱari ngao. ₁₉Aroni a dzhia miraḓo yo nonaho ya mboho na ya thutha, mapfura a mutshila na tswio na mapfura a dzi pilaho na phudwane ya tshivhindi, ₂₀a zwi vhea nṱha ha zwiakha zwa izwo zwifuwo, a hwala zwoṱhe a isa kha aḽiṱari. A fhisa mapfura kha aḽiṱari, ₂₁a ṋekedza Muṋe washu zwiakha na tshizwa tsha tshauḽa, nga he Mushe a mu laya.

₂₂Musi Aroni o no fhedza u ṋekedza nduvho ya tshipfumelo na ya u fhiswa na ya u konana na Mudzimu, a imisa zwanḓa a shudufhadza vhathu, a konou tsela fhasi. ₂₃Mushe na Aroni vha dzhena denndeni ya u ṱangana na Mudzimu, musi vha tshi bva, vha dovha vha shudufhadza vhathu. Ndi hone vhathu vhoṱhe vha tshi vhona vhugala ha Muṋe washu. ₂₄Muṋe washu a mbo posa mulilo kha aḽiṱari, wa fhisa nduvho i fhiswaho na miraḓo yo nonaho henefho kha aḽiṱari. Musi vhathu vha tshi zwi vhona, vha fhululedza, vha kotama vha wa nga zwifhaṱuwo.