LIVITIKO 6

₁Muṋe washu o ṋea Mushe ndayo hedzino:

₂Muthu o fanela u ṋekedza nduvho arali a khakhela Muṋe washu nga u hana u humisa tshe Muisraele wa hawe a sia tsha vha mbetshedzelo kana nga u mu tswela tshiṅwe tshithu kana nga u mu fhura ₃kana nga u zwifha a tshi amba nga tshithu tsho xelaho, a ana a ri ho ngo tshi wana. ₄Arali munna a tshinya nga u ralo a ovha mulandu, o fanela u humisa tshe a tswa kana tshe a tshi wana nga vhufhura kana tshe a vha a tshi pfi a tshi fare kana thundu yo xelaho ye a i wana, ₅kana tshifhio na tshifhio tshe a tshi anela mazwifhi. O fanela u lifha zwoṱhe a dovhe a inge tshipiḓa tshithihi kha zwiṱanu tsha mutengo watsho, zwoṱhe a zwi ṋea muṋe wazwo musi wonoyo une a ṋekedza tshipfumelo tshawe. ₆Uyo munna nga a dzhie thutha kana mbokoṱo i si na badzi a i ise ha tshifhe i ṋekedzwe Muṋe washu i vhe nduvho yawe ya ndifho. Mutengo wayo u vhe wa muelo wo tendelwaho. ₇Tshifhe u ḓo ṋekedza Muṋe washu iyo nduvho ya vha tshipfumelo tsha uyo munna, a hangwelwa.

₈Muṋe washu o laya Mushe ₉uri a ṋee Aroni na vhana vhawe ndayo hedzino dza nduvho i fhiswaho:

Nduvho i fhiswaho nga i lale kha aḽiṱari i tshi khou swa vhusiku hoṱhe, mulilo u dzule u tshi khou duga. ₁₀Ndi hone tshifhe a tshi ḓo ambara phuraphura yawe ya lukhaha na vhurukhu hawe vhupfufhi, a bvisa milora ya mapfura yo khakhaṱhelaho kha aḽiṱari, a i vhea matungo a aḽiṱari. ₁₁O no ralo a bvula izwo zwiambaro zwawe a ambara zwiṅwe, a dzhia iyo milora a i bvisa mishashani a i isa fhethu ho kumululwaho. ₁₂Mulilo u re kha aḽiṱari wo fanela u dzula u tshi khou duga u si vhuye wa dzima. Musi muṅwe na muṅwe ḽi tshi tsha tshifhe a longe khuni muliloni a fhise mapfura a nduvho ya u konana na Mudzimu. ₁₃Mulilo wo fanela u dzula u tshi khou duga kha aḽiṱari, u songo vhuya wa dzima.

₁₄Ndayo dza nduvho ya thoro ngeino:

Muṅwe wa vhotshifhe vhana vha Aroni o fanela u ṋekedza Muṋe washu nduvho ya thoro e phanḓa ha aḽiṱari. ₁₅Tshifhe a ṱuse vhukhopfu na mapfura nga tshanḓa, khathihi na zwioro zwoṱhe zwa u ṋuṋedza nduvho ya thoro, a zwi fhise kha aḽiṱari tshi vhe tshiga tsha uri zwoṱhe zwo ṋekedzwa Muṋe washu. Iyo nduvho i nukhelelaho i takadza Muṋe washu. ₁₆Aroni na vhana vhawe vha ḽe yo salaho fhethu hukhethwa, hone i ḽiwe i si na mbilisa. Vha i ḽele muṱani wa dennde ya u ṱangana na Mudzimu. ₁₇I songo bagwa i na mbilisa; ndo vha ṋea uri i vhe mukovhe wavho wa nduvho ya Yahavee ya zwiḽiwa. Iyo nduvho ndi khethwa-khethwa, u ḓi nga nduvho ya tshipfumelo na nduvho ya ndifho. ₁₈Misi yoṱhe i ḓaho vhaḓuhulu vhoṱhe vha Aroni vha vhatuka vha nga ḓi i ḽa ya ḓi vha mukovhe wavho wa zwiḽiwa zwine zwa ṋekedzwa Yahavee. Ane a vhuya a kwama nduvho ya zwiḽiwa na ene u ḓo vha tshiila.

₁₉Muṋe washu o ṋea Mushe ndayo hedzino ₂₀dza u vhumba vhotshifhe vhana vha Aroni:

Ḓuvha ḽine tshifhe a vhumbwa, a ṋekedze Muṋe washu nduvho, khilogiramu nthihi ya vhukhopfu, ine ya eḓana na nduvho ya thoro ya nga misi, hafu nga matsheloni, iṅwe nga madekwana. ₂₁I vangiwe mapfura, i bagwe nga ludongo, i ṋekedzwe tshipiḓa nga tshipiḓa, i vhe nduvho ya thoro, nduvho i nukhelelaho i takadzaho Muṋe washu. ₂₂Misi yoṱhe i ḓaho nduvho hei i ṋekedzwe nga muḓuhulu muṅwe na muṅwe wa Aroni ane a shuma e tshifhe. Nga i fhiswe yoṱhe i vhe nduvho i ṋekedzwaho Muṋe washu. ₂₃Hu songo vhuya ha ḽiwa na kupiḓa kwa nduvho ya thoro ine ya itwa nga tshifhe, i tou fhiswa yoṱhe.

₂₄Muṋe washu o laya Mushe ₂₅uri a ṋee Aroni na vhana vhawe milayo heino ya nduvho ya tshipfumelo:

Tshifuwo tsha nduvho ya tshipfumelo tshi ṱhavhelwe Muṋe washu sia ḽa devhula ḽa aḽiṱari, hune ha ṱhavhiwa zwifuwo zwa tshiṱhavhelo tshi fhiswaho. Heyo ndi nduvho khethwa-khethwa. ₂₆Tshifhe ane a ṋekedza tshiṱhavhelo tsha tshifuwo nga a tshi ḽele fhethu hukhethwa, muṱani wa dennde ya u ṱangana na Mudzimu. ₂₇Ane a vhuya a kwama ṋama ya itsho tshifuwo u ḓo vha tshiila. Arali tshipiḓa tsha tshiambaro tsha hashiwa nga malofha a itsho tshifuwo, nga tshi ṱanzwiwe fhethu hukhethwa. ₂₈Khali iṅwe na iṅwe ya vumba ine iyo ṋama ya bikwa ngayo i pwashiwe, huno arali i khali ya tsimbi, i fhaliwe i ṱukiswe nga maḓi. ₂₉Muthu wa tshinna muṅwe na muṅwe wa muṱa wa vhotshifhe a nga ḓi ḽa iyo nduvho; ndi khethwa-khethwa. ₃₀Huno arali maṅwe malofha o ḓiswa denndeni ya u ṱangana na Mudzimu, a shumiswa hu tshi tevhedzwa maitele a u pfumelela vhathu, ṋama ya itsho tshifuwo i songo ḽiwa, nga i fhiswe.