LIVITIKO 26

₁Muṋe washu o ri, “Ni songo ita zwitungulo kana na vhumba zwifanyiso na phuphu dza matombo kana matombo o vhaḓiwaho na zwi luvha. Ndi Nṋe Yahavee Mudzimu waṋu. ₂Londolani Sabatha dzanga ni hulise hukhethwa hanga. Ndi Nṋe Yahavee Mudzimu waṋu.

₃“Arali na tshila ni tshi tevhedza milayo yanga na ndayo dzanga, ₄ndi ḓo ni nisela mvula nga tshifhinga tsho teaho, shango ḽa bveledza zwe na lima na zwala, miri ya aṋwa mitshelo. ₅Zwiliṅwa zwaṋu zwi ḓo anda lune na ḓo vha ni tshi kha ḓi fhula nga tshifhinga tsha u fula nḓirivhe, nahone ni ḓo vha ni tshi kha ḓi fula nḓirivhe nga tshifhinga tsha u lima na zwala. Ni ḓo ḽa na fura, nahone ni ḓo tshila ni sa ofhi tshithu shangoni ḽaṋu.

₆“Ndi ḓo ladza shango ḽaṋu, na eḓela khofhe ni sa ofhi muthu. Ndi ḓo ṱuwisa zwivhanda zwi ofhisaho shangoni ḽaṋu, nahone a hu tsha ḓo vha na dzinndwa. ₇Ni ḓo kunda maswina aṋu na vha fhedza nga pfumo; ₈vhaṱanu vhaṋu vha ḓo kunda vhathu vha ḓana, vha ḓana vhaṋu vha ḓo kunda vhathu vha zwigidi zwa fumi vha vha vhulaha. ₉Ndi ḓo ni shudufhadza nda ni ṋea vhana vhanzhi, ndi ḓo vhulunga mulanga we nda vhofha na inwi. ₁₀Khaṋo yaṋu i ḓo anda lune ya ḓo fhedza ṅwaha woṱhe, na zwenezwo ni ḓo ita na u laṱa zwe zwa sala kha khaṋo ya kale uri zwi sendelele zwiswa. ₁₁Ndi ḓo dzula na inwi, ndi nga si ni nengwe. ₁₂Ndi ḓo vha na inwi; ndi ḓo vha Mudzimu waṋu, inwi na vha vhathu vhanga. ₁₃Nṋe Yahavee Mudzimu waṋu, ndo ni pfulusa shangoni ḽa Egipita uri ni si tsha vha dziphuli. Ndo vunḓa dzhogo ye ya vha i mitsingani yaṋu, nda ita uri ni tshimbile no onyolowa.”

₁₄Muṋe washu a isa phanḓa a ri, “Arali na nnyadza, na si tevhedze ndayo dzanga, ₁₅na nyadza milayo yanga na nengwa ndaela dzanga na si ite zwe nda ni vhudza, na pfuka mulanga we nda vhofha na inwi, ₁₆ndi ḓo ni rwa nga ṱhamu. Ndi ḓo ni ḓisela khombo dzi ofhisaho – malwadze a sa lafhei na madali a no ḓo ni swingisa, a fheṱa vhutshilo haṋu. Ni ḓo zwala mbeu dzaṋu, maswina aṋu a ḓa a ḽa zwe na lima. ₁₇Ndi ḓo ima na maswina aṋu a ni kunda, na vhuswa nga vhane vha ni vhenga, na sokou shavha hu si na ane a ni pandamedza.

₁₈“Arali ha ri ho itea zwenezwo na si nthetshelese, ndi ḓo engedza ṱhamu yaṋu kaṱanu na kavhili. ₁₉Ndi ḓo fhelisa u ḓihudza haṋu ha tshipimbi; ndi ḓo vala makole a oma unga tsimbi, mavu a omelela ḽa tou te ḽa nga tsimbitswuku. ₂₀U ḓinetisa haṋu nga u shuma hu ḓo sokou vha mahandana, zwine na zwala shangoni ḽaṋu zwi nga si vhibve, na miri i nga si aṋwe mitshelo.

₂₁“Arali na ḓi futelela u ntshandukela, na hana u nthetshelesa, ndi ḓo dovha nda engedza ṱhamu yaṋu kaṱanu na kavhili. ₂₂Ndi ḓo ni ḓisela zwivhanda zwi ofhisaho zwa vhulaha vhana vhaṋu, zwa lozwa kholomo dzaṋu, na sala ni vha si gathi, magondo aṋu a sala a si na muthu.

₂₃“Arali na ri ho itea zwenezwo na si nthetshelese, na ḓi futelela u ntshandukela, ₂₄zwenezwo Nṋe ndi ḓo ni shandukela-vho nda dovha nda engedza ṱhamu yaṋu kaṱanu na kavhili u fhira zwiḽa zwa u ranga. ₂₅Ndi ḓo ni ḓisela nndwa nda ni lifhedzela zwe na vhofholola mulanga. Arali na kuvhangana miḓini yaṋu uri ni dzumbame, ndi ḓo ni ḓisela malwadze a sa lafhei, na vhuya na ḓikumedza maswina aṋu. ₂₆Ndi ḓo ita uri ni si tsha wana zwiḽiwa, lune vhasadzi vha fumi vha ḓo baga vhurotho hoṱhe vhune vha vha naho nga ṋanḓo nthihi fhedzi. Vha ḓo vhu kovha, na ri no ḽa hoṱhe, na ḓi pfa nḓala.

₂₇“Arali ho no itea zwoṱhe hezwo na ḓi ntshandukela, na hana u nthetshelesa, ₂₈zwenezwo Nṋe ndi ḓo ni shandukela-vho ndo sinyuwa, nda dovha nda engedza ṱhamu yaṋu kaṱanu na kavhili u fhira zwiḽa zwa u thoma. ₂₉Nḓala yaṋu i ḓo hulela lune na ḓo ḽa vhana vhaṋu. ₃₀Ndi ḓo phusukanya thembele dzaṋu dza zwikwarani, nda sukumedza aḽiṱari dzaṋu dza zwioro dze huru, nda posa zwitumbu zwaṋu nṱha ha zwitungulo zwaṋu zwo thuthwaho. Ndi ḓo ni nengwa, ₃₁nda phusukanya miḓi yaṋu ya sala i matumba, nda phusukanya pfamo dzaṋu hune na luvha hone, nda landula nduvho dzaṋu. ₃₂Ndi ḓo lozwa shango ḽaṋu tshoṱhe lune maswina ane a ḓo ḽi dzhia a ḓo akhamala a tshi vhona ndozwo iyo. ₃₃Ndi ḓo ni ḓisela nndwa nda ni balanganya na mashango asili. Shango ḽaṋu ḽi ḓo sala ḽi si na muthu, miḓi yaṋu ya sala i matumba. _34-35Ndi hone shango ḽi tshi ḓo vha na miṅwaha ine ḽa ḓo awela tshoṱhe ye na vha ni sa i awedzi zwiḽa ni tshi dzula khaḽo; ḽi ḓo ṱutshelwa, ḽa sala ḽi tshi awela inwi ni vhuthubwani shangoni ḽa maswina aṋu.

₃₆“Vhathu vha haṋu vha re vhuthubwani ndi ḓo vha tshenusa lune vha tshi pfa ṱari ḽa muri ḽi tshi hwalwa nga muya vha ḓo shavha. Ni ḓo shavha unga vhathu vha no khou pandamedzwa nndwani, na wa hu si na swina tsini haṋu. ₃₇Ni ḓo khukhulana hu si na ane a ni pandamedza, na si kone u imedzana na swina na ḽithihi. ₃₈Ni ḓo fela vhuthubwani, nó milwa nga shango ḽa maswina aṋu. ₃₉Vha si gathi vhaṋu vhane vha sala u fa shangoni ḽa maswina aṋu vha ḓo fhelela nga mulandu wa vhuvhi haṋu na ha vhomakhulukuku waṋu.

₄₀“Hone vhaḓuhulu vhaṋu vha ḓo bula milandu yavho na ya vhomakhulukuku vhe vha ntshandukela vha mmvutshela, ₄₁Nṋe nda vhuya nda vha vutshela-vho nda vha isa vhuthubwani shangoni ḽa maswina avho uri ndi vhone arali vha tshi ḓo ḓiṱukufhadza vha laṱa mbilu dza tshihedeni vha tenda mulandu wavho. ₄₂Ndi hone ndi tshi ḓo elelwa mulanga we nda vhofha na Jakopo ndi tshi khwaṱhisa we nda vhofha na Isaka na we nda vhofha na Abrahamu, nda vusulusa zwe nda fulufhedzisa uri ndi ḓo ṋea vhathu vhanga shango. ₄₃Naho zwo ralo, tsha u ranga vhathu vha shango iḽo vho fanela u pfuluswa, uri ḽi awedzwe tshoṱhe nahone vho fanela u lifha mulandu wavho nga vhuḓalo wa u landula milayo yanga na u nengwa ndayo dzanga. ₄₄Hone naho zwa ralo, musi vha tshi kha ḓi vha shangoni ḽa maswina avho, a thi nga vha nyali nda vha nengwa tshoṱhe, a thi nga laṱi mulanga we nda vhofha navho; ndi Nṋe Yahavee Mudzimu wavho. ₄₅Ndi ḓo vusulusa mulanga we nda vhofha na vhomakhulukuku wavho zwiḽa ndi tshi sumbedza tshakha dzoṱhe maanḓa anga nga u pfulusa vhathu vhanga shangoni ḽa Egipita, ndi vhe Mudzimu wavho; ndi Nṋe Yahavee.”

₄₆Heyo ndi yone milayo na ndayo dze Muṋe washu a ṋea Mushe thavhani ya Sinai uri a ṋee Vhaisraele.