LIVITIKO 23

₁Muṋe washu o ṋea Mushe ₂ndayo hedzino dza vhuṱambo ha u mu luvha, musi Vhaisraele vha tshi kuvhanganela u mu rabela:

₃Ni shume mishumo yaṋu maḓuvha maṱanu na ḽithihi, hone elelwani uri ḓuvha ḽa vhuṱanu na vhuvhili, ḓuvha ḽa Sabatha, ndi ḓuvha ḽa u awela. Nga ḓuvha ḽeneḽo ni songo shuma, kuvhanganani ni luvhe. Sabatha ndi ya Muṋe washu, hoṱhe hune na dzula hone.

₄Ḓivhadzani vhuṱambo hovhuno nga zwifhinga zwo vhewaho:

₅Paseka i itelwa u hulisa Muṋe washu, i thoma ḓuvha ḽi tshi kovhela nga ḓuvha ḽa 14 ḽa ṅwedzi wa u thoma. ₆Nga ḓuvha ḽa 15 hu thoma vhuṱambo ha Vhurotho vhu si na mbilisa, ni fhedze maḓuvha maṱanu na mavhili ni sa ḽi vhurotho vhu re na mbilisa. ₇Nga ḓuvha ḽa u ranga ḽa hayo maḓuvha kuvhanganani ni luvhe, ni litshe mishumo yaṋu yoṱhe. ₈Ṋekedzani Muṋe washu nduvho ya zwiḽiwa maḓuvha maṱanu na mavhili. Nga ḓuvha ḽa vhuṱanu na vhuvhili ni dovhe ni kuvhangane ni luvhe, hone mishumo yaṋu ni i litshe.

_9-10Musi ni tshi swika shangoni ḽine Muṋe washu a khou ni ṋea ḽone, na kaṋa zwe na lima, dzhiani khaṱha ya u thoma ni ise ha tshifhe. ₁₁Tshifhe u ḓo i kumedza Muṋe washu ya vha nduvho ya u imiselwa nṱha, uri ni kone u ṱanganedzwa. Tshifhe a ṋekedze iyo nduvho nga ḓuvha ḽi tevhelaho Sabatha. ₁₂Ḓuvha ḽine na ṋekedza nduvho iyo, ni ṋekedze na thuthana ya ṅwaha muthihi i si na badzi, i vhe nduvho i fhiswaho. ₁₃Ni i ṋekedze na vhukhopfu ha khilogiramu tharu yo vangiwa mapfura a muolivi i vhe nduvho ya zwiḽiwa. Nduvho yeneyo i nukhelelaho i takadza Muṋe washu. Ni i ṋekedze na nduvho ya litha nthihi ya waini. ₁₄Ni songo ḽa na tshithihi tsha zwa khaṋo iyo ntswa, tshi nga vha tshivhisi kana tsho hadzingwa kana tsho bagwa tsha vha vhurotho, thomani ni ṋekedze Mudzimu iyo nduvho. Ndayo heyo i tevhedzwe nga vhaḓuhulu vhaṋu vhoṱhe misi yoṱhe, hoṱhe hune na dzula.

₁₅Fhedzani vhege ṱhanu na mbili dzo ḓalaho u bva ḓuvha ḽi tevhelaho Sabatha ḽine na ḓisa khaṱha ya zwe na kaṋa ngaḽo uri i ṋekedzwe Muṋe washu. ₁₆Nga ḓuvha ḽa 50, ḓuvha ḽi tevhelaho Sabatha ya vhuṱanu na vhuvhili, ni ṋekedze Muṋe washu iṅwe nduvho ntswa ya zwe na kaṋa. ₁₇Muṱa muṅwe na muṅwe u ḓise mikonde mivhili ya vhurotho, vha i ṋekedze Muṋe washu i vhe nduvho ya u imiselwa nṱha. Mukonde muṅwe na muṅwe u itwe khilogiramu tharu dza vhukhopfu ho bagwa na mbilisa, dzi ṋekedzwe Muṋe washu dzi vhe nduvho ya zwiliṅwa zwa u thoma zwe zwa kaṋiwa. ₁₈Vhathu vha ṋekedze ngwana ṱhanu na mbili dza ṅwaha muthihi na mboho nthihi na mbokoṱo mbili dzi si na badzi, khathihi na uho vhurotho. Zwi ḓo ṋekedzwa Muṋe washu zwa vha nduvho i fhiswaho khathihi na nduvho ya thoro na nduvho ya waini. Nduvho iyo i nukhelelaho i takadza Muṋe washu. ₁₉Ni ṋekedze na mbokoṱo nthihi i vhe nduvho ya tshipfumelo na thuthana mbili dza ṅwaha muthihi i vhe nduvho ya u konana na Mudzimu. ₂₀Tshifhe nga a ṋekedze Muṋe washu nduvho ya uho vhurotho na idzo ngwana mbili i nduvho ya u imiselwa nṱha. Nduvho hedzo ndi khethwa, dzi ḽiwa nga vhotshifhe. ₂₁Nga ḓuvha heḽo ni litshe mishumo yaṋu i lemelaho, kuvhanganani ni luvhe. Vhaḓuhulu vhaṋu vha tevhedze ndayo heino misi yoṱhe, hoṱhe hune vha vha hone. ₂₂Musi ni tshi kaṋa masimu aṋu, ni songo tshea zwe na lima lumemeni lwa masimu, nahone ni songo huma na yo tshea ṱhotshe dzo salaho; izwo zwi sieleni vhashai na vhatsinda: Muṋe washu ndi Mudzimu waṋu.

_23-24Ḓuvha ḽa u thoma ḽa ṅwedzi wa vhuṱanu na vhuvhili ḽi fanela u vha ḓuvha ḽa u awela, ḽa u humbula Mudzimu. Nga heḽo ḓuvha vhathu vha kuvhangane vhó rambiwa nga phalaphala. ₂₅Vha litshe mishumo yavho yoṱhe i lemelaho vha ṋekedze Muṋe washu nduvho ya zwiḽiwa. _26-27Ḓuvha ḽa fumi ḽa ṅwedzi wa vhuṱanu na vhuvhili ndi ḓuvha ḽa u pfumelela vhathu vhutshinyi havho. Musi wonoyo ni kuvhangane ni luvhe, ni ḓiṱukufhadze, ni ṋekedze Muṋe washu nduvho ya zwiḽiwa. ₂₈Ni songo shuma tshithu nga ḓuvha heḽo, ngauri ndi ḓuvha ḽa u pfumelela vhutshinyi haṋu he na khakhela Muṋe washu Mudzimu waṋu. ₂₉Muthu ane a ḽa tshiṅwe tshithu nga ḓuvha heḽo ha tsha ḓo vhalwa na vhathu vha Muṋe washu. ₃₀Nahone muthu ane a shuma nga heḽo ḓuvha, Muṋe washu Ene muṋe u ḓo mu vhulaha. ₃₁Ndayo hei i kwama vhaḓuhulu vhaṋu vhoṱhe, hoṱhe hune vha vha hone: Nga heḽo ḓuvha a hu shumiwi. ₃₂U thoma ḓuvha ḽi tshi kovhela nga ḓuvha ḽa vhuṱanu na vhuṋa ḽa ṅwedzi ḓuvha ḽa vhuya ḽa kovhela nga ḓuvha ḽa fumi ni sedze ḓuvha heḽo ḽi vhe ḓuvha ḽa u awela, nga ḓuvha ḽeneḽo hu songo ḽiwa tshithu.

_33-34Vhuṱambo ha Muṋe washu ha Mishasha vhu thoma nga ḓuvha ḽa 15 ḽa ṅwedzi wa vhuṱanu na vhuvhili ha fhedza maḓuvha maṱanu na mavhili. ₃₅Nga ḓuvha ḽa u ranga ḽa hayo maḓuvha kuvhanganani ni luvhe, ni litshe mishumo yaṋu i lemelaho. ₃₆Ḓuvha ḽiṅwe na ḽiṅwe ḽa hayo maḓuvha maṱanu na mavhili ni ṋekedze Muṋe washu nduvho ya zwiḽiwa. Nga ḓuvha ḽa vhuṱanu na vhuraru ni dovhe ni kuvhangane ni luvhe, ni ṋekedze Muṋe washu nduvho ya zwiḽiwa. Ndi ḓuvha ḽa u luvha, ni songo shuma tshithu.

₃₇Hovhu ndi vhuṱambo ho vhewaho ha u hulisa Muṋe washu nga u kuvhanganela u mu luvha na u mu ṋekedza nduvho dza zwiḽiwa na nduvho dzi fhiswaho na nduvho dza thoro na zwiṱhavhelo na nduvho dza waini, nga he ha vhetshelwa ḓuvha ḽiṅwe na ḽiṅwe. ₃₈Vhuṱambo hoho ndi ha u ḓadzisa Dzisabatha dza nga misi, na nduvho hedzo ndi dza u ḓadzisa nduvho dzaṋu dza nga misi, dza u khunyeledza miano na dzine na bvisa nga u tou funa na dzi ṋekedza Muṋe washu.

₃₉Musi no no kaṋa masimu aṋu, itani vhuṱambo hoho ha Muṋe washu ni fhedze maḓuvha maṱanu na mavhili, ni thome nga ḓuvha ḽa 15 ḽa ṅwedzi wa vhuṱanu na vhuvhili. Ḓuvha ḽa u ranga ḽi ḓo vha ḓuvha ḽa u awela. ₄₀Nga ḓuvha ḽeneḽo fulani miṅwe mitshelo i fhiraho yoṱhe mirini yaṋu, ni dzhie matavhi a mutshevho na matavhi a miri ya maṱari na a miṋengeledzi, ni ite vhuṱambo haṋu na fhedza maḓuvha maṱanu na mavhili ni tshi ḓiphiṋa nga Muṋe washu Mudzimu waṋu. ₄₁Itani vhuṱambo uho ni fhedze maḓuvha maṱanu na mavhili. ₄₂Vhathu vhoṱhe vha Israele nga vha dzule mishashani vha fhedze maḓuvha maṱanu na mavhili, ₄₃uri vhaḓuhulu vhaṋu vha ḓivhe uri Muṋe washu o ita uri vhathu vha Israele vha dzule mishashani musi a tshi vha pfulusa shangoni ḽa Egipita. Ndi Ene Muṋe washu Mudzimu waṋu.

₄₄Ngauralo Mushe a ḓivhadza Vhaisraele vhuṱambo ho vhewaho ha Muṋe washu.