LIVITIKO 14

₁Muṋe washu o ṋea Mushe ₂ndayo hedzino dza u kumulula muthu o fhodzwaho vhulwadze ha lukanda vhu kumadzaho:

Musi une a pfi o kuna, nga a ḓiswe ha tshifhe, ₃tshifhe nga a bvele nae nnḓa ha mishasha a mu sedze. Arali uho vhulwadze ho fhola, ₄tshifhe u ḓo ri nga hu ḓiswe zwiṋoni zwivhili zwo kunaho zwi tshi tshila, khathihi na kutanda kwa mukedara na ludede lutswuku na davhi ḽa muhisopo. ₅Tshifhe nga a ri tshiṅwe tshiṋoni tshi shidzhelwe kha sambelo ḽa vumba ḽi re na maḓi a tshisima. ₆Nga a dzhie tshiḽa tshiṅwe tshiṋoni a tshi mbwandamedze malofhani a tshiḽa tshiṋoni tsho shidzwaho, khathihi na kutanda kwa mukedara na ludede lutswuku na muhisopo. ₇Nga a handulule uyo muthu a no khou kumululwa vhulwadze ha lukanda, a mu handulule nga malofha, a ite kaṱanu na kavhili, a ḓivhadze uri uyo muthu o kumululwa. Zwenezwo nga a litshe itsho tshiṋoni tshi tshilaho tshi fhufhe tshi ye ḓakani. ₈Uyo muthu nga a ṱanzwe zwiambaro zwawe, a palule ṱhoho yoṱhe, a ṱambe muvhili nga maḓi, ndi hone a tshi ḓo vha o kuna. Uyo muthu a nga ḓi dzhena mishashani, hone a dzule nnḓa ha dennde a fhedze maḓuvha maṱanu na mavhili. ₉Nga ḓuvha ḽa vhuṱanu na vhuvhili a dovhe a palule ṱhoho yawe na ndebvu na tsie na mahaha oṱhe a re muvhilini wawe, a kuvhe zwiambaro zwawe, a ṱambe muvhili, ndi hone a tshi ḓo vha o kuna.

₁₀Nga ḓuvha ḽa vhuṱanu na vhuraru a ḓise thuthana mbili na ngwana nthihi ya tsadzi ya ṅwaha muthihi i si na luvhadzi, na khilogiramu ṱhanu dza vhukhopfu dzo vangiwa mapfura a muolivi, na hafulitha ya mapfura a muolivi. ₁₁Tshifhe u ḓo dzhia uyo munna na idzo nduvho a mu imisa phanḓa ha Muṋe washu muṋangoni wa dennde ya u ṱangana na Mudzimu. ₁₂Zwenezwo tshifhe u ḓo dzhia iṅwe ya idzo thuthana a i ṋekedza khathihi na hafulitha ya mapfura ya vha nduvho ya mulifho. U ḓo zwi ṋekedza Muṋe washu nga u zwi imisela nṱha ya vha nduvho i imiselwaho nṱha. ₁₃Nga a ṱhavhe iyo ngwana fhethu hukhethwa hune ha ṱhavhiwa zwifuwo zwa nduvho ya tshipfumelo na nduvho i fhiswaho. O fanela u ralo ngauri nduvho ya mulifho, u ḓi nga nduvho ya tshipfumelo, ndi ya tshifhe nahone ndi khethwa-khethwa. ₁₄Tshifhe u ḓo dzhia maṅwe malofha a ngwana a a ḓodza kha ṱhodzi ya nḓevhe ya tshauḽa ya uyo munna ane a ḓo pfi o kumululwa, na kha gunwe ḽawe ḽa tshanḓa tshauḽa na kha gunwe ḽawe ḽa lwayo lwa tshauḽa. ₁₅Ndi hone tshifhe a tshi ḓo dzhia mapfura a muolivi a a shela ngomu ha tshanḓa tsha ene muṋe tshamonde, ₁₆a ṋanga munwe wa musumbavhaloi wa tshanḓa tshawe tshauḽa khao, a handulula kaṱanu na kavhili henefho phanḓa ha Muṋe washu. ₁₇A konou dzhia mapfura o salaho ngomu ha tshanḓa tshawe na maṅwe malofha a ngwana, a ḓodza kha ṱhodzi ya nḓevhe ya tshauḽa ya uyo munna ane a ḓo pfi o kumululwa, na kha gunwe ḽawe ḽa tshanḓa tshauḽa na kha gunwe ḽawe ḽa lwayo lwa tshauḽa. ₁₈Tshifhe u ḓo dzhia mapfura o salaho ngomu tshanḓani tshawe a ḓodza ṱhoho ya uyo munna. Ngauralo u ḓo vha o mu pfumelela ha Muṋe washu.

₁₉Ndi hone tshifhe a tshi ḓo ṋekedza nduvho ya tshipfumelo, a pfumelela uyo ane a kumululwa. Ho no fhela izwo tshifhe u ḓo ṱhavha tshifuwo tsha nduvho i fhiswaho, ₂₀a i ṋekedza na nduvho ya thoro kha aḽiṱari. Ngauralo u ḓo vha o pfumelela uyo muthu a kumuluwa. ₂₁Arali uyo munna e mushai, a sa koni u bvisa zwingafho, tsha u mu kumulula nga a bvise thuthana nthihi fhedzi ya nduvho ya mulifho i ṋekedzwe Muṋe washu tshi vhe tshipfumelo tshawe, a ḓise khilogiramu nthihi fhedzi ya vhukhopfu ho vangiwa mapfura a muolivi ha nduvho ya thoro na hafulitha ya mapfura a muolivi. ₂₂A ḓise na maivha mavhili, ḽiṅwe ḽi vhe ḽa nduvho ya tshipfumelo, ḽiṅwe ḽi vhe ḽa nduvho i fhiswaho. ₂₃Nga ḓuvha ḽa vhuṱanu na vhuraru ḽa u kumululwa hawe a a ḓise ha tshifhe phanḓa ha Muṋe washu muṋangoni wa dennde ya u ṱangana na Mudzimu. ₂₄Tshifhe u ḓo dzhia iyo thuthana na mapfura a muolivi a zwi ṋekedza Muṋe washu i nduvho i imiselwaho nṱha. ₂₅Ndi hone tshifhe a tshi ḓo ṱhavha iyo thuthana, a dzhia maṅwe malofha a ḓodza ṱhodzi ya nḓevhe ya uyo munna ya tshauḽa na kha gunwe ḽawe ḽa tshanḓa tshauḽa na kha gunwe ḽawe ḽa lwayo lwawe lwa tshauḽa, ₂₆a ḓo konou shela maṅwe mapfura ngomu ha tshanḓa tsha ene muṋe tshamonde, ₂₇a mbwandamedza munwe wawe wa musumbavhaloi wa tshanḓa tshauḽa a handulula ngao kaṱanu na kavhili henefho phanḓa ha Muṋe washu, ₂₈maṅwe mapfura a a ḓodze henefhaḽa he a ḓodza malofha: kha ṱhodzi ya nḓevhe ya tshauḽa ya uyo munna na kha gunwe ḽawe ḽa tshanḓa tshauḽa na kha gunwe ḽawe ḽa lwayo lwa tshauḽa. ₂₉Mapfura o salaho ngomu tshanḓani tshawe u ḓo a ḓodza ṱhoho ya uyo munna ane a kumululwa, ngauralo u ḓo vha o pfumelela uyo munna ha Muṋe washu. ₃₀Tshifhe o no ralo u ḓo ṋekedza ḽiṅwe ḽiivha, ₃₁ḽa vha nduvho ya tshipfumelo, ḽiṅwe ḽa vha nduvho i fhiswaho khathihi na nduvho ya thoro. Ngauralo tshifhe u ḓo vha o pfumelela uyo mukumululwa ha Muṋe washu. ₃₂Hedzo ndi ndayo dza munna a re na vhulwadze ha lukanda vhu kumadzaho ane a kundwa u bvisa nduvho dzo teaho dzine dza ṱoḓea uri a kumululwe.

₃₃Muṋe washu o ṋea Mushe na Aroni ₃₄ndayo hedzino nga nnḓu dzo nambatelwaho nga muunda wo endelelaho. Hezwo zwo thoma u tevhedzwa musi Vhaisraele vho no dzhena shangoni ḽa Kanana ḽe Muṋe washu a ri u ḓo vha ṋea ḽa vha ḽavho.

₃₅Muṅwe na muṅwe ane a vhona muunda wo nambatela nnḓu yawe o fanela u yo vhudza tshifhe nga ayo mafhungo. ₃₆Tshifhe u ḓo ri nga hu bviswe thundu yoṱhe afho nḓuni ene a sa athu yo sedza uho vhulwadze ha muunda, zwithu zwoṱhe zwi re afho nḓuni zwi sa ḓo pfi zwo kumala. Ndi hone a tshi ḓo kona u ya afho nḓuni ₃₇a sedza uyo muunda. Arali hu na zwivhala zwi no nga zwidala kana zwitswuku zwine zwa nga zwi khou ṱahadza luvhondo, ₃₈tshifhe u ḓo ṱutshela iyo nnḓu a i hoṋa ha fhela maḓuvha maṱanu na mavhili. ₃₉Nga ḓuvha ḽa vhuṱanu na vhuvhili u ḓo dovha a yo i sedza. Arali uyo muunda wo endelela, ₄₀u ḓo ri matombo e ha wanala muunda khao a sudzuluswe, a poswe fhethu ha dzitshika nnḓa ha muḓi. ₄₁Ngavhuya u ḓo ri hu fhaliwe mbondo dza nga ngomu, galaga i poswe fhethu ha dzitshika nnḓa ha muḓi. ₄₂Zwenezwo ho fanela u vhewa maṅwe matombo a u thivha aḽa e a sudzuluswa, mbondo dzi hulungwe nga galaga ntswa.

₄₃Arali muunda wa dovha wa vhonala ngomu nḓuni iyo musi matombo o no sudzuluwa, nnḓu yo no fhaliwa ya hulungwa, ₄₄tshifhe u ḓo ya a sedza. Arali wo endelela, iyo nnḓu i ḓo vha yo kumala. ₄₅Yo fanela u wisiwa, matombo ayo na thanda dzayo na galaga yayo yoṱhe zwo fanela u hwalelwa nnḓa ha muḓi zwi iswe fhethu ha dzitshika. ₄₆Ane a dzhena nḓuni iyo i tshi kha ḓi vha yo hoṋiwa u ḓo vha o kumala ḽa vhuya ḽa kovhela. ₄₇Ane a lala nḓuni iyo kana a ḽela ngomu hayo o fanela u kuvha zwiambaro zwawe.

₄₈Arali tshifhe a tshi ḓa u sedza a wana muunda u songo dovha wa vhuya u bva tshee nnḓu iyo ya hulungwa hafhu, u ḓo ḓivhadza uri iyo nnḓu yo kumululwa, ngauri muunda wo bviswa tshoṱhe. ₄₉Tshifhe a tshi kumulula iyo nnḓu nga a dzhie zwiṋoni zwivhili na kutanda kwa mukedara na ludede lutswuku na davhi ḽa muhisopo. ₅₀Nga a shidzhele tshiṅwe tshiṋoni ludongoni lwa vumba lu re na maḓi a tshisima. ₅₁Ndi hone a tshi ḓo kona u dzhia kutanda kwa mukedara na muhisopo na ludede lutswuku na tshiṋoni tshiḽa tshi tshilaho a zwi mbwandamedza malofhani a tshiḽa tshiṋoni tshe tsha shidzhiwa na maḓini a no bva tshisimani, a handulula iyo nnḓu kaṱanu na kavhili. ₅₂Ngauralo u ḓo vha o kumulula iyo nnḓu nga malofha a tshiṋoni na maḓi a tshisima na tshiṋoni tshi tshilaho na thanda ya mukedara na muhisopo na ludede lutswuku. ₅₃O no ralo a konou litsha tshiḽa tshiṋoni tsha fhufha tsha bva muḓini tsha ya ḓakani. Ngauralo u ḓo vha o pfumelela iyo nnḓu, ya sala yo kumuluwa.

₅₄Hedzo ndi dzone ndayo dza vhulwadze ha lukanda vhu kumadzaho na ha phaḓi ₅₅na muunda wo nambatelaho zwiambaro kana ngomu nḓuni, ₅₆na tshitshimbili na zwilonda kana tshivhala tshi penyaho, ₅₇u vhona arali tshithu tsho kumuluwa kana tshi tshee tsho kumala.

Hedzo ndi dzone ndayo dza vhulwadze ha lukanda vhu kumadzaho na muunda kha zwiambaro.