JOBO 11

₂A hu na ane a nga fhindula mafhafhaḓo aya?

Kani u ravhaḓa ndi hone hune ha ṱanzwa muthu mulandu?

₃Jobo, ni vhona unga u lopola haṋu hu nga ri runga milomo?

Ni vhona unga ni tshi nzhonzhowedza

a ri koni u ni kaidza?

₄Ni ri zwine na amba ndi ngoho?

Na ri no ṱamba maṱoni a Mudzimu?

₅Ngavhe Mudzimu Ene muṋe a tshi ni fhindula,

a amba a ni kaidza.

₆O vha a tshi ḓo ni dzumbululela zwiphiri zwa vhuṱali,

na konou ṱalukanya uri zwi kanukisa hani.

Ḓivhani uri Mudzimu u khou ni rwa nga ṱhamu ṱhukhu.

₇Zwiphiri zwa Mudzimu ni nga zwi swikela naa?

Hune Ramaanḓaoṱhe a guma ni nga hu hovhelela naa?

₈Zwo hula u fhira makole –

inwi ni nga itani?

Zwo tsisa u fhira vhudzulavhafu –

inwi ni ḓivha mini?

₉Zwo hula u fhira ḽifhasi;

zwo ṱanḓavhuwa u fhira lwanzhe.

₁₀Arali Mudzimu a ni fara a ni isa tsengoni,

ndi nnyi ane a nga mu dzivhisa?

₁₁Ene u ḓivha u sa ḓivhalea ha vhathu;

u vhona vhuvhi havho hoṱhe,

á songo vhuya a sedzesa.

₁₂Madodo a ḓo thoma u ṱalifha

mbiḓi dzi tshi vho dzwala vhathu.

₁₃Vhuedzedzani mbilu yaṋu vhudzuloni;

luvhani Mudzimu;

₁₄laṱani vhuvhi vhu re zwanḓani zwaṋu;

hayani haṋu ni songo tendela vhutshinyi;

₁₅ndi hone ni tshi ḓo ḓipfa ni si na valuvalu,

na ḓo ima no khwaṱha ni sa ofhi tshithu;

₁₆ndi hone maṱungu aṋu oṱhe a tshi ḓo fhufha,

ni tshi a elelwa na vhona

a tshi nga mikumbela ye ya ela ya fhira;

₁₇ndi hone vhutshilo haṋu vhu tshi ḓo nga tshedza,

ha fhira ḓuvha ḽi vhukati ha ṱhoho,

swiswi ḽa nga mapfuvhi a tshi tswuka.

₁₈Ni ḓo pfa ni na fulufhelo ni sa ofhi tshithu;

ni tshi sedza zwa muḓi waṋu

ni ḓo wana zwoṱhe zwo naka,

na yo lala no rudza mbilu,

₁₉na eḓela ni sa ofhi swina;

vhathu vhanzhi vha ḓo ni luvhelela.

₂₀Vhavhi vhone vha ḓo pfa vho kulea nungo;

a vha nga wani nzanyo ya u ponyoka vha shavha,

tshavho hu ḓo vha u tou lindela lufu.