VHARANGAPHANḒA 13

₁Vhaisraele vha dovha vha khakhela Muṋe washu, Ene a litsha Vhafilista vha vha vhusa ha vhuya ha fhela miṅwaha ya 40.

₂Misi yeneyo ho vha hu na munna we a vha a tshi pfi Manua a tshi bva muḓini wa Tsora. O vha e wa tsinde ḽa Dani. Musadzi wawe o vha e muumba, a si na ṅwana. ₃Muruṅwa wa Muṋe washu a ḓivhonadza kha uyo musadzi a ri, “U muumba, a u na ṅwana, hone u ḓo vha muthu wa thovhela wa beba ṅwana wa mutukana. ₄U vhone u si nwe waini kana halwa kana wa ḽa zwiḽiwa zwo iledzwaho, ₅ngauri u ḓo vha muthu wa thovhela wa beba ṅwana wa mutukana. A songo vhuya a geriwa mavhudzi, ngauri musi wonoyo une a bebwa u ḓo kumedzwa Mudzimu a vha munaziri. Ene u ḓo vha ene wa u thoma u lamukisa Vhaisraele kha Vhafilista.”

₆Ndi hone uyo musadzi a tshi ṱuwa a ya ha munna wawe a ri, “Ho ḓa muḓinḓa wa Mudzimu kha nṋe; o vha a tshi ofhisa a tshi nga muruṅwa wa Mudzimu. A tho ngo mu vhudzisa hune a bva hone, na ene ho ngo mmbudza uri u pfi nnyi. ₇O mmbudza uri ndi ḓo vhifha muvhilini nda beba ṅwana wa mutukana. A mmbudza uri ndi songo nwa waini kana halwa kana nda ḽa zwo iledzwaho, ngauri uyo mutukana u ḓo kumedzwa Mudzimu a vha munaziri u bva hanani u swika a tshi fa.”

₈Ndi hone Manua a tshi rabela Muṋe washu a ri, “Yawee Muṋe washu, ndi a u humbela, ita uri muḓinḓa uḽa wa Mudzimu we wa mu ruma a vhuye kha riṋe a ri funze kualusele kwa uyo mutukana ane a ḓo bebwa.”

₉Mudzimu a ita zwe Manua a mu humbela, Muruṅwa wawe a dovha a vhuelela kha uyo musadzi a wana o dzula masimuni, munna wawe Manua a si nae. ₁₀Uyo musadzi a mbo ḓi gidima a yo vhudza munna wawe a ri, “Munna uḽa we a ḓisumbedza nṋe ḽiḽa ḓuvha, u fhano!”

₁₁Manua a takuwa a tevhela musadzi wawe. A ya ha uyo munna a vhudzisa a ri, “Ndi vhone vhe vha amba na mufumakadzi wanga?”

Uyo munna a fhindula a ri, “Ndi nṋe.”

₁₂Ndi hone Manua a tshi vhudzisa a ri, “Hu tshi khunyelela zwe vha amba, uyo mutukana o fanela u itani? O fanela u tshila hani?”

₁₃Muruṅwa wa Muṋe washu a fhindula a ri, “Musadzi wau a vhone uri zwoṱhe zwe nda u laya zwi itwe. ₁₄A songo ḽa na tshithihi tshine tsha bva kha munḓirivhe, a songo nwa waini kana halwa kana a ḽa zwiḽiwa zwo iledzwaho. A ite zwoṱhe zwe nda mu laya.”

₁₅Manua a vhudza Muruṅwa wa Muṋe washu a ri, “Vha songo ṱuwa zwino, nga vha dzule ri range u vha ṱhavhela mbudzana.”

₁₆Muruṅwa wa Muṋe washu a fhindula a ri, “Naho na mpfareledza, a thi nga ḽi zwiḽiwa zwaṋu, hone arali na ita tshiṱhavhelo tshi fhiswaho, tshi ṋekedzeni Yahavee.” Manua ho ngo zwi ḓivha uri ndi Muruṅwa wa Muṋe washu.

₁₇Manua a vhudzisa a ri, “Vhone vha pfi nnyi? Ri itela u vha livhuha musi zwe vha amba zwi tshi khunyelela.”

₁₈Muruṅwa a fhindula a ri, “Ndi mini u tshi mmbudzisa dzina? Ndi dzina ḽi sa ṱalukanyei.”

₁₉Ndi hone Manua a tshi dzhia mbudzana khathihi na nduvho ya thoro a zwi vhea kha aḽiṱari ya tombo, a zwi ṋekedza Muṋe washu. Muṋe washu a ita tshimangadzo Manua na musadzi wawe vho ḓi sedza: ₂₀Musi khavhu i tshi duga i tshi bva kha aḽiṱari yo livha ṱaḓulu, Muruṅwa wa Muṋe washu a mbo ḓi gonya ṱaḓulu e khayo. Manua na mufumakadzi wawe vha tshi vhona izwo vha mbo ḓi wa nga zwifhaṱuwo. ₂₁Musi Manua na mufumakadzi wawe vha si tsha vhona uḽa Muruṅwa wa Muṋe washu, ha vha hone Manua a tshi zwi ḓivha uri ndi Muruṅwa wa Muṋe washu.

₂₂Manua a amba na mufumakadzi wawe a ri, “Vhukumakuma ri ḓo fa ngauri ro vhona Mudzimu!”

₂₃Hone mufumakadzi wawe a fhindula a ri, “Arali Muṋe washu o vha a tshi funa u ri vhulaha o vha a sa ḓo ṱanganedza tshiṱhavhelo na nduvho zwe ra mu ṋekedza, o vha a sa ḓo ri sumbedza zwithu hezwi zwoṱhe kana a ri vhudza zwo raliho.”

₂₄Musadzi wa Manua a sala a tshi beba ṅwana a ri u pfi Simisoni. Ṅwana a aluwa, Muṋe washu a mu shudufhadza. ₂₅Muya wa Muṋe washu a thoma u mu ritha musi e Mishashani ya Dani vhukati ha Tsora na Eshthaolo.