GENESI 28

₁Isaka a vhidzisa Jakopo, a mu shudufhadza, a mu laya a ri, “U songo vhinga musadzi wa Mukanana. ₂Ṱavhanya u mbo ḓi ya Phadani Aramu, muṱani wa Bethuele khotsi a mme au. Ḓiwanele musadzi henefho, kha vhananyana vha Labani malume wau. ₃Ngavhe Mudzimu Ramaanḓaoṱhe a tshi u shudufhadza, a ita uri u bebe, vhana vhau vha ande, u vhe khotsi a tshakha nnzhi. ₄Ngavhe iwe na vhaḓuhulu vhau a tshi vha ṋea mashudu a Abrahamu, uri u dzhie shango ḽine zwino wa khou dzula khaḽo u mutsinda, shango ḽe Mudzimu a ḽi ṋea Abrahamu.” ₅Ndi hone Isaka a tshi ri Jakopo a ṱuwe, a ṱuwa a ya Phadani Aramu, ha Labani ṅwana wa Bethuele wa Muaramu. Labani ndi khaladzi a Rabeka, mme a Jakopo na Esau.

₆Zwino Esau a zwi pfa uri Isaka o shudufhadza Jakopo a mu ruma Phadani Aramu uri a yo wana musadzi hone, na uri a tshi mu shudufhadza o mu laya a ri, “U songo vhinga musadzi wa Mukanana,” ₇a pfa na uri Jakopo o thetshelesa khotsi awe na mme awe a ya Phadani Aramu. ₈Esau a thoma u vha na nzhele ya uri vhasadzi vha Vhakanana a vha takadzi khotsi awe Isaka. ₉Zwenezwo a ya ha Ishmaele a vhinga Mahalathi khaladzi a Nebayotho, ṅwana wa Ishmaele ṅwana wa Abrahamu, na vhaḽa vhaṅwe vhasadzi vhawe a ḓi dzula navho.

₁₀Jakopo a takuwa Bierisheba a livha Harani. ₁₁A ri u kovhelelwa huṅwe fhethu, a lala henefho. A dzhia ḽiṅwe tombo henefho a siamela, a eḓela. ₁₂A lora a tshi khou vhona nḓila ya tshitizi tsho ima fhasi, nga nṱha hayo i tshi swika makoleni, vharuṅwa vha Mudzimu vha tshi gonya vha tshi tsa ngayo. ₁₃Ngei nṱha hayo ho vha ho ima Muṋe washu, a ri, “Ndi Nṋe Yahavee Mudzimu wa makhulu wau Abrahamu, Mudzimu wa Isaka. Shango ḽe wa lala khaḽo ndi ḓo ḽi ṋea iwe na vhaḓuhulu vhau. ₁₄Vhaḓuhulu vhau vha ḓo anda unga thorwana dza mavu, na ḓala ni tshi ya vhukovhela na vhubvaḓuvha, ni tshi ya devhula na tshipembe. Vhathu vhoṱhe vha ḽifhasi vha ḓo wana mashudu nga iwe na vhana vhau. ₁₅Nṋe ndi na iwe, ndi ḓo u londola hoṱhe hune wa ya, nda u vhuisa shangoni heḽino. A thi nga u litshi; ndi ḓo vhuya nda khunyeledza zwe nda u fulufhedzisa.”

₁₆Musi Jakopo a tshi vuwa khofheni a elekanya a ri, “Vhukumakuma Muṋe washu u hone hafhano fhethu; nṋe ndo vha ndi sa zwi ḓivhi.” ₁₇A farwa nga nyofho a ri, “Fhethu afha hu ofhisa hani! Hafhano ndi nḓuni ya Mudzimu, a hu na zwiṅwe; hei ndi khoro ya ḽiṱaḓulu.”

₁₈Ḽi tshi tsha Jakopo a fhinduwa a dzhia tombo ḽe a vha o ḽi siamela, a ḽi imisa sa phuphu a ḽi tevhulela mapfura. ₁₉Fhethu afho a ri hu pfi Bethele (Nnḓu ya Mudzimu). Kale muḓi wo vha u tshi pfi Lusi. ₂₀Ndi hone Jakopo a tshi ana a ri, “Arali Mudzimu a vha na nṋe, a nndondola lwendoni ulu lwe nda lu fara, a mpha zwiḽiwa nda ḽa, na zwiambaro nda ambara, ₂₁nda vhuya nda humela muṱani wa khotsi anga nga mulalo, ndi hone Muṋe washu a tshi ḓo vha Mudzimu wanga, ₂₂tombo heḽi ḽe nda ḽi imisa sa phuphu ḽi ḓo vha nnḓu ya Mudzimu; zwoṱhe zwine a ḓo nṋea ndi ḓo mu ṋea tsha fumi tshazwo.”