Isaka a tshi dzula Gerara
1Zwino afho shangoni ha wa nḓala – i si iḽa nḓala ya misi ya Abrahamu – Isaka a pfulutshela Gerara shangoni ḽa Abimelekhe khosi ya Vhafilista. 2Muṋe washu a ḓa ha Isaka a ri, “U songo tsela Egipita; dzula henefha shangoni ḽine nda u vhudza uri u dzule hone. 3Dzula hafhano shangoni heḽi tshifhinganyana, Nṋe ndi ḓo vha na iwe nda u shudufhadza. Mashango haya oṱhe ndi ḓo a ṋea iwe na vhaḓuhulu vhau, nda khwaṱhisa muano we nda anela khotsi au Abrahamu. 4Ndi ḓo andisa vhaḓuhulu vhau vha nga ṋaledzi dza lutomboni, nda vha ṋea mashango haya oṱhe; vhathu vhoṱhe vha ḽifhasi vha ḓo wana mashudu nga vhana vhau, 5nge Abrahamu a nthetshelesa, a ita zwine nda zwi ṱoḓa na zwe nda mu vhudza, a vhulunga milayo yanga.”
6Zwenezwo Isaka a dzula Gerara. 7Musi vhathu vha henefho fhethu vha tshi mu vhudzisa nga musadzi wawe, ene a ri, “Ndi khaladzi anga,” nge a vha a tshi ofha u ri, “Ndi musadzi wanga.” A humbula a ri, “Rabeka o naka; vhanna vha fhano vha nga mmbulaha.”
8Musi Isaka o no vha na maḓuvha e henefho, Abimelekhe khosi ya Vhafilista a ṱodzimela nga fasiṱere, a vhona Isaka a tshi khou vhanḓa musadzi wawe Rabeka. 9Ndi hone Abimelekhe a tshi vhidzisa Isaka a ri, “Vhukumakuma hoyu ndi musadzi waṋu! Ndi mini no ri ndi khaladzi aṋu?”
Isaka a mu fhindula a ri, “Ndi nge nda humbula uri ndi nga vhulahelwa ene.”
10Abimelekhe a ri, “Edzonu vhona zwe na nnyita! Muṅwe wa avha vhanna o vha a tshi nga ḓi dzhenisa musadzi waṋu nḓuni, na vha no ri hwesa mulandu.” 11Ndi hone Abimelekhe a tshi vhudza vhathu vhoṱhe a ri, “Ane a vhuya a kwama uyu munna kana musadzi wawe, vhukumakuma u ḓo vhulawa.”
Vivho ḽa Vhafilista
12Isaka a lima shangoni ḽeneḽo, ṅwaha u tshee wonoyo a kaṋa kaḓana nge Muṋe washu a mu shudufhadza. 13A pfuma, lupfumo lwawe lwa ḓi anda lu tshi ya, a vhuya a vha mupfumi muhulu. 14O vha na maṱambi manzhi a nngu na kholomo, na dziphuli, lwe Vhafilista vha thoma u mu itela vivho, 15vha thivha mabidzi oṱhe o bwiwaho nga phuli dza khotsi awe Abrahamu misi iḽa, Vhafilista vha sala vha tshi a ḓadza mavu.
16Abimelekhe a amba na Isaka a ri, “Nga vha pfuluwe shangoni ḽashu, a ri tsha vha kona.” 17Ndi hone Isaka a tshi pfuluwa a yo fhaṱa govhani ḽa Gerara a dzula hone. 18Isaka a fukula mabidzi e a bwiwa misi ya khotsi awe Abrahamu e Vhafilista vha vha vho a thivha Abrahamu o no fa, a a rina madzina eneaḽa e a rinwa nga khotsi awe.
19Phuli dza Isaka dza bwa govhani dza tumbula tshisima tsha maḓi a elaho henefho. 20Hone vhalisa vha Gerara vha luṱana na vhalisa vha Isaka vha ri, “Maḓi aya ndi ashu!” Zwenezwo a ri itsho tshisima tshi pfi Eseke (Maluṱa), nge vha luṱana nae. 21Ndi hone vha tshi bwa ḽiṅwe bidzi, na ḽone vha dovha vha ḽi lwela; ndi zwe a ri ḽi pfi Sithina (Vhuswina). 22A ṱuwa henefho a bwa ḽiṅwe bidzi, ha si vhe na ane a ḽi lwela. A ri ḽi pfi Rehobotho (Ḽo aṱama), nge a ri, “Zwino Muṋe washu o ri ḓisa shangoni ḽo aṱamaho; ri ḓo anda shangoni ḽino.”
23U bva henefho a ya Bierisheba. 24Vhusiku honoho Muṋe washu a ḓa khae a ri, “Ndi Nṋe Mudzimu wa khotsi au Abrahamu. U songo ofha tshithu, ndi na iwe; ndi ḓo u shudufhadza nda andisa vhaḓuhulu vhau ndi tshi itela mulanda wanga Abrahamu.” 25Isaka a fhaṱa aḽiṱari henefho, a rabela Muṋe washu. A akha dennde henefho, phuli dzawe dza bwa bidzi.
Mulanga we Isaka a vhofha na Abimelekhe
26Abimelekhe a ḓa u dalela Isaka a tshi bva Gerara, e na Ahuzathi mueletshedzi wawe na Phikholo mulangammbi wawe. 27Isaka a vha vhudzisa a ri, “Ndi mini ni tshi nndalela, hufha no vha ni tshi mmbenga na nthatha?”
28Vhone vha fhindula vha ri, “Ro tou zwi vhona zwavhuḓi uri Yahavee u na vhone; ndi zwe ra ri, ‘Nga ri anelane ri vhofhe mulanga,’ 29uri vhone a vha nga ri huvhadzi, vhunga na riṋe rí songo vha kwama, ró ḓi vha fara zwavhuḓi, ra vha pfulusa nga mulalo. Zwi a vhonala uri Yahavee o vha shudufhadza.” 30Isaka zwenezwo a vha itela vhuṱambo, vha ḽa vha nwa. 31Ḽi tshi tsha avho vhanna vha vhofha mulanga nga muano. Isaka a onesana navho, vha mu ṱutshela nga mulalo.
32Musi wonoyo phuli dza Isaka dza ḓa dza mu vhudza nga bidzi ḽe dza bwa. Vha ri, “Ro wana maḓi!” 33A ri ḽi pfi Sheba (Muano). Na ṋamusi dzina ḽa muḓi ḽi kha ḓi pfi Bierisheba (Bidzi ḽa muano).
Vhasadzi vha Esau vha vhatsinda
34Musi Esau e na miṅwaha ya 40, a vhinga Judithi ṅwananyana wa Bieri wa Muhithi, a vhinga na Basimatha ṅwananyana wa Eloni wa Muhithi. 35Avho vhasadzi vha ita uri Isaka na Rabeka vha dzule vha tshi ḽa mbilu.
