ESRA 2

₁Misi iyo vhathu vhanzhi vhe vhomakhulukuku wavho vha vha vha tshi bva shangoni ḽa Juda vho vhuelela ha havho vha tshi bva shangoni ḽa Babele. Nebukhadnetsara khosi ya Babele o vha o vha kumba a vha isa vhuthubwani Babele, hone zwino vho huma vha vhuelela Jerusalema na Juda, muṅwe na muṅwe a ya muḓini wa hawe. ₂Vho vhuya na Zerubabele na Joshua, na Nehemia, na Seraya, na Rielaya, na Maradokai, na Bilishani, na Misiphara, na Bigivai, na Rehumi, na Baana.

Mutevhe wa vhathu vha Israele ngoyu:

₅₉Avha vha tevhelaho vha bva miḓini ya Thele Mela na Thele Harasha na Kherubi na Adoni na Imere, hone vho vha vha sa koni u sumbedza uri vha miṱa yavho ndi vhaḓuhulu vha Israele. ₆₀Ndi vhaḓuhulu vha Delaya na vha Tobia na vha Nekoda, vho ṱangana ndi 652.

₆₁Vha no bva kha vhotshifhe ngevha: Ndi vhaḓuhulu vha Hobaya na Hakotsi na Barasilai (ndi uḽa munna we a vha o vhinga ṅwananyana wa Barasilai wa Giliadi, a vho vhidzwa nga dzina ḽa Barasilai). ₆₂Havho vho londolosa he ha ṅwalwa vhubvo ha miṱa ya havho, hone vha si kone u zwi wana, zwenezwo vha pfi vho kumala, vha si dzheniswe kha zwa vhutshifhe. ₆₃Muvhusi a vha vhudza uri vha songo ḽa tshiḽiwa tshikhethwakhethwa na tshithihi ha vhuya ha vha na tshifhe a vhudzisa Mudzimu nga madeṅwa makhethwa.

₆₄Vhathu vhoṱhe vho vha vhe 42 360, ₆₅hu sa vhalwi vhashumi vhavho vha vhanna na vha vhasadzi vha 7 337; vha dovha vha vha na vhaimbi vha 200, vhanna na vhasadzi. ₆₆Vho vha vhe na bere dza 736 na meila dza 245, ₆₇na gamela dza 435 na donngi dza 6 720.

₆₈Musi vha tshi swika nḓuni ya Muṋe washu i re Jerusalema, vhaṅwe vhaṋe vha miṱa vha bvisa nduvho nga u tou funa havho uri hu vusiwe nnḓu ya Mudzimu henefhaḽa he ya vha yo ima hone kale. ₆₉Vho ṋea gwama ḽa thembele zwifhiwa nga hune vha kona vha tshi itela uyo mushumo, vha bvisa musuku wa khilogiramu dza 500 na siliva ya khilogiramu dza 2 800 na nguvho dza vhotshifhe dza 100. ₇₀Vhotshifhe na Vhalivi na vhaṅwe vhathu vha yo dzula Jerusalema; vhalindakhoro na vhaimbi na vhashumi vha thembeleni na vhaṅwe Vhaisraele vha yo dzula miḓini ya havho.