EKISODA 38

₁Betsalele a fhaṱa aḽiṱari nga thanda ya muunga, ya vha ya u fhisela zwiṱhavhelo: Masia ayo o vha a tshi eḓana, vhunavha vhu mitha mbili na hafu, vhuphara vhu mitha mbili na hafu, vhulapfu u ya nṱha vhu mitha na hafu. ₂A ita maṋanga nṱha ha khuḓa nṋa, a vha tshipiḓa tshithihi na aḽiṱari. Yoṱhe a i fhoma musinaseṱha. ₃A ita na thundu yoṱhe ya aḽiṱari: ndongo dza u fara milora na dzifosholo na masambelo a u handulula na dziforogo na ndongo dza mulilo. Zwoṱhe hezwo zwithu o zwi ita nga musinaseṱha. ₄A ita tshiṱhaṱhi tsha musinaseṱha a tshi vhea fhasi ha mulinga wa aḽiṱari, uri u ya nṱha tshi swike vhukati ha aḽiṱari. ₅A ita mikungelo miṋa ya u hwala a i mometshedza khuḓani nṋa. ₆A ita thanda nṋa dza u hwala a dzi fhoma nga musinaseṱha, ₇a dzi longa kha mikungelo sia ḽiṅwe na ḽiṅwe ḽa aḽiṱari, uri i kone u hwalwa ngadzo. A ita phakho ya aḽiṱari nga makwati.

₈Betsalele a ita sambelo ḽa musinaseṱha na tshiraho tshaḽo tsha musinaseṱha, a zwi ita nga zwivhoni zwa vhasadzi vhane vha shuma muṋangoni wa dennde ya u ṱangana na Muṋe washu.

₉Dennde ya u ṱangana na Mudzimu Betsalele a i itela muṱa nga mapesa a lukhaha. Vhulapfu ha mapesa a sia ḽa tshipembe ho vha hu mitha dza 50, ₁₀ó tikwa nga phuphu dza musinaseṱha dza 20 dzi ngomu zwirahoni zwa musinaseṱha zwa 20, dzi na dzihuka na mbalelo dza siliva. ₁₁Uyo muṱa sia ḽa devhula wo vha wo ḓi ralo. ₁₂Sia ḽa vhukovhela ho vha hu na mapesa a vhulapfu ha mitha dza 25, na phuphu dza fumi na zwiraho zwa fumi dzi na dzihuka na mbalelo dza siliva. ₁₃Vhuphara ha sia ḽa vhubvaḓuvha, muṋangoni wa phanḓa, dza vha mitha dza 25. ₁₄Sia ḽiṅwe ḽa muṋango ho vha hu na mapesa o nembelelaho a vhulapfu ha mitha dza 7,5, ó tikwa nga phuphu tharu dzo longwa kha zwiraho zwiraru. ₁₅Sia ḽiṅwe, masia oṱhe a muṋango wa muṱa, ho vha hu na mapesa o nembelelaho a vhulapfu ha mitha dza 7,5, e na phuphu dzao tharu dzo longwa kha zwiraho zwiraru. ₁₆Mapesa oṱhe o tangaho muṱa o vha o itwa nga lukhaha lwavhuḓi. ₁₇Zwiraho zwa idzo phuphu zwo vha zwo itwa nga musinaseṱha, dzihuka na mbalelo na vhupila ha ṱhodzi dza phuphu ho itwa nga siliva. Phuphu dzoṱhe dzo tangaho muṱa dzo vha dzo ṱanganywa nga mbalelo dza siliva. ₁₈Pesa ḽa muṋango wa muṱa ḽo vha ḽo itwa nga lukhaha lwavhuḓi ḽó lukwa nga denga na muridili na vhukuse vhutswuku, ḽo ṱamiwa nga makolo. Ḽo vha ḽi ḽa vhunavha ha mitha dza fumi, vhulapfu u ya nṱha ḽi mitha mbili na hafu, u ḓi nga mapesa a muṱa. ₁₉Ḽo vha ḽo tikwa nga phuphu nṋa dzi re na zwiraho zwa musinaseṱha. Huka dzadzo na vhupila ha ṱhodzi dzadzo na mbalelo dzadzo dzo vha dzo itwa nga siliva. ₂₀Khokho dzoṱhe dza dennde na dza muṱa wo i tangaho dzo vha dzi dza musinaseṱha.

₂₁Ngoyu mutevhe wa thundu yo fhaṱaho dennde ya u ṱangana na Mudzimu he ha vha ho vhewa maḓaba mavhili a matombo o ṅwalwaho Milayo ya fumi. Mushe o ri uyo mutevhe u ṅwalwe, wa ṅwalwa nga Vhalivi, vha shuma vha tshi langwa nga Ithamara ṅwana wa tshifhe Aroni.

₂₂Betsalele, ṅwana wa Uri, muḓuhulu wa Huru, wa tsinde ḽa Juda, o ita zwoṱhe zwe Muṋe washu a ri zwi itwe a tshi amba na Mushe. ₂₃Mutikedzi wawe, Oholiaba ṅwana wa Ahisamakha, wa tsinde ḽa Dani, o vha e mutsheṱi na muoli na muluki wa lukhaha lwavhuḓi lwa denga na muridili na vhukuse vhutswuku.

₂₄Musuku woṱhe we wa kumedzwa Muṋe washu uri u shumiswe denndeni khethwa wo kaliwa wa lemela khilogiramu dza 1 000, u tshi kaliwa nga muelo wo tendelwaho. ₂₅Siliva i no bva kha mbalo ya vhathu yo kaliwa ya lemela khilogiramu dza 3 430, u tshi kaliwa nga muelo wo tendelwaho. ₂₆Mutengo hoyo ndi zwoṱhe zwo bviswaho nga vhathu vhoṱhe vho ṅwalisaho hu tshi vhalwa vhathu, muṅwe na muṅwe a tshi bvisa giramu dza 6, zwó kaliwa nga muelo wo tendelwaho. Ho vha hu na vhanna vha 603 550 vha miṅwaha ya 20 kana u fhira vhe vha ṅwaliswa hu tshi vhaliwa vhathu. ₂₇Kha siliva, ya khilogiramu dza 3 400 yo shuma u ita zwiraho zwa ḓana zwa dennde khethwa na pesa, tshiraho tshiṅwe na tshiṅwe tsho itwa nga siliva ya khilogiramu dza 34. ₂₈Betsalele a dzhia khilogiramu dza 20 dza siliva yo salaho a ita ngayo mbalelo dza tsimbi na dzihuka dza dziphuphu na vhupila ha ṱhodzi dzadzo.

₂₉Musinaseṱha we wa kumedzwa Muṋe washu wo vha u tshi lemela khilogiramu dza 2 425. ₃₀Betsalele o u dzhia a ita ngawo zwiraho zwa phuphu dza muṋangoni wa dennde ya u ṱangana na Mudzimu, na aḽiṱari ya musinaseṱha na tshiṱhaṱhi tshayo tsha musinaseṱha na thundu yoṱhe ya aḽiṱari, ₃₁na zwiraho zwa muṱa wo tangeledzwaho nga matungo, na muṋango wa muṱa na khokho dzoṱhe dza dennde na muṱa wo i tangeledzaho nga matungo.