EKISODA 26

₁“Dennde ine nda luvhiwa khayo, ngomu hayo u i ite nga mapesa a fumi a lukhaha lu songo vangiwaho lwo lukiwa nga denga na muridili na vhukuse vhutswuku. Kha mapesa ayo a lukhaha u luke zwifanyiso zwa vhakherube. ₂Vhunavha ha pesa ḽithihi vhu vhe mitha dza 14, vhuphara haḽo vhu vhe mitha mbili, mapesa oṱhe a eḓane. ₃Mapesa maṱanu a ṱumekanywe, na ayo maṅwe maṱanu a ḓi itwa nga u ralo. ₄U ṱumetshedze nkhwe dza sila ḽa denga kha lupendelo lwa pesa ḽa u fhedzisela ḽa ayo mapesa, u dovhe u ite nga u ralo kha lupendelo lwa pesa ḽa u fhedzisela ḽa ayo maṅwe. ₅U ṱumetshedze nkhwe dza 50 kha pesa ḽa u thoma, u dovhe u ṱumetshedze nkhwe dza 50 kha lupendelo lwa pesa ḽa u fhedzisela ḽa ayo maṅwe u tshi dzi vhambedza na dziḽa dza u thoma. ₆U ite dzihuka dza 50 dza musuku dza ṱumekanya ayo mapesa. Zwenezwo iyo dennde i ḓo vha tshithu tshithihi.

₇“U ite na mapesa nga vhukuse ha mbudzi, a u fulela iyo dennde; ayo a vhe 11. ₈Vhunavha ha pesa ḽithihi vhu vhe mitha dza 15, vhuphara vhu vhe mitha mbili, mapesa ayo oṱhe a 11 a eḓane. ₉U ṱumekanye maṱanu a ayo mapesa a vhe ḽithihi, maṅwe maṱanu na ḽithihi o salaho a vhe ḽiṅwe. Ḽa vhuṱanu na vhuthihi u ḽi pete ḽi fulele phanḓa ha dennde. ₁₀U ṱumetshedze nkhwe dza 50 kha lupendelo lwa pesa ḽa u fhedzisela ḽa hayo o ṱumekanaho a u thoma, u ḓi ralo na kha lupendelo lwa pesa ḽa u fhedzisela ḽa hayo a vhuvhili. ₁₁U ite dzihuka dza 50 dza musinaseṱha u dzi longe kha dzinkhwe, dzi farakanye iyo dennde i vhe tshithu tshithihi.

₁₂“Vhunga hu tshi ḓo vha ho sala pesa ḽithihi ḽa dennde, hafu ya iḽo pesa u i nembeledze murahu ha dennde. ₁₃Tshipiḓa tsha hafu mitha tsho salaho masia oṱhe u navha na mapesa a dennde tshi nembelele matungo a dennde tshi vhe lupila lwayo.

₁₄“U dovhe u ite lupila lwa dennde nga mikumba ya thutha yo fhomiwa nga phomo tswuku, na lupila lwa mikumba yo sukiwaho u fulele nṱha hayo.

₁₅“Iyo dennde u i itele thikho nga thanda ya muunga, i ime i tou tswiti. ₁₆Thikho iṅwe na iṅwe i vhe na vhunavha ha mitha ṱhanu, vhuphara vhu vhe senthimitha dza 75. ₁₇Thikho iṅwe na iṅwe i longwe na mikungelo mivhili i fanaho, u ralo na kha thikho dzoṱhe dza dennde. ₁₈U ite thikho dza 20 sia ḽa tshipembe ḽa dennde. ₁₉U ite zwiraho zwa 40 zwa siliva zwi no ḓo dzhena nga fhasi ha idzo thikho, zwiraho zwivhili fhasi ha thikho iṅwe na iṅwe zwa u tika mikungelo. ₂₀Sia ḽa devhula ḽa dennde ḽi vhe thikho dza 20, ₂₁dzi tikwe nga zwiraho zwa siliva zwa 40, zwivhili fhasi ha thikho iṅwe na iṅwe. ₂₂Murahu ha dennde, nga vhukovhela, u ite thikho ṱhanu na nthihi. ₂₃U ite thikho mbili khuḓani dza murahu ha dennde. ₂₄Thikho idzo dzi paṱekanywe u bva fhasi u swika nṱha, u vhuya u swika nga mukungelo wa u thoma. Thikho mbili dzine dza vhumba khuḓa idzo mbili dzi itwe nga u ralo. ₂₅Zwenezwo hu ḓo vha na thikho ṱhanu na tharu na zwiraho zwadzo zwa 15 zwa siliva, zwivhili zwi fhasi ha thikho iṅwe na iṅwe.

₂₆“U ite mbalelo dza u rambalala nga thanda ya muunga, ṱhanu dza u paṱekanya thikho sia ḽithihi ḽa dennde, ₂₇ṱhanu dza u paṱekanya thikho sia ḽiṅwe, ṱhanu dza u paṱekanya thikho hune dennde ya guma hone nga vhukovhela. ₂₈Luvhalelo lwa u rambalala lwa vhukati, lune lwa ḓo vha vhukati u ya nṱha, lu thome mugumoni uno lu swike kha uḽa. ₂₉Idzo thikho dzi fhomiwe musuku, dzi vhe na mikungelo ya musuku ya u fara mbalelo dzo rambalalaho, na dzone dzi fhomiwe musuku. ₃₀U fhaṱe iyo dennde nga u ralo u tshi tevhedza pulane ye wa sumbedzwa ngei thavhani.

₃₁“U ite lupila nga ṅwenda wavhuḓi wo lukiwaho nga denga na muridili na vhukuse vhutswuku. U lukiwe tshifanyiso tsha vhakherube. ₃₂U u nembeledze kha phuphu nṋa dza thanda ya muunga dzo fhomiwaho musuku, wo longwa dzihuka dza musuku, wo ṱumetshedzwa kha zwiraho zwa siliva. ₃₃U nembeledze pesa ḽi tshi bva kha dzihuka, iḽo pesa ḽi ḓo fhandekanya Hukhethwa na Hukhethwakhethwa. Murahu ha iḽo pesa u vhee mbulungelo ya mulanga. ₃₄Tshitibo u tshi vhee nṱha ha mbulungelo ngomu ha Hukhethwakhethwa. ₃₅Ḓafula u ḽi vhee nnḓa ha Hukhethwakhethwa thungo ya devhula ya dennde, u vhee tshivheambone tshó livhana naḽo thungo ya tshipembe.

₃₆“Muṋangoni wa dennde u ite pesa ḽa ṅwenda wavhuḓi wo lukiwaho nga denga na muridili na vhukuse vhutswuku, zwi ṱamiwe nga mivhalavhala nga makone wa u luka. ₃₇Ṅwenda uyo u u itele phuphu ṱhanu dza thanda ya muunga, dzi fhomiwe nga musuku, dzi longwe dzihuka dza musuku. Idzo phuphu u dzi itele zwiraho zwiṱanu zwa musinaseṱha.