EKISODA 23

₁“U songo isa phungo, u songo tikedza muthu a re na mulandu nga u ṱanzilela mazwifhi. ₂U songo tevhela vhunzhi ha vhathu musi vha tshi khakha kana musi vha tshi ṱanzilela zwi piringedzaho khaṱhulo mbuya. ₃Na mushai arali e na mulandu u songo mu imelela tsengoni.

₄“Arali wa vhona kholomo kana donngi ya swina ḽau yo xela, i humisele khae. ₅Arali donngi yawe yo wiswa nga muhwalo, mu farise a vuse iyo donngi; u songo sokou fhira.

₆“U songo kundisa mushai u wana khaṱhulo mbuya tsengoni. ₇U songo pomoka muthu nga zwithu zwi siho, nahone muthu a si na mulandu a songo vhulawa, ngauri ane a vhuya a ita vhuvhi ho raloho ndi ḓo mu haṱulela u laṱwa. ₈U songo ṱanganedza tshanḓanguvhoni, ngauri tshanḓanguvhoni tshi pofulisa vhathu vha si tsha vhona zwi re zwone, zwa vhaisa vha si na mulandu.

₉“U songo tambudza mutsinda; u a zwi ḓivha uri mutsinda u ḓipfa o tou ita hani, ngauri na iwe wo vha u mutsinda Egipita.

₁₀“Lima tsimu yau u ite miṅwaha miṱanu na muthihi, u kaṋe zwe ya zwi bveledza. ₁₁Hone nga ṅwaha wa vhuṱanu na vhuvhili i litshe i lale, u songo vhuya wa kaṋa tshi melaho khayo. Vhashai vha ḓo ḽa zwi melaho henefho, phukha dza ḓaka dza wana zwo salaho. Na tsimu yau ya minḓirivhe na miri ya miolivi u songo i kaṋa nga ṅwaha wonoyo.

₁₂“U shume maḓuvha maṱanu na ḽithihi nga vhege, hone nga ḓuvha ḽa vhuṱanu na vhuvhili u songo shuma, uri kholomo dzau na donngi dzi awele, na phuli dzau na vhatsinda vha netuluwe.

₁₃“Thetshelesa zwoṱhe zwe Nṋe Yahavee nda u vhudza. U songo rabela midzimu miṅwe; na madzina ayo u songo vhuya wa bula.

₁₄“Ita vhuṱambo vhuraru nga ṅwaha u tshi itela u nkhulisa.

₁₅“Nga ṅwedzi wa Avivi, ṅwedzi we wa pfuluwa ngawo Egipita, u ite vhuṱambo ha Vhurotho vhu si na mbilisa nga maitele e nda u laya. U songo ḽa vhurotho ho vangwaho mbilisa maḓuvha eneo maṱanu na mavhili a vhuṱambo uho. U songo vhuya wa ḓa wa nnduvha ú songo fara nduvho.

₁₆“Ita na vhuṱambo ha Khaṋo, vhuṱambo ha zwiranzhe zwa zwe wa lima masimuni au, na vhuṱambo ha Mavhuyahaya, mafheloni a ṅwaha musi u tshi kuvhanganya zwe wa kaṋa masimuni. ₁₇Vhanna vhoṱhe vha Vhaisraele vho fanela u ḓa vha luvha Nṋe Muṋe wazwo Yahavee kararu nga ṅwaha.

₁₈“U tshi nṋekedza malofha a tshiṱhavhelo, u songo ṋekedza na vhurotho vhu re na mbilisa, nahone mapfura a tshiṱhavhelo tshine wa ṋekedza u songo a vhea u swika nga matshelo.

₁₉“U nange zwi fhiraho zwoṱhe zwa zwiranzhe zwa zwe wa kaṋa masimuni au u zwi ḓise nḓuni ya Yahavee Mudzimu wau.

“U songo bika ngwana kana mbudzana nga mukhaha wa mme ayo.

₂₀“Ndi ḓo ruma muruṅwa a u ranga phanḓa a u tsireledza musi wo fara lwendo, a u endedza a u isa fhethu he nda u lugisela. ₂₁U mu thetshelese, u ite zwine a u vhudza. U songo mu vutshela, o ruṅwa nga Nṋe, a nga si u hangwele vhushandukwa honoho. ₂₂Hone arali wa mu thetshelesa, wa ita zwoṱhe zwine a u laya, Nṋe ndi ḓo lwa na maswina au oṱhe; vha lwaho na iwe vha lwa na Nṋe. ₂₃Muruṅwa wanga u ḓo u ranga phanḓa, a u swikisa shangoni ḽa Vhaamori na Vhahithi na Vhapherisi na Vhakanana na Vhahivi na Vhajebusi, Nṋe ndi ḓo vha lozwa. ₂₄U songo gwadamela midzimu yavho kana wa i luvha, nahone u songo edzisa zwa vhurereleli havho. U lozwe midzimu yavho, u pwashekanye phuphu dzavho dza matombo. ₂₅Arali wa luvha Nṋe Yahavee Mudzimu wau, ndi ḓo u shudufhadza nga zwiḽiwa na maḓi nda fhodza malwadze au oṱhe. ₂₆Shangoni ḽa hau a hu nga vhi na musadzi ane a tshinyalelwa kana a vha muumba. Ndi ḓo ita uri u lalame.

₂₇“Ndi ḓo ita uri vhathu vhane vha lwa na iwe vha nnyofhe. Vhathu vhane wa lwa navho ndi ḓo vha fhiriṱanya, nda ita uri maswina au oṱhe a rembuluwe a u shavhe. ₂₈U ḓo ri u tshi sendela nda ruma mabu a thatha Vhahivi na Vhakanana na Vhahithi. ₂₉A thi nga vha thathi nga ṅwaha muthihi; arali nda ralo shango ḽi nga ḓo sala ḽi si na muthu, wa ḓo wana zwivhanda zwo ḓalesa. ₃₀Tshine nda ḓo ita ndi u vha thatha nga zwiṱuku nga zwiṱuku, na vhuya na anda na dzhia shango. ₃₁Mikano ya shango ḽau ndi ḓo i vhea ya guma nga Lwanzhe lwa Dziṱhanga na lwanzhe lwa Vhafilista na phanga na mulambo wa Yufuratha. Ndi ḓo kumedza vhadzulapo vha iḽo shango zwanḓani zwau, wa vha pandela vha u shavha. ₃₂U songo vhofha mulanga navho kana midzimu yavho. ₃₃Vha songo dzula shangoni ḽau, vha sa ḓo u fhura wa nkhakhela. U nga ḓo luvha midzimu yavho, wa vha wo ḓifasha nga tshikwekwe.”