Mulanga wa Sinai
Vhaisraele vhe thavhani ya Sinai
1Vhaisraele vho ri u fhedza miṅwedzi miraru yo ḓalaho vho pfuluwa shangoni ḽa Egipita vha swika phangani ya Sinai. 2Vha ṱuwa Rafidimu vha dovha vha fara lwendo, vha tshi swika phangani ya Sinai vha ṱoka mishasha yavho henefho phangani u livhana na thavha.
Vhathu vha tshi ḓilugisela u ṱangana na Mudzimu
3Mushe zwenezwo a takuwa a gonya ha Mudzimu, Muṋe washu a mu vhidza e thavhani a ri, “Hezwi zwi vhudze vha nnḓu ya Jakopo, vhana vha Israele, u ri, 4‘Inwi vhaṋe no vhona zwe nda ita Vhaegipita, na zwe nda ni hwala zwa nga ndo tou ni takula nga phapha dza goni nda ni ḓisa ha Nṋe muṋe. 5Ndi zwone, arali na thetshelesa ipfi ḽanga na nambatela mulanga wanga, ni ḓo vha lushaka lwanga vhukuma lwe nda lu nanga kha tshakha dzoṱhe, ngauri ḽifhasi ḽoṱhe ndi ḽanga. 6Ndi ḓo ni ita lushaka lwa vhotshifhe vha nnduvhaho, na vha lushaka lwo sumelwaho Nṋe.’ Hayo ndi one maipfi ane wa fanela u vhudza Vhaisraele.” 7Ndi hone Mushe a tshi ṱuwa, a vhidzisa vhahulwane vha vhathu, a vha vhudza zwoṱhe zwe Muṋe washu a ri zwi itwe. 8Vhathu vhoṱhe vha fhindula nga ipfi ḽithihi vha ri, “Zwoṱhe zwe Muṋe washu a amba, ri ḓo zwi ita.” Mushe a swikisa phindulo ya vhathu ha Muṋe washu.
9Muṋe washu a vhudza Mushe a ri, “Ndi khou ḓa ha iwe ndo fuka gole ḽidenya uri vhathu vha zwi pfe ndi tshi amba na iwe, vha kone u dzula vha tshi u fulufhedza misi yoṱhe i ḓaho.” Mushe a swikisa phindulo ya vhathu ha Muṋe washu.
10Muṋe washu a vhudza Mushe a ri, “Iya kha vhathu u vha vhudze uri vha ḓikumulule, vha vhe vha tshi ḓilugisa ṋamusi na matshelo. Vha vhudze vha kuvhe zwiambaro zwavho, 11vha ḓilugisele mbamatshelo, ngauri nga ḓuvha ḽa vhuraru ndi ḓo tsela thavhani ya Sinai vhathu vhoṱhe vha tshi zwi vhona. 12U vhee mukano u mona na thavha, u vha vhudze u ri, ‘Ni vhone ni sa ḓo gonya thavha, kana na kwama tsinde ḽayo. Ane a vhuya a kwama iyo thavha tshawe ndi u vhulawa. 13Hu songo vha na ane a mu vhea tshanḓa, o fanela u tou kanḓwa nga matombo kana a pfulwa nga musevhe, a nga vha e muthu kana tshifuwo, a songo vhuya a litshwa a tshila.’ Musi phalaphala i tshi lila hu ḓo gonya vhenevho vho tiwaho.”
14Mushe a tsela kha vhathu a tshi bva thavhani, a vha vhudza uri vha ḓikumulule, vha kuvhe zwiambaro zwavho. 15Zwenezwo Mushe a vhudza vhathu a ri, “Ḓilugiseleni ḓuvha ḽa vhuraru, ni songo dzhenisana nḓuni.”
Mudzimu a tshi tsela Sinai
16Zwino ḽi tshi tsha nga ḓuvha ḽa vhuraru ha pfala mibvumo thavhani, ha vhonala lupenyo na gole ḽidenya, ha pfala phalaphala i tshi lila, ngomu mishashani vhathu vhoṱhe vha tetemela. 17Zwenezwo Mushe a endedza vhathu vha bva mishashani vha yo ṱangana na Mudzimu, vha ima tsindeni ḽa thavha. 18Thavha ya Sinai yoṱhe yo vha yo pilwa nga buluvhutsi, ngauri Muṋe washu o vha o tsela khayo e ngomu ha mulilo. Iḽo buluvhutsi ḽa duba unga vhutsi vhu bvaho kha ṋanḓo, thavha yoṱhe ya dzinginyea lu ofhisaho. 19Mubvumo wa phalaphala wa ḓi hula u tshi ya. Mushe a amba, Mudzimu a mu fhindula nga mubvumo. 20Muṋe washu o vha o tsela kha thavha ya Sinai, a ima muṱumbani wa thavha. Muṋe washu a vhidza Mushe uri a ḓe muṱumbani wa thavha, Mushe a gonya a ya.
21Muṋe washu a vhudza Mushe a ri, “Tsela fhasi u vhudze vhathu vha si pfuke mukano we vha vhetshelwa vha tshi ri vha ḓa u vhona Yahavee; vha zwi ita hu ḓo fa vhanzhi vhavho. 22Vhotshifhe, vhanna vhane vha swika tsini hanga, na vhenevho vho fanela u ḓikumulula, ndi sa ḓo vha vhulaha.”
23Mushe a fhindula Muṋe washu a ri, “Vhathu vha nga si kone u gonya thavha ya Sinai, hufha wo ri kaidza Iwe muṋe zwiḽa u tshi ri, ‘Vhea mukano u mona na thavha, hu itwe fhethu hukhethwa.’ ”
24Muṋe washu a vhudza Mushe a ri, “Tsela fhasi u yo dzhia Aroni u dovhe u gonye nae ngeno. Hone u songo tendela vhotshifhe kana vhathu vha tshi pfuka mukano vha gonyela ngeno hanga, ndi sa ḓo vha lozwa.” 25Ndi hone Mushe a tshi tsela kha vhathu a amba navho.
