EKISODA 16

₁Vhaisraele vhoṱhe vha takuwa Elimu vha dovha vha fara lwendo, vha swika phangani ya Sini, vhukati ha Elimu na Sinai. Ḽo vha ḽi ḓuvha ḽa 15 ḽa ṅwedzi wa vhuvhili tshee vha pfuluwa Egipita. ₂Vhaisraele vhoṱhe vha thoma u gungulela Mushe na Aroni henefho phangani, ₃vha vha vhudza vha ri, “Ngavhe Muṋe washu o ri vhulaha zwashu shangoni ḽa Egipita. Henengei ro vha ri tshi kona u dzula fhasi ra ḽa ṋama, ra ḽa zwiḽiwa ra fura! Zwino vho ri hwala vha ri ḓisa fhano phangani uri roṱhe ri fe nga nḓala!”

₄Ndi hone Muṋe washu a tshi vhudza Mushe a ri, “Zwino ndi ḓo ni nisela zwiḽiwa zwi tshi bva ṱaḓulu. Ḓuvha ḽiṅwe na ḽiṅwe vhathu vha fanela u bva vha kumbela zwo eḓanaho ḓuvha ḽithihi. Ndi funa u vha linga nga u rali uri ndi vhone arali vha tshi ḓo tevhedza mulayo wanga kana vha sa ḓo u tevhedza. ₅Nga ḓuvha ḽa vhuṱanu na vhuthihi musi vha tshi lugisa zwe vha vhuya nazwo, zwi eḓane maḓuvha mavhili.”

₆Mushe na Aroni vha vhudza Vhaisraele vhoṱhe vha ri, “Ṋamusi nga madekwana ni ḓo ḓivha uri ndi Muṋe washu we a ni pfulusa shangoni ḽa Egipita. ₇Nga matsheloni ni ḓo vhona vhugala ha Muṋe washu, ngauri o zwi pfa ni tshi mu gungulela. A ni gunguleli riṋe, hufha riṋe ri si tshithu!”

₈Mushe a ri, “Nga madekwana Muṋe washu u ḓo ni fha ṋama na ḽa, nga matsheloni u ḓo ni fha zwiḽiwa na ḽa na fura, ngauri Muṋe washu o zwi pfa ni tshi mu gungulela. A ni gunguleli riṋe, hufha riṋe ri si tshithu, ni khou gungulela Muṋe washu.”

₉Mushe a vhudza Aroni a ri, “Nga vha vhudze Vhaisraele vhoṱhe vha ri, ‘Sendelani tsini ha Muṋe washu; o ni pfa ni tshi gungula.’ ”

₁₀Musi Aroni a tshi khou amba na vhathu vhoṱhe vha Israele, vha lavhelesa phangani, kha gole ha vhonala lupenyo lwa Muṋe washu. ₁₁Zwenezwo Muṋe washu a amba na Mushe a ri, ₁₂“Ndo pfa u gungula ha Vhaisraele. Vha vhudze u ri, ‘Nga madekwana ni ḓo ḽa ṋama, nga matsheloni ni ḓo ḽa zwiḽiwa na fura. Ndi hone ni tshi ḓo ḓivha uri ndi Mudzimu-ḓe, Nṋe Yahavee Mudzimu waṋu.’ ”

₁₃Nangoho zwa ralo, madekwana eneo ha ḓa khwali dza tou ḓadza gammba, nga matsheloni ha wanala ho wa ṅwando wo mona na mishasha. ₁₄Musi ṅwando u tshi fhufha, fhasi ha wanala hu na zwiṅwe zwithu zwitete zwi no nga luvhanda, zwi tshi nga mahaḓa. ₁₅Vhaisraele vha tshi zwi vhona, vha si zwi ḓivhe, vha vhudzisana vha ri, “Ndi mini izwi?” Mushe a vha vhudza a ri, “Izwi ndi zwiḽiwa zwine Muṋe washu a ni ṋea uri ni ḽe. ₁₆Ndaela ya Muṋe washu i ri: Muṅwe na muṅwe o fanela u dobela zwo eḓanaho, muthu muthihi a wane zwi no eḓana ḽitha mbili, zwi tshi ya nga mbalo ya vhathu vha re muṱani waṋu. Muṅwe na muṅwe a dobelele vha no dzula denndeni yawe.”

₁₇Vhaisraele vha ita zwenezwo. Vhaṅwe vha dobela zwinzhi, vhaṅwe vha dobela zwi si gathi. ₁₈Huno vha tshi ela zwe vha dobela, munna we a dobela zwinzhi o vha a si na zwo kalulaho, munna we a dobela zwiṱuku o vha a si na zwiṱukusa. Muṅwe na muṅwe a wana ó dobela zwo mu eḓanaho.

₁₉Mushe a vha vhudza a ri, “Hu songo vha na ane a zwi vhetshela matshelo.” ₂₀Hone vhaṅwe vha si thetshelese Mushe, zwiṅwe vha zwi vhetshela ḽa matshelo, zwa bva mbundudzi, zwa nukha u sina; Mushe a vha sinyutshela. ₂₁Vha vho zwi dobela matsheloni maṅwe na maṅwe, muṅwe na muṅwe a tshi dobela zwo mu eḓanaho. Musi ḓuvha ḽi tshi vho fhisa zwa ṋoka.

₂₂Zwino nga ḓuvha ḽa vhuṱanu na vhuthihi vha dobela izwo zwiḽiwa luvhili, zwa muthu muthihi zwa vha ḽitha nṋa. Vharangaphanḓa vhoṱhe vha vhathu vha ḓa vha zwi vhudza Mushe, ₂₃ene a vha vhudza a ri, “Ndaela ya Muṋe washu ngei: Matshelo ndi ḓuvha ḽa u awela tshoṱhe, ndi Sabatha khethwa ya Muṋe washu. Hadzingani zwine na funa u hadzinga, bikani zwine na funa u bika, zwoṱhe zwo salaho ni zwi vhetshele ḽa matshelo.”

₂₄Vhukuma vha zwi vhetshela ḽa matshelo, sa zwe Mushe a vha laya, zwa si nukhe u sina, na mbundudzi zwa si vhe nadzo. ₂₅Mushe a ri, “Zwi ḽeni ṋamusi ngauri ṋamusi ndi Sabatha ya u hulisa Muṋe washu; ṋamusi ngei nnḓa a ni nga wani tshithu. ₂₆Ni zwi dobele maḓuvha maṱanu na ḽithihi, hone nga ḓuvha ḽa vhuṱanu na vhuvhili a ni nga wani tshithu, ndi Sabatha.” ₂₇Nga ḓuvha ḽa vhuṱanu na vhuvhili vhaṅwe vha bva mishashani vha yo dobela, hone vha si wane tshithu. ₂₈Ndi hone Muṋe washu a tshi vhudza Mushe a ri, “Ni ḓo hana u vhulunga ndaela dzanga na milayo yanga u swika lini? ₂₉Vhonani! Ndo ni vhetshela Sabatha, nga ḓuvha ḽa vhuṱanu na vhuthihi nda ni ṋea zwiḽiwa zwa maḓuvha mavhili ndi tshi itela zwenezwo; muṅwe na muṅwe waṋu a dzule henefho hune a vha hone; nga ḓuvha ḽa vhuṱanu na vhuvhili hu songo vha na ane a ṱuwa hayani hawe.” ₃₀Zwenezwo nga ḓuvha ḽa vhuṱanu na vhuvhili vhathu vha litsha u shuma mishumo yavho yoṱhe.

₃₁Vhathu vha Israele vha ri izwo zwiḽiwa zwi pfi mana (“Ndi zwithu-ḓe?”). Zwo vha zwi tshi nga mbeu ṱhukhu tshena, muthu a tshi ḽa zwi tshi nga tshimbundwa tsho itwaho nga ṋotshi.

₃₂Mushe a ri, “Ndaela ya Muṋe washu ngei: Dzhiani ḽitha mbili dzazwo, ni zwi vhetshele vhaḓuhulu vhaṋu, uri vha vhone zwiḽiwa zwe nda ni fusha ngazwo phangani musi ndi tshi ni pfulusa shangoni ḽa Egipita.” ₃₃Mushe a vhudza Aroni a ri, “Kha vha dzhie mvuvhelo vha longe mana a ḽitha mbili vha vhee phanḓa ha Muṋe washu, a vhetshelwe vhaḓuhulu vhaṋu.” ₃₄Aroni a ita zwenezwo, a longa ḽitha mbili dza mana ngomu mvuvheloni, nga he Muṋe washu a laya Mushe, a vhea mana phanḓa ha mbulungelo ya mulanga, uri a dzule henefho.

₃₅Vhaisraele vha ḽa mana miṅwaha ya 40, vha vhuya vha swika shangoni ḽine ḽa dzulwa khaḽo; vho ḽa mana vha vhuya vha swika mukanoni wa shango ḽa Kanana. ₃₆Ḽitha mbili ndi tshipiḓa tshithihi kha zwa fumi zwa epha.