U bva Ethamu u swika Lwanzheni lwa Dziṱhanga
1Muṋe washu a amba na Mushe a ri, 2“Vhudza Vhaisraele vha humele murahu vha ṱoke mishasha phanḓa ha Phi Hahirotho, vhukati ha Migidolo na lwanzhe, u lavhelesa Baali Tsifoni. Ni ṱoke mishasha yaṋu tsini ha lwanzhe u livhana na fhethu henefho. 3Farao a tshi humbula u ḓo ri, ‘Vhaisraele vha khou tendeleka na shango vha tshi ya phanḓa na murahu, soga ḽo vha thivhela nḓila.’ 4Zwenezwo ndi ḓo ita uri Farao a dovhe a ite tshipimbi, a bve a ni tevhele. Hone ndi ḓo kunda Farao na mmbi yawe ndi tshi itela uri ndi huliswe. Ndi hone Vhaegipita vha tshi ḓo zwi ḓivha uri ndi Nṋe Yahavee.”
Vhaisraele vha ita nga u ralo.
Vhaegipita vha tshi tevhelela Vhaisraele
5Musi khosi ya Egipita i tshi vhudzwa uri vhathu vho shavha, ene na magota awe vha ḓisola vha ri, “Ro itani ri tshi tendela Vhaisraele vha tshi ṱuwa vha si tsha ri shumela?” 6Ndi hone Farao a tshi panelwa gariki yawe ya nndwa, a kuvhanganya mmbi yawe, 7a takutshedza e na gariki dza nndwa dza 600 dzi fhiraho dzoṱhe, na gariki dzoṱhe dza nndwa dza Egipita, dzoṱhe dzó namelwa nga vhanna vhararu-vhararu. 8Muṋe washu a ita uri Farao khosi ya Egipita a ite tshipimbi, a tevhelela Vhaisraele, vhone vha tshi khou ṱuwa vha sa ofhi tshithu. 9Vhaegipita vha vha pandamedza vhe na bere dzavho dzoṱhe na gariki dza Farao dza nndwa na vhanameli vhawe vha dzibere na mmbi i tshimbilaho nga milenzhe, vha vha fara he vha vha vho ṱoka mishasha tsini ha lwanzhe, tsini na Phi Hahirotho u livhana na Baali Tsifoni.
10Musi Farao a tshi swika, Vhaisraele vha lavhelesa, vha vhona Vhaegipita vha tshi khou vha tevhelela! Vhaisraele vha farwa nga nyofho vha lilela Muṋe washu. 11Vha vhudza Mushe vha ri, “U vhuya vha ri ḓisa fhano phangani uri ri fele hone, Egipita ho vha hu si tshee na zwalo kani? U ri pfulusa Egipita ndi hone vho ri tonda? 12A si zwenezwo zwe ra vha vhudza ri tshee Egipita kani? Ro amba ra ri nga vha ri litshe zwashu ri ḓi vha phuli dza Vhaegipita! U vha phuli dza Vhaegipita zwi fhira u fela sogani!”
13Mushe a fhindula vhathu a ri, “Ni songo ofha tshithu! Imani no khwaṱha, ni ḓo vhona zwine Muṋe washu a ḓo ita uri a ni tshidze ṋamusi; Vhaegipita havha vhane na khou vha vhona ṋamusi, a ni tsha ḓo dovha na vha vhona. 14Muṋe washu u ḓo ni lwela, sokonu dzika.”
U wela
15Muṋe washu a amba na Mushe a ri, “Ndi mini u tshi kha ḓi nndilela nga u rali? Vhudza Vhaisraele vha tshimbile. 16A vha iwe imisa lubaḓa lwau u angaladze tshanḓa tshau nṱha ha lwanzhe, u vulele Vhaisraele nḓila vha wele lwanzhe vha tshi kanda mavuni o omaho. 17Nṋe ndi ḓo ita uri Vhaegipita vha vhe na tshipimbi, vha vha tevhele. Ndi ḓo huliswa nga u kunda Farao na mmbi yawe yoṱhe – gariki dzawe dza nndwa na vhanameli vhadzo. 18Musi ndi tshi vho huliswa nge nda kunda Farao na gariki dzawe dza nndwa na mmbi yawe, Vhaegipita vha ḓo zwi ḓivha uri ndi Nṋe Yahavee.”
19Zwenezwo muruṅwa wa Mudzimu we a vha a tshi khou tshimbila phanḓa ha mmbi ya Israele, a bva he a vha e hone, a ya murahu havho. Phuphu ya gole ya ṱuwa phanḓa he ya vha i hone ya ya ya ima murahu havho, 20ya ḓa vhukati ha Vhaegipita na Vhaisraele. Vhusiku hoṱhe gole ḽa ḓisa swiswi sia ḽiṅwe, sia ḽiṅwe ḽa ḓisa tshedza, mmbi dza si vhuye dza sendelana ḽa vhuya ḽa tsha. 21Mushe a angaladza tshanḓa tshawe nṱha ha lwanzhe. Muṋe washu a sukumedzela lwanzhe murahu nga muya wa vhubvaḓuvha u no vhudzulesa vhusiku hoṱhe, lwanzheni ha sala hu shango ḽo omaho. Maḓi a fhandekana, 22Vhaisraele vha wela lwanzhe vha tshi kanda ho omaho, hu na mbondo dza maḓi sia ḽavho ḽa tshauḽa na sia ḽa tshamonde. 23Vhaegipita vha vha tevhelela vha vha sala murahu, vha dzhena lwanzheni na bere dzoṱhe dza Farao na gariki dzawe dza nndwa na vhanameli vhadzo. 24Musi mapfuvhi a sa athu tswuka Muṋe washu a sedza mmbi ya Vhaegipita e kha phuphu ya mulilo ya gole, iyo mmbi ya ḓaḓa. 25Muṋe washu a ita uri milinga ya gariki dzavho dza nndwa i ṱomowe dza si tsha kona u tshimbila. Vhaegipita vha ṱavha mukosi vha ri, “Nga ri shavhe Vhaisraele, Yahavee u khou lwa na Vhaegipita a tshi lwela vhone!”
26Muṋe washu a vhudza Mushe a ri, “Angaladza tshanḓa tshau nṱha ha lwanzhe uri maḓi a ele a tshi ya murahu a kumbe Vhaegipita na gariki dzavho dza nndwa na vhanameli vhadzo.” 27Mushe a angaladza tshanḓa tshawe nṱha ha lwanzhe, musi ḽi tshi tsha lwanzhe lwa humela vhudzuloni halwo. Vhaegipita vha tshi khou shavha vha wela ngomu halwo, Muṋe washu a posa Vhaegipita vhukati ha lwanzhe. 28Maḓi e a vha a tshi khou humela murahu a tibedza idzo gariki dza nndwa na vhanameli vhadzo vha mmbi yoṱhe ya Farao ye ya vha yo tevhela Vhaisraele lwanzheni, ha si sale na muthihi wavho. 29Hone Vhaisraele vho wela lwanzhe vha tshi kanda mavuni o omaho, hu na mbondo dza maḓi kha tshauḽa tshavho na tshamonde.
30Musi wonoyo, Muṋe washu o lamulela Vhaisraele kha Vhaegipita, Vhaisraele vha tshi sedza vha vhona Vhaegipita vho rambalala vho fa khunzikhunzini ya lwanzhe. 31Vhaisraele vho vhona mishumo mihulu ye Muṋe washu a ita a tshi lifhedza Vhaegipita, vhathu vha ofha Muṋe washu, vha fulufhela Muṋe washu, na Mushe muḓinḓa wawe.
