DOTORONOMIO 5

₁Mushe a vhidza Vhaisraele vhoṱhe a vha vhudza a ri, “Hee inwi Vhaisraele, thetshelesani milayo na ndaela dzine nda khou ni laya ṋamusi ni tshi zwi pfa nga nḓevhe, ni zwi gude, ni zwi tevhedze, ni zwi khunyeledze. ₂Mudzimu Muṋe washu o vhofha mulanga na riṋe thavhani ya Horebe. ₃Mulanga uyo Muṋe washu ho ngo u vhofha na vhomakhulukuku washu, o u vhofha na riṋe roṱhe, riṋe vhane ra kha ḓi tshila ra vha hone fhano ṋamusi. ₄Musi Muṋe washu a tshi amba na inwi ngei thavhani e muliloni, o amba na inwi no tou livhana zwifhaṱuwo. ₅Musi uyo nṋe ndo vha ndo ima vhukati ha Muṋe washu na inwi ndi tshi swikisa mafhungo a Muṋe washu kha inwi, ngauri no vha ni tshi ofha ni tshi vhona mulilo, na si tsha gonya thavha.

“Muṋe washu o ri, ₆‘Ndi Nṋe Yahavee Mudzimu wau we nda u pfulusa shangoni ḽa Egipita he wa vha u phuli.

₇“ ‘U songo vha na miṅwe midzimu, Mudzimu wau ndi Nṋe ndi ndoṱhe.

₈“ ‘U songo ḓiitela tshifanyiso na tshithihi tsha zwi re ngei ṱaḓulu kana fhano fhasi kana maḓini a re nga fhasi ha ḽifhasi, ₉wa tshi gwadamela wa tshi rerelela; Nṋe Yahavee Mudzimu wau ndi Mudzimu a sa vhangiswi, mulandu wa vhokhotsi ndi u vhila kha vhana na kha vhaḓuhulu u swika kha murafho wa vhuraru na wa vhuṋa wa maswina anga, ₁₀hone vhane vha mpfuna vha tevhedza ndaela dzanga ndi vha ita nga vhuthu u swika kha mirafho ya tshigidi.

₁₁“ ‘U songo tamba nga dzina ḽa Yahavee Mudzimu wau, ngauri Yahavee a nga si litshe u lifhedza ane a tamba nga dzina ḽawe.

₁₂“ ‘Hulisa ḓuvha ḽa Sabatha u ḽi ite ḽikhethwa unga Yahavee Mudzimu wau o u laya. ₁₃Shuma zwau maḓuvha maṱanu na ḽithihi u khunyeledze mishumo yau yoṱhe, ₁₄hone ḓuvha ḽa vhuṱanu na vhuvhili ndi ḽa Yahavee Mudzimu wau, ndi ḽa u awela; nga heḽo ḓuvha u songo shuma tshithu – iwe kana ṅwana wau, wa mutuka kana wa musidzana, kana mushumi wau, wa munna kana wa musadzi, kana phulu yau kana donngi yau kana tshifuwo tshifhio na tshifhio, kana mutsinda ane wa dzula nae. Na vhashumi vhau, vha vhanna kana vha vhasadzi, nga vha awele-vho unga iwe. ₁₅U elelwe uri na iwe wo vha u phuli shangoni ḽa Egipita, Yahavee Mudzimu wau a u vhofholola nga mishumo mihulu ya maanḓa, ndi zwine Yahavee Mudzimu wau a u laya uri u vhulunge ḓuvha ḽa Sabatha.

₁₆“ ‘Hulisa khotsi au na mme au unga Yahavee Mudzimu wau o u laya, ndi hone zwi tshi ḓo u nakela, wa fhedza miṅwaha minzhi u tshi dzula shangoni ḽine Yahavee Mudzimu wau a u ṋea.

₁₇“ ‘U songo vhulaha muthu.

₁₈“ ‘U songo ita vhupombwe.

₁₉“ ‘U songo tswa.

₂₀“ ‘U songo vhaisa muṅwe nga u ṱanzilela mazwifhi.

₂₁“ ‘U songo emula musadzi wa muṅwe; u songo tshivha muṅwe nga nnḓu yawe, kana tsimu yawe, kana phuli yawe, ya munna kana ya musadzi, kana phulu yawe kana donngi yawe kana tshifhio na tshifhio tshi re tshawe.’

₂₂“Ndi one maipfi e Muṋe washu a amba na tshivhidzo tshaṋu tshoṱhe tsho kuvhangana, a amba e thavhani ngomu muliloni, hú na gole na buluvhutsi ḽihulu ḽo tibaho thavha, a amba nga ipfi ḽihulu, a konou ṅwala maipfi haya kha maḓaba mavhili a matombo, a mpha, a si tsha engedza maṅwe. ₂₃Inwi no ri u pfa ipfi ḽi tshi bva swiswini, thavha i tshi khou duga mulilo, vhahulwane vhoṱhe vha matsinde aṋu vha ḓa ha nṋe ₂₄na ri, ‘Mudzimu Muṋe washu o ri sumbedza vhugala hawe na vhuhulu hawe, ra pfa na ipfi ḽawe ḽi tshi amba e muliloni! Ṋamusi ra zwi vhona uri muthu u a ḓi tshila naho Mudzimu o amba nae, ra akhamala. ₂₅Hone zwino ri khou ofha u lovha. Mulilo hoyu muhuluhulu u ḓo ri fhisa ra fa arali ra dovha ra pfa ipfi ḽa Mudzimu Muṋe washu. ₂₆Ndi ufhio muthu wa ṋama ane a nga pfa ipfi ḽa Mudzimu a tshilaho a tshi amba e muliloni unga riṋe ri tshi khou mu pfa, a si lovhe? ₂₇Ndi khwiṋe hu tshi sendela iwe ha Mudzimu Muṋe washu wa pfa zwoṱhe zwine a amba, wa konou ri vhudza zwoṱhe zwine Mudzimu Muṋe washu a zwi amba. Riṋe ri ḓo zwi thetshelesa ra zwi ita!’

₂₈“Muṋe washu a pfesesa zwe na amba, Muṋe washu a mmbudza a ri, ‘Ndo pfa zwe vhathu havha vha u vhudza vha tshi amba na iwe; zwoṱhe zwe vha amba ndi zwone. ₂₉Ngavhe vha tshi dzula vhe na muya wonoyo wa u nnyofha na u tevhedza ndaela dzanga misi yoṱhe, zwa ralo ndi hone vhone na vhana vhavho zwi tshi ḓo vha nakela lini na lini. ₃₀Iya u vha vhudze uri vha humele zwavho denndeni dzavho, ₃₁huno iwe u ime fhano na Nṋe, ndi u laye ndi u vhudze ndayo dzanga dzoṱhe na milayo na ndaela zwine wa ḓo vha funza uri vha zwi tevhedze vhe shangoni ḽine nda ḓo vha ṋea uri ḽi vhe ḽavho.’

₃₂“Ndi zwone, ivhani na vhusedzi uri ni ite zwoṱhe zwe Muṋe washu Mudzimu waṋu a ni laya, ni songo pambutshela kha tshamonde kana tshauḽa. ₃₃Ni fare nḓila ye Muṋe washu Mudzimu waṋu a ni sumbedza, ni songo bva khayo, ndi hone ni tshi ḓo tshila, zwa ni nakela, na fhedza miṅwaha minzhi ni tshi dzula shangoni ḽine na ḓo ṋewa.