Vhaisraele vha tshi kunda Ogo
1“Ra takuwa ra gonyela thungo dza Bashani. Ogo khosi ya Bashani a mbo bva pfumo na mmbi yawe yoṱhe a ḓa u lwa na riṋe Edrei. 2Muṋe washu a mmbudza a ri, ‘Ni songo mu ofha, ndo dzula ndo mu kumedza inwi khathihi na mmbi yawe yoṱhe na shango ḽawe. Mu iteni zwenezwo zwe na ita Sihoni khosi ya Vhaamori we a vha a tshi dzula Hesheboni.’
3“Nangoho Mudzimu Muṋe washu a ri kumedza Ogo khosi ya Bashani na mmbi yawe yoṱhe, ra vha vhulaha vhoṱhe hu si sale na muthihi. 4Misi iyo ra dzhia na miḓi yawe yoṱhe, ha si vhe na muḓi we ra sia; miḓi ye ra dzhia muvhusoni wa Ogo shangoni ḽa Aragobo kha ḽa Bashani i swika 60. 5Miḓi iyo yoṱhe yo vha yo tangwa nga mitsheṱo milapfu, i na tswinga dzo khwaṱhaho, ri sa vhali ḓorobo nnzhi-nnzhi dzi si na mitsheṱo dze ra phusukanya. 6Vhathu vha Bashani na vhone ro vha kumedza Mudzimu nga u vha vhulaha, vhanna na vhasadzi na vhana, sa zwe ra ita Sihoni khosi ya Hesheboni. 7Zwe ra si zwi vhulahe ndi zwifuwo fhedzi, ro tou zwi thuba khathihi na thundu dze ra wana miḓini.
8“Ndi hone he ra dzhia mashango a mahosi mavhili a Vhaamori e a vha a tshi dzula seli ha Jorodani, u bva mulambo wa Arinoni u swika thavhani ya Heremoni 9ine Vhasidoni vha ri ndi Sirioni, Vhaamori vha ri ndi Seniri, 10ha vha u dzhia miḓi yoṱhe i re midavhini na ḽoṱhe ḽa Giliadi na Bashani u swika Salekha na Edrei, miḓi yoṱhe ya muvhuso wa Ogo i re Bashani.” 11(Misi iyo ho vha ho tou sala Ogo khosi ya Bashani wa Vharefai fhedzi. Mmbete wawe wa tsimbi wo vha u tshi ita mitha nṋa vhulapfu, vhuphara ha ṱoḓou swika mitha mbili. U kha ḓi vha hone na ṋamusi muḓini wa Raba musanda wa Vhaamoni.)
U kovhekanywa ha shango ḽi re vhubvaḓuvha ha Jorodani
12“Musi ro dzhia mashango a Sihoni na Ogo, ndo ṋea matsinde a Rubeni na Gadi shango ḽoṱhe u bva Aruere bamani ḽa mulambo wa Arinoni na hafu ya tshipembe ya Giliadi dzithavhani khathihi na miḓi yaḽo; 13iṅwe hafu ya tsinde ḽa Manase nda vha ṋea tshipiḓa tsho salaho tsha Giliadi na ḽoṱhe ḽa Bashani, he ha vha hu tshi vhusa Ogo.” (Ndi dzingu ḽoṱhe ḽa Arigobo ḽi re kha ḽa Bashani ḽe kale ḽa vha ḽi tshi pfi ḽa Vharefai. 14Jairi ṅwana wa Manase o dzhia shango ḽoṱhe ḽa Arigobo u swika Geshuru na Maakhathi, Bashani ḽa mbo rinwa dzina ḽa Jairi. Ndi zwine ḽa kha ḓi pfi Miḓi ya mishasha ya Jairi, na ṋamusi.)
15“Shango ḽa Giliadi ndo ḽi ṋea Makhiri, 16shango ḽi re tshipembe tshaho nda ḽi ṋea matsinde a Rubeni na Gadi. Masakha a no vha khethekanya na Vhaamoni thungo ya devhula ndi mulambo wa Jaboko, thungo ya tshipembe ndi mulambo wa Arinoni, nga vhukati hawo, 17thungo ya vhukovhela ndi govha ḽa Jorodani u bva dzivhani ḽa Khinirethe u swika vhubvaḓuvha ha Lwanzhe lwa Muṋo, mabamani a Phisiga.
18“Misi iyo nda vhudza vhanna vha ayo matsinde nda ri, ‘Muṋe washu Mudzimu waṋu o ni ṋea shango heḽi uri ḽi vhe ḽaṋu; zwenezwo vhahali vhoṱhe vha no kona u bva pfumo nga vha wele mulambo wa Jorodani vha tshi ranga Vhaisraele vha maṅwe matsinde phanḓa. 19Vhane vha ḓo sala miḓini ye nda ni ṋea ndi vhasadzi vhaṋu na vhana na zwifuwo fhedzi, ngauri ndi ḓivha uri ni na zwifuwo zwinzhi. 20Inwi ni fanela u ṱuwa na vhaṅwe Vhaisraele Muṋe washu a vhuya a vha ladzela-vho shango unga inwi o ni ladzela ḽaṋu, na vhone vha wana shango ḽine Muṋe washu Mudzimu waṋu a ḓo vha ṋea seli ha Jorodani, ndi hone na inwi ni tshi ḓo vhuelela shangoni ḽe nda ni kovhela uri ḽi vhe ḽaṋu.’
21“Joshua ene nda mu vhudza nda ri, ‘No vhona nga aṋu maṱo zwe Muṋe washu a ita mahosi aya mavhili, Sihoni na Ogo; ndi zwone zwine Muṋe washu a ḓo ita mivhuso yoṱhe ine na ḓo ṱangana nayo seli ha Jorodani. 22Ni songo vha ofha, Muṋe washu Mudzimu waṋu ndi Ene ane a ḓo ni lwela.’
Mushe a sa tendelwi u dzhena Kanana
23“Misi iyo ndo luvhelela Muṋe washu nda ri, 24‘Muṋe wa zwoṱhe Muṋe washu, wo sumbedza nṋe muḓinḓa wau vhuhulu hau na maanḓa au mahulu; ndi ufhio mudzimu ngei ṱaḓulu na fhano fhasi ane a nga kona u ita mishumo mihulu i no nga yau? 25A thi weli zwanga Jorodani nda vhona-vho shango ḽavhuḓi ḽi re seli na ḽiḽa, thavha hedzi dzavhuḓi nandi, na dza Libanoni?’ 26Hone Muṋe washu a ntsinyutshela nga mulandu waṋu, a si tende zwe nda humbela. Muṋe washu a mmbudza a ri, ‘Fhumula, a thi tsha funa u pfa u tshi amba na Nṋe nga mafhungo haya. 27Itou gonya nṱha ha thavha ya Phisiga u lavhelese vhukovhela na devhula na tshipembe na vhubvaḓuvha, u vhone shango nga maṱo fhedzi, ngauri u wela Jorodani u nga si wele. 28Tshau ndi u laya Joshua wa mu khwaṱhisa wa mu ṱuṱuwedza, ngauri ndi ene ane a ḓo wedza vhathu, ndi ene ane a ḓo ita uri shango ḽine wa khou ḽi vhona vha ḽi wane.’
29“Ndi hone-ha ri tshi vho dzula govhani ḽino u livhana na Bethe Phioro.
