Bugu ya milayo ya lushaka lwa Mudzimu musi vhe shangoni ḽa Mudzimu (12 – 26)
1“Khei milayo na ndaela dzine na pfi ni dzi vhulunge musi ni shangoni ḽe Muṋe washu Mudzimu wa vhomakhulukuku waṋu a ni ṋea uri ḽi vhe ḽaṋu; ni zwi tevhedze maḓuvha oṱhe ane na tshila fhano shangoni.
Mulayo muhulwane: Vhaisraele vhoṱhe vha vhe na thembele nthihi
2“Ni phusukanye fhethu hoṱhe hune vhannḓa vhane na ḓo vha thatha mashangoni avho vha luvha midzimu yavho hone, thavhani dzoṱhe ndapfu na zwikwarani na fhasi ha miri yo bvukaho. 3Ni thuthe aḽiṱari dzavho, ni pwashe matombo e vha imisela midzimu, thanda dzavho dza Ashera ni dzi fhise nga mulilo, zwifanyiso zwa midzimu yavho ni zwi reme, madzina ayo a songo tsha pfala henefho.
4“Tshiṅwe, ni songo edza maitele a tshakha hedzo musi ni tshi luvha Muṋe washu Mudzimu waṋu. 5Muṋe washu Mudzimu waṋu u ḓo ḓikhethela fhethu ha dzina ḽawe; ndi henefho hune a ḓo wanala hone musi ni tshi mu ṱoḓa. 6Nduvho dzaṋu dzi fhiswaho na zwiṱhavhelo na tshafumi na miṅwe mitendelo na nduvho dze na mu fulufhedzisa na dze na bvisa nga u tou funa, na matanzhe a kholomo na a nngu na a mbudzi, zwoṱhe ni yo mu ṋekedza henefho. 7Ni zwi ḽe henefho Muṋe washu Mudzimu waṋu a tshi ni vhona, inwi na miṱa yaṋu ni tshi takalela zwoṱhe zwe na kona u shuma nge Muṋe washu Mudzimu waṋu a ni shudufhadza.
8“U swika ṋamusi roṱhe ro vha ri tshi ita nga he ra vhona zwo naka, 9ngauri no vha ni sa athu dzhena shangoni ḽine Muṋe washu Mudzimu waṋu a ni ṋea uri ḽi vhe ḽaṋu ni awele. 10Hone ni ḓo ṱuwa ni tshi wela Jorodani uri ni kone u dzula shangoni ḽine Muṋe washu Mudzimu waṋu a ni ṋea ḽone uri ni wane tshifhinga tsha u awela, ni dzule no ḓitakalela ni sa ofhi na ḽithihi ḽa maswina aṋu oṱhe thungo dzoṱhe. 11Nduvho dzoṱhe dzine nda ni laedza – dzi fhiswaho, na zwiṱhavhelo, na tshafumi, na miṅwe mitendelo, na mitendelo ye na tou fulufhedzisa Muṋe washu – nduvho hedzo dzoṱhe ni dzi ḓise henefho fhethu he Muṋe washu Mudzimu waṋu a khethela dzina ḽawe. 12Ni zwi ṱhavhe henefho ni zwi ḽe ni takale phanḓa ha Muṋe washu Mudzimu waṋu ní na vhana vhaṋu vha vhatuka na vha vhasidzana, na vhashumi vhaṋu vha vhanna na vha vhasadzi, na Vhalivi vhane na dzula navho vha takale, ngauri vhone a vho ngo kovhelwa tshipiḓa tsha shango musi inwi ni tshi wana mikovhe yaṋu.
13“Ni vhone uri ni si sokou ṋekedza nduvho dzaṋu dzi fhiswaho huṅwe na huṅwe hune na funa. 14Fhethu hune Muṋe washu a ḓo hu khetha kha matsinde aṋu oṱhe, ndi henefho hune na ḓo ṋekedza nduvho dzaṋu dzi fhiswaho na dziṅwe dzoṱhe dzine nda ni laya.
Phambano ya ṋama dza nduvho na dza minyanya
15“Hone arali ni tshi tou tama ṋama, ni nga ṱhavha hoṱhe-hoṱhe hune na dzula na ḽa ṋama ye Muṋe washu Mudzimu waṋu a ni ṋea a tshi ni shudufhadza; hu nga ḽa o kumalaho na o kumululwaho, zwi fana na musi ni tshi ḽa ntsa kana mbavhala. 16Malofha fhedzi, one kha a vhe tshiila, ni a tevhulele fhasi.
17“Hone tshafumi tsha goroi na waini na mapfura a muolivi na matanzhe a kholomo na nngu na mbudzi, na nduvho dze na fulufhedzisa Muṋe washu, na mitendelo ine na bvisa nga u tou funa, na miṅwe mitendelo yoṱhe, hezwo a no ngo tendelwa u zwi ḽa mahayani aṋu, 18zwi ḽiwa phanḓa ha Muṋe washu fhethu he Muṋe washu Mudzimu waṋu a hu khetha; zwi ḽiwa nga inwi na vhana vhaṋu, vha vhatuka na vha vhasidzana, na vhashumi vhaṋu, vha vhanna na vha vhasadzi, khathihi na Vhalivi vhane na dzula navho; ni ḓo zwi ḽa na takala phanḓa ha Muṋe washu Mudzimu waṋu ni tshi humbula mashudu oṱhe e a ni ṋea. 19Ni vhone ni sa ḓo hangwa Vhalivi, maḓuvha oṱhe ane na dzula shangoni ḽaṋu.
20“Musi Muṋe washu Mudzimu waṋu a tshi ḓo engedza shango ḽaṋu ḽi aṱame unga o ni fulufhedzisa, na vhona uri ni ḓo ḽa ṋama nga u tou pfa ni tshi i tama, iḽani zwaṋu nga hune na tama. 21Fhethu hune Muṋe washu Mudzimu waṋu a ḓo khethela dzina ḽawe arali ni tshi vhona uri ndi kule, ni a ṱhavha zwaṋu kholomo kana nngu kana mbudzi dze Muṋe washu a ni ṋea, sa zwe nda ni laya, na ḓiḽela zwaṋu ni mahayani aṋu nga hune na tama. 22Zwi fana na musi ni tshi ḽa ntsa kana mbavhala, vhoṱhe vha a ḽa, vho kumalaho na vho kumululwaho, 23tenda na ila malofha, ngauri malofha ndi vhutshilo; musi ni tshi ḽa ṋama, ni songo ḽa vhutshilo hayo. 24Ni songo a ḽa, ni tou a tevhulela fhasi unga maḓi. 25Arali ni sa ḽi malofha zwi ḓo ni nakela, inwi na vhana vhaṋu, ngauri ni ḓo vha ni tshi ita zwi takadzaho Muṋe washu.
26“Nduvho dzoṱhe dze na khethela Muṋe washu, na dze na mu fulufhedzisa, dzone ni ḓo dzi ḓisa fhethu he Muṋe washu a ḓikhethela hone, 27na ṋekedza nduvho dzaṋu dzi fhiswaho dza ṋama na malofha kha aḽiṱari ya Muṋe washu Mudzimu waṋu; malofha a shululelwe kha aḽiṱari, ṋama ni ḽe zwaṋu.
28“Mafhungo oṱhe ane nda khou ni laya ni a tevhedze, ndi hone zwi tshi ḓo ni nakela lini na lini, inwi na vhana vhaṋu, ngauri ni ḓo vha ni tshi ita zwi takadzaho Muṋe washu Mudzimu waṋu.
Ni songo edza maitele a vhannḓa!
29“Muṋe washu Mudzimu waṋu u ḓo lozwa tshakha dzine na ḓo ya u dzhia mashango adzo, a dzi thatha dza ni shavha, uri inwi ni dzule mashangoni adzo. 30Huno zwi nga kha ḓi itea uri naho no no vha lozwa, na yo ṱoḓisesa zwa midzimu yavho na vhudzisa na ri, ‘Avha vhathu vho vha vha tshi luvha hani midzimu yavho? Na riṋe kha ri ite zwenezwo!’ Hezwo ni songo zwi ita. 31Ni songo luvha Muṋe washu Mudzimu waṋu nga nḓila ine vhone vha luvha ngayo, ngauri zwoṱhe zwine zwa nengisa Muṋe washu zwine a tou zwi vhenga, ndi zwone zwine vha luvha midzimu yavho ngazwo; hufha vha tshi kona u fhisa na vhana vhavho vha vhatuka na vha vhasidzana nga mulilo vha tshi vha ṋekedza midzimu yavho!
32“Ni songo litsha u vhulunga mafhungo oṱhe ane nda ni laya; ni songo engedza ipfi na ḽithihi, ni songo fhungudza na ḽithihi.
