2 VHATHESALONIKA 1

₁Ndi riṋe Paulo na Silasi na Timoti. Ri ṅwalela tshivhidzo tsha Mudzimu Khotsi ashu na Muṋe washu Yesu Khristo tsha ngeo Thesalonika. ₂Ri a ni resha ri ri: Ngavhe Mudzimu Khotsi ashu na Muṋe washu Yesu Khristo vha tshi ni itela vhuthu na vha na mulalo.

₃Vha hashu, ro fanela u dzula ri tshi livhuha Mudzimu nga zwine na vha zwone. Nahone ndi pfanelo u ralo ngauri lutendo lwaṋu lu ḓi khwaṱha lu tshi ya, na u funana haṋu noṱhe hu ḓi hulela hu tshi ya. ₄Ndi zwine ra ni zuwa zwivhidzoni zwa Mudzimu, ngauri naho ni tshi tovholwa na u tambudzwa ni ḓi konḓelela na omelela kha lutendo lwaṋu ni sa fheli mbilu.

₅Hezwo zwoṱhe ndi tsumbo ya uri Mudzimu a tshi haṱula ha ṱaluli. Zwenezwo ngauri zwino ni khou tambudzelwa muvhuso wawe, Mudzimu u ḓo vhona zwo fanela ni tshi dzhena khawo. ₆Ngauralo u ḓo lifhedza a sa ṱaluli a tambudza vhatambudzi vhaṋu, ₇a angula inwi ni tambudzwaho, khathihi na riṋe. Izwo u ḓo zwi ita musi Muṋe washu Yesu a tshi ḓidzumbulula a tshi bva makoleni e na vharuṅwa vha no sumbedza maanḓa awe, ₈e kha khavhu ya mulilo. U ḓo lifhedza vha landulaho Mudzimu vha sa funi u pfa mafhungo maḓifha a Muṋe washu Yesu. ₉Vhenevho ṱhamu yavho i ḓo vha ya u lovha tshoṱhe lini na lini, vho fhandekanywa na Muṋe washu, vhe kule na vhugala ha maanḓa awe. ₁₀Nga heḽo ḓuvha a tshi vhuya u ḓo vhuela u rendwa nga vhakhethwa vhawe vhoṱhe a tou kanukisa vhatendi vhoṱhe nga vhuhulu ha vhugala hawe. Na inwi ni ḓo vha ni navho, ngauri no tenda vhuṱanzi hashu.

₁₁Ndi zwine ra dzula ri tshi ni rabelela, ri tshi humbela Mudzimu washu uri a ni ite vho fanelaho zwe a ni vhidzela zwone, nga maanḓa awe a khunyeledze zwivhuya zwoṱhe zwe na ḓiimisela u zwi ita, na u ṱhaphudza zwine na shuma nga lutendo. ₁₂Ndi hone ni tshi ḓo ita uri dzina ḽa Muṋe washu Yesu ḽi rendiwe, Ene a konou ita uri ni rendwe-vho, nga vhuthu ha Mudzimu washu na ha Muṋe washu Yesu Khristo.