2 SAMUELE 3

₁Nnḓu ya Saulo na ya Dafita dzo fhedza tshifhinga tshilapfu dzi tshi khou lwa, ya Dafita ya ḓi wana maanḓa i tshi ya, ngeno ya Saulo i tshi ḓi fhungudzea i tshi ya.

₂Vhana vha Dafita vha vhatuka vhe vha bebwa Hebroni ngevha: Tanzhe ndi Amunoni ṅwana wa Ahinuamu wa Jesriele; ₃wa vhuvhili ndi Khiliaba ṅwana wa Abigaili tshilikadzi ya Nabali wa Kharamele; wa vhuraru ndi Abisalomo ṅwana wa Maakha ṅwananyana wa Thalamai khosi ya Geshuru; ₄wa vhuṋa ndi Adonia ṅwana wa Hagithi; wa vhuṱanu ndi Shefatia ṅwana wa Abitala; ₅wa vhuṱanu na vhuthihi ndi Ithiriamu ṅwana wa mufumakadzi wa Dafita a no pfi Egila. Vhoṱhe havho vho bebelwa Dafita a tshee Hebroni.

₆Misi vha nnḓu ya Saulo na ya Dafita vha tshi kha ḓi lwa, maanḓa a Abinere o ḓi hula a tshi ya nḓuni ya Saulo.

₇Zwino Saulo o vha e na musadzi wa phuli we a vha a tshi pfi Ritsipha ṅwananyana wa Aya. Ishbaali a vhudzisa Abinere a ri, “Ndi mini vha tshi dzhenisa musadzi wa khotsi anga wa phuli nḓuni?” ₈Abinere a sinyuwa zwihulu a tshi pfa zwe Ishbaali a amba, a fhindula a ri, “Ni vhona unga nṋe ndi tou vha mmbwa yo lalelaho, ine ya ima na Juda? U swika ṋamusi ndo ḓi vha a fulufhedzeaho kha nnḓu ya khotsi aṋu Saulo na kha muṱa wavho na khonani dzavho. A tho ngo vhuya nda ni kumedza zwanḓani zwa Dafita. Zwino inwi ni vho ntsengisela zwe nda khakha zwanga na uyu musadzi! ₉Ngavhe Mudzimu a tshi nthwa a dovha arali nda sa itela Dafita zwe Muṋe washu a mu fulufhedzisa nga muano, ₁₀nda dzhia muvhuso kha nnḓu ya Saulo nda imisa khuluṋoni ya Dafita uri a vhuse Israele na Juda u bva Dani u vhuya u swika Bierisheba.” ₁₁Ishbaali a si tsha vhuya a fhindula Abinere ḽiṅwe ipfi, nge a vha a tshi mu ofha.

₁₂Ndi hone Abinere a tshi ruma vhaḓinḓa ha Dafita uri vha swike vha ri, “Shango iḽi ndi ḽa nnyi? Vhone nga vha vhofhe mulanga na nṋe, ndi hone ndi tshi ḓo ima navho, Vhaisraele vhoṱhe vha luvha vhone.”

₁₃Dafita a ri, “Ndi zwone. Nṋe ndi ḓo vhofha mulanga navho. Hone hu na tshithu tshithihi tshine nda tshi ṱoḓa kha vhone. Vha songo vhuya vha ḓa maṱoni anga arali vha sa ḓi na Mikhala ṅwananyana wa Saulo musi vha tshi ḓa u mmbona.” ₁₄Ndi hone Dafita a tshi ruma vhaḓinḓa ha Ishbaali ṅwana wa Saulo uri vha swike vha ri, “Vhuisani mufumakadzi wanga Mikhala, ndo mu mala nga khanda dza zwitungulo zwa Vhafilista vha ḓana.”

₁₅Ndi hone Ishbaali a tshi ṋea ndaela a ita uri Mikhala a dzhiwe kha munna wawe Phalatiele ṅwana wa Laishi. ₁₆Munna wawe a mu tevhela a tshi khou lila u vhuya u swika Bahurimu. Abinere a mu vhudza a ri, “Humela hayani!” A konou huma.

₁₇Abinere a amba na vhahulwane vha Israele a ri, “Ndi kale ni tshi tama u vhumba Dafita khosi uri a ni vhuse. ₁₈Zwino zwi iteni-ha! Muṋe washu o fulufhedzisa Dafita a ri, ‘Ndi ḓo lamulela vhathu vhanga Vhaisraele zwanḓani zwa Vhafilista nga muḓinḓa wanga Dafita, nda vha lamulela na zwanḓani zwa maswina avho oṱhe.’ ”

₁₉Abinere a dovha a amba na tsinde ḽa Benyamini nga tsha vhukoma, a konou ya Hebroni u yo vhudza Dafita zwoṱhe zwine Vhaisraele na vha tsinde ḽa Benyamini vha zwi takalela.

₂₀Musi Abinere na vhanna vha 20 vhe a vha e navho vha tshi swika ha Dafita muḓini wa Hebroni, Dafita a vha itela vhuṱambo. ₂₁Ndi hone Abinere a tshi amba na Dafita a ri, “Thovhele muṋe wanga, nga vha litshe ndi mbo ḓi ṱuwa ndi yo kuvhanganya Vhaisraele vhoṱhe, vha vhofhe mulanga navho, vha vhuse shango ḽoṱhe nga hune mbilu yavho ya funa.” Dafita a ri Abinere a ṱuwe, a tshimbila nga mulalo.

₂₂Matsina zwenezwo vhanna vha Dafita na Juaba vha vha vha tshi khou vhuya vha tshi bva u ṱangula maswina, vha vhuya na thundu nnzhi ye vha thuba, vha wana Abinere a si tsheeho Hebroni ha Dafita, ngauri Dafita o vha o tenda uri a ṱuwe, a ṱuwa nga mulalo. ₂₃Juaba na vhahali vhoṱhe vhe a vha e navho vha tshi swika, a pfa upfi Abinere ṅwana wa Nere o vha o ḓa ha khosi na uri khosi yo ri a ṱuwe zwawe, a ṱuwa nga mulalo.

₂₄Juaba a livha ha khosi a swika a ri, “Vho ita zwithu-ḓe? Nga vha dzou vhona, Abinere o ḓa khavho. Ndi mini vho mu litsha a ṱuwa? Zwino o ṱuwa! ₂₅Abinere ṅwana wa Nere vha a mu ḓivha, o vha o ḓa u vha fhura na u vha ṱolola hune vha tshimbilela hone na u ḓivha zwoṱhe zwine vha ita.”

₂₆Juaba a ṱutshela Dafita, a ruma vhaḓinḓa uri vha londe Abinere, vha mu wana bidzini ḽa Sira vha vhuelela nae. Hone Dafita o vha a sa zwi ḓivhi. ₂₇Zwino musi Abinere a tshi vhuelela Hebroni, Juaba a mu isa thungo e eṱhe khoroni, a nga u khou ṱoḓa u amba nae tshiphiri, a mbo runga Abinere thumbu, a fa. Nga u ralo Juaba o lifhedzela malofha a murathu wawe Asaele.

₂₈Ngavhuya, musi Dafita a tshi zwi pfa, a ri, “Muṋe washu u a zwi ḓivha uri nṋe na muvhuso wanga a ri na mulandu na kathihi kha malofha a Abinere ṅwana wa Nere. ₂₉Ngavhe malofha awe a tshi wela ṱhohoni ya Juaba na kha nnḓu yoṱhe ya khotsi awe! Ngavhe nḓuni ya Juaba hu tshi dzula hu na muṅwe ane a lwala phophela kana vhulwadze ha lukanda vhu ofhisaho kana tshihole tshi tshimbilaho nga mugo kana a vhulawa nndwani kana a fa nga nḓala.”

₃₀Ndi uri Juaba na murathu wawe Abishai vho vhulaha Abinere nge a vhulaha murathu wavho Asaele nndwani Gibioni.

₃₁Ndi hone Dafita a tshi vhudza Juaba na vhathu vhoṱhe vhe a vha e navho a ri, “Kherukanyani zwiambaro zwaṋu ni ambare madzanganda, ni tshimbile no ṱungufhala phanḓa ha Abinere.” Khosi Dafita ene muṋe a tshimbila murahu ha bogisi ḽa mufu. ₃₂Vha swiṱa Abinere Hebroni, khosi ya lila ya tou ṱavha mukosi tshaloni tsha Abinere. Vhathu vhoṱhe na vhone vha lila. ₃₃Khosi Dafita a imbela Abinere luimbo lwa tshililo a ri,

₃₅Ndi hone vhoṱhe vha tshi ḓa vha khuthadza Dafita uri a ḽe hu tshi kha ḓi vha masiari, hone Dafita a ana a ri, “Ngavhe Mudzimu a tshi nthwa a dovha arali nda thetshela vhurotho kana tshiṅwe tshithu zwatsho ḽi sa athu kovhela!”

₃₆Vhathu vhoṱhe vha zwi vhona, vha takala, vhukuma zwoṱhe zwe khosi ya ita zwo vha takadza. ₃₇Musi wonoyo vhathu vhoṱhe na Vhaisraele vhoṱhe vha zwi ḓivha uri khosi a yo ngo longa tshanḓa kha u vhulawa ha Abinere ṅwana wa Nere.

₃₈Ndi hone khosi i tshi amba na vhanna vhayo ya ri, “A ni zwi vhoni uri ṋamusi ho fa murangaphanḓa, ene munna muhulu kha ḽa Israele naa? ₃₉Nahone ṋamusi, naho ndo vhumbwa khosi, ndi pfa ndi si na nungo, vhana havha vha Tseruya ndi nga si vha kone. Ngavhe Muṋe washu a tshi lifhedza vhavhi havha nga he zwa fanela.”