2 SAMUELE 10

₁Ngavhuya khosi ya Vhaamoni ya dzama, ṅwana wawe Hanunu a vha khosi vhudzuloni hawe. ₂Dafita a ri, “Hanunu ṅwana wa Nahashi ndi ḓo mu itela vhuthu, sa zwe khotsi awe a nnyitela vhuthu.” Ndi hone Dafita a tshi ruma vhaḓinḓa ha Hanunu u yo mu ima maṱoni nge khotsi awe a dzama.

Musi vhaḓinḓa vha Dafita vha tshi swika shangoni ḽa Vhaamoni, ₃vhaḓivhalea vha Vhaamoni vha vhudza Hanunu muṋe wavho vha ri, “Vha vhona unga Dafita u khou hulisa khotsi avho izwi a tshi ruma vhanna u vha ima maṱoni? Izwi a si ṱholi naa dze a dzi ruma u tandula muḓi, a sale a tshi u phusukanya?”

₄Ndi hone Hanunu a tshi fara vhanna vha Dafita, a vha vheula ndebvu dza luṱaha luthihi, zwiambaro zwavho zwa fhafhulwa nga vhukati u guma nga maraho, vha pfi vha ṱuwe. ₅Dafita a tshi zwi pfa, a ruma vhaḓinḓa uri vha yo ṱanganedza avho vhanna, nge vha vha vho shoniswa zwihulu. Khosi ya ri, “Dzulani Jerikho ndebvu dzaṋu dzi vhuye dzi mele, ni konou vhuya.”

₆Zwino Vhaamoni vha tshi zwi vhona uri vho no luṱana na Dafita, vha yo rendela vhahali vha Aramu vha 20 000 kha Bethe Rehobo na Tsoba, kha khosi ya Maakha vha rendela vhanna vha 1 000, kha Tobo vha rendela vhanna vha 12 000. ₇Dafita a tshi zwi pfa, a ruma Juaba uri a bve na mmbi yoṱhe ya vhahali. ₈Vhaamoni vha bva vha yo ima khoroni ya Raba musanda wavho, ngeno Vhaaramu vha Tsoba na Rehobo na vhanna vha Tobo na Maakha vho ima vhe vhoṱhe ḓakani.

₉Juaba a zwi vhona uri hu na mmbi dza maswina phanḓa hawe na murahu hawe, zwenezwo a nanga vhaṅwe vhahali vhomakone vha Israele, a vha vhea vho livhana na Vhaaramu. ₁₀Vhaṅwe vhanna vhoṱhe a ri vha langwe nga Abishai murathu wawe, a vha vhea vho livhana na Vhaamoni. ₁₁Juaba a ri, “Arali Vhaaramu vha nkunda ni ḓe ni mphalale, hone arali Vhaamoni vha ni kunda, ndi ḓo ḓa nda ni phalala. ₁₂Khwaṱhani ri lwele vhathu vha hashu na miḓi ya Mudzimu washu ri sa ofhi. Muṋe washu u ḓo ita zwine a vhona zwi zwavhuḓi!”

₁₃Ndi hone Juaba na mmbi ye a vha e nayo vha tshi tshoṱhela Vhaaramu, vha mu shavha. ₁₄Vhaamoni vha tshi vhona uri Vhaaramu vha khou shavha, na vhone vha shavha Abishai vha dzhena muḓini. Juaba zwino a humela Jerusalema a tshi bva u lwa na Vhaamoni.

₁₅Vhaaramu vha tshi vhona uri vho kundwa nga Vhaisraele, vha ramba mmbi yavho yoṱhe. ₁₆Hadada Ezere a ramba Vhaaramu vha seli ha mulambo wa Yufuratha, vha ḓa Helamu vho rangwa phanḓa nga Shobakha mulangammbi wa Hadada Ezere wa Tsoba. ₁₇Dafita a tshi zwi pfa, a ramba Vhaisraele vhoṱhe, vha wela mulambo wa Jorodani, vha ya Helamu. Vhaaramu vha ima henefho uri vha ṱangane na Dafita, vha lwe nae. ₁₈Huno Vhaaramu vha shavha Vhaisraele, Dafita a vhulaha vhanameli vha dzigariki vha 700 na vhahali vha 40 000. A vhulaha na Shobakha mulangammbi, a fela henefho. ₁₉Musi mahosi oṱhe e a vha a tshi langwa nga Hadada Ezere a tshi vhona uri o kundwa nga Vhaisraele, vha pfumedzana na Vhaisraele vha vha luvha. Vhaaramu vha vho ofha u dovha vha ima na Vhaamoni.