2 MAHOSI 8

₁Zwino Elisha o vha o vhudza musadzi we a vhuya a vusa ṅwana wawe o fa, a ri, “Nga vha ṱuwe na muṱa wavho vha yo dzula tshifhinganyana huṅwe hune vha hu wana ngauri Muṋe washu o ḓivhadza uri hu ḓo wa nḓala fhano shangoni ya fhedza miṅwaha miṱanu na mivhili.” ₂Musadzi a ita zwe a vhudzwa nga muḓinḓa wa Mudzimu, ene na muṱa wawe vha ṱuwa vha yo dzula shangoni ḽa Vhafilista vha fhedza miṅwaha miṱanu na mivhili henefho.

₃Miṅwaha miṱanu na mivhili ya ri u fhela a vhuya a tshi bva shangoni ḽa Vhafilista, a ya ha khosi a yo humbela uri a dovhe a fhiwe nnḓu yawe na tsimu yawe. ₄A wana khosi i tshi khou amba na Gehasi, mushumi wa muḓinḓa wa Mudzimu, ya ri, “Edzonu mmbudza mishumo mihulu ye Elisha a ita.” ₅Musi Gehasi a tshi kha ḓi hanelela khosi zwe Elisha a vusa mufu, musadzi uḽa we Elisha a vusa ṅwana wawe a ḓa u humbela khosi uri i dovhe i mu fhe nnḓu yawe na tsimu yawe. Gehasi a ri, “Thovhele muṋe wanga, musadzi ane nda khou mu amba ndi onoyu, uyu ndi ene ṅwana wawe we Elisha a mu vusa!” ₆Khosi ya vhudzisa uyo musadzi ngazwo, musadzi uyo a anetshela khosi ayo mafhungo. Ndi hone khosi i tshi vhidza ḽiṅwe gota ya ḽi vhudza ya ri, “Dovhani ni fhe hoyu musadzi zwoṱhe zwe zwa vha zwi zwawe, hu tshi katelwa na mutengo wa zwoṱhe zwo kaṋwaho tsimuni yawe u bva tshee a pfuluwa fhano shangoni u swika zwino.”

₇Elisha a ṱuwa a ya Damasko. Zwenezwo Beni Hadadi khosi ya Aramu o vha e na biso. Khosi ya zwi pfa uri muḓinḓa wa Mudzimu o swika, ₈ya vhudza Hazaele ya ri, “Dzhiani tshifhiwa hetshi ni ṱuwe natsho ni yo ṱanganedza muḓinḓa wa Mudzimu. Ni mu vhudze a ni vhudzisele ha Yahavee uri ndi nga fhola kha biso iḽi naa?”

₉Hazaele a ya a ṱanganedza Elisha, e na tshifhiwa tsha zwibveledzwa zwoṱhe zwavhuḓi zwa Damasko zwo hwalwa nga gamela dza 40. A swika a ima phanḓa hawe a ri, “Ṅwana wavho Beni Hadadi khosi ya Aramu o nthuma uri ndi ḓe ndi vha vhudzise arali vha tshi ḓo fhola biso ḽavho.”

₁₀Elisha a fhindula a ri, “Nga vha ye vha mu vhudze vha ri, ‘Vhukuma u ḓo fhola,’ hone Muṋe washu o nnzumbululela uri u ḓo fa.” ₁₁A mu ṱalela a sa humisi maṱo, Hazaele a vhuya a shona. Muḓinḓa wa Mudzimu a thoma u lila.

₁₂Hazaele a vhudzisa a ri, “Vha lidzwa ngani muṋe wanga?” Elisha a fhindula a ri, “Ndi uri ndi ḓivha tshiṱuhu tshine vhone vha ḓo itela Vhaisraele. Vha ḓo fhisa madzhavhelo avho, vha vhulaha vhaṱhannga vhavho nga pfumo, vhana vhavho vha vha rwisa na fhasi, vhasadzi vhavho vho vhifhaho muvhilini vha vha hushula.”

₁₃Hazaele a ri, “Maanḓa a u ita zwo raloho ndi nga a wana ngafhi, hufha ndi tshi tou vha mmbwa!”

Elisha a fhindula a ri, “Muṋe washu o nnzumbululela uri vhone vha ḓo vha khosi ya Aramu.”

₁₄Hazaele a ṱutshela Elisha a vhuelela ha muṋe wawe. Musi Beni Hadadi a tshi vhudzisa Hazaele uri Elisha o mu fhindula mini, Hazaele a fhindula a ri, “O mmbudza uri vhukuma vha ḓo fhola.” ₁₅Huno nga matshelo Hazaele a dzhia sila, a ḽi lovhea maḓini, a ḽi ṱharamudza a fukedza tshifhaṱuwo tsha khosi, a i ḽisa tshivhindi. Hazaele a vha khosi vhudzuloni hawe.

₁₆Nga ṅwaha wa vhuṱanu wa muvhuso wa Joramu ṅwana wa Ahaba khosi ya Israele, musi Josafati e khosi ya Juda, Jehoramu ṅwana wa Josafati a vha khosi ya Juda. ₁₇O vha khosi e na miṅwaha ya 32, a vhusa e Jerusalema a fhedza miṅwaha miṱanu na miraru. ₁₈A kanda vhuṱalani ha mahosi a Israele, a ita zwe vha nnḓu ya Ahaba vha ita, ngauri o vha o dzea ṅwananyana wa Ahaba, ndi zwe a ita zwi sa takadzi Muṋe washu.

₁₉Huno Muṋe washu o vha a sa ṱoḓi u lozwa Juda, a tshi elelwa mulanda wawe Dafita. O vha o fulufhedzisa mulanda wawe Dafita uri u ḓo ḓi mu siela luvhone, vhaḓuhulu vhawe vha ḓi vhusa lini na lini.

₂₀Misi ya Jehoramu, vhathu vha Edomo vha shandukela vha Juda, vha vhumba khosi yavho. ₂₁Zwenezwo Jehoramu a takuwa na gariki dzawe dzoṱhe a livha Tsairi. Vhaedomo vha mu tanga e na vhalangi vha gariki dzawe, a vuwa a tshoṱha vhusiku, mmbi yawe ya ḓishavhela ya humela hayani. ₂₂Na ṋamusi Vhaedomo vha kha ḓi vha vho shandukela Vhajuda. Misi iyo na muḓi wa Libina wa shanduka.

₂₃Mafhungo maṅwe a muvhuso wa Jehoramu na zwoṱhe zwe a ita o ṅwalwa buguni ya Histori ya Mahosi a Juda. ₂₄Jehoramu a dzama a swiṱwa zwaloni zwa musanda Muḓini wa Dafita. Ṅwana wawe Ahasia a vha khosi vhudzuloni hawe.

₂₅Ahasia ṅwana wa Jehoramu khosi ya Juda o thoma u vhusa nga ṅwaha wa 12 wa muvhuso wa Joramu ṅwana wa Ahaba khosi ya Israele. ₂₆Ahasia o vha khosi e na miṅwaha ya 22 a vhusa e Jerusalema a fhedza ṅwaha muthihi. Mme awe o vha a tshi pfi Athalia, e muḓuhulu wa Omuri khosi ya Israele. ₂₇O kanda vhuṱalani ha nnḓu ya Ahaba, a ita zwi sa takadzi Muṋe washu, zwa ḓi nga zwe zwa itwa nga nnḓu ya Ahaba, nge a vha o dzetshelana na muṱa wa Ahaba.

₂₈Ahasia a bva pfumo na Joramu ṅwana wa Ahaba vha yo lwa na Hazaele khosi ya Aramu muḓini wa Ramotho kha ḽa Giliadi. Vhaaramu vha huvhadza Joramu. ₂₉Ndi hone khosi Joramu a tshi humela muḓini wa Jesriele uri a thome u fhola mbonzhe dze a phulwa nga Vhaaramu muḓini wa Ramotho nndwani yawe a tshi lwa na Hazaele khosi ya Aramu. Ahasia ṅwana wa Jehoramu khosi ya Juda a ya muḓini wa Jesriele u yo ṱolela Joramu ṅwana wa Ahaba nge a vha o huvhala.